ޑޮނަލްޑް ޓްރަމްޕް އެމެރިކާގެ ރައީސްކަމުގެ ހުވައިކުރައްވާ ރަސްމިއްޔާތު ޖެނުއަރީ 20 ގައި އޮންނާނެ އެވެ. މި ރަސްމިއްޔާތަށް ބައްރުތަކަށް ދައުވަތު ފޮނުވާފައި އޮތްއިރު، ކޮންމެ ގައުމަކުން ވެސް ވަޑައިގަންނަވާނީ އެ ގައުމެއްގައި ހުންނެވި އެންމެ ކަމުވޮށިގެންވާ ނުވަތަ އެންމެ އިއްޒަތްތެރި ވެރިޔާ އެވެ.
އެމެރިކާގެ ނޫސްތަކުން ކުރިން ބުނި ގޮތުން މި ރަސްމިއްޔާތަށް ވަޑައިގަތުމަށް ޗައިނާގެ ރައީސް، ޝީ ޖިންޕިންއަށް ވެސް ވަނީ ދައުވަތު ފޮނުވާފަ އެވެ. ނޫސްތަކުގެ މި ބުނުމަށް ޓްރަމްޕްގެ ޓީމުން ދެކޮޅުހަދާފައި ނުވާތީ މި ޚަބަރު މިއޮތީ ކަށަވަރުވެފަ އެވެ.
ރިޕޯޓްތައް ބުނާ ގޮތުން ޓްރަމްޕް ހުވައިކުރައްވާ ރަސްމިއްޔާތަށް ޝީ ޖިންޕިން ވަޑައެއް ނުގަންނަވާނެ އެވެ. އޭގެ ބަދަލުގައި ފޮނުއްވާނެ ކަމަށް ބުނެވެނީ ޝީގެ ވަރަށް އަރިސް، އަދި ޗައިނާގައި ނުފޫޒުގަދަ ބޭފުޅެކެވެ.
ޓްރަމްޕްގެ ފަރާތުން ޝީ ޖިންޕިންއަށް ފޮނުއްވި ދައުވަތަކަށް، ޝީގެ ބަދަލުގައި ކޮންމެ ކޮންމެ މީހަކު ފޮނުއްވުމަކީ ޓްރަމްޕް އެހާ ގަޔާވެވަޑައިގަންނަވާނެ ކަމެއް ނޫން ކަމަށް ޚަބަރުތައް ބުނެ އެވެ.
ޗައިނާއާ އެމެރިކާއާ ދެމެދު ޚިލާފުތައް ހުރިއިރު، އެމެރިކާގެ ރައީސްގެ ގޮތުގައި ދުނިޔެއަށް ޓްރަމްޕް ތައާރަފުވާ ރަސްމިއްޔާތަކީ ހައިސިއްޔަތުގެ ގޮތުން ބޮޑުވެގެންވާ ބައްދަލުވުކަށް ވާނެ އެވެ.
ރިޕޯޓްތައް ބުނާ ގޮތުން ޗައިނާއިން ފޮނުވާނެ ކަމަށް ބޮޑަށް ބެލެވެނީ ޓްރަމްޕްގެ ޓީމަށް ރުހެވޭ ބޭފުޅެކެވެ. އެކަމަކު އޭގެ ތެރޭގައި ޗައިނާގެ ޚާރިޖީ ވަޒީރު ވާން ޔީ އަދި ނައިބު ރައީސް ހާން ޒެން ހިމެނިވަޑައިނުގަންވާ ކަމަށް އިތުބާރު ހުރި މަސްދަރުތަކުން ބުނެ އެވެ.
ޓްރަމްޕްގެ ޓީމަށް ކަމުދާ ބޭފުޅެއްގެ ގޮތުގައި ޚަބަރުތަކުން ފާހަގަކުރަނީ ޗައިނާގެ ޕޮލިޓްބިއުރޭގެ ސްޓޭންޑިންގް ކޮމިޓީގެ މެމްބަރު
ކައި ޗީ އެވެ.
ކައި ޗީ އަކީ ޝީ ޖިންޕިންގެ ކަނާތް ކަމަށް ބުނެވެ އެވެ. އޭނާގެ ނިންމުންތަކަށް ޝީ ޖިންޕިން އެއްވެސް ބަދަލެއް ނުގެންނަވާނެ ކަމަށްވެސް ބުނެވެ އެވެ.
ޓްރަމްޕްގެ ޓީމުން ބޭނުންވަނީ ޗައިނާއާ އެމެރިކާއާ ދެމެދު ކުރެވޭ މަޝްވަރާތައް އެއް ބުރުން ނިންމާލެވޭ ވަރުގެ ބާރުތަކެއް އޮތް ބޭފުޅަކު ޓްރަމްޕް ހުވައިކުރައްވާ ރަސްމިއްޔާތުގައި ބައިވެރިވުމެވެ.