މާލޭގެ މާފަންނު ސަހަރާގައި ހަދާފައިވާ ސްޓޯމްވޯޓާ ޕަމްޕް ސްޓޭޝަން ނުވަތަ ފެން ހިންދާ ނިޒާމަށް ލިބުނު ގެއްލުން ހައްލުކޮށްފި އެވެ.
ކޮންސްޓްރަކްޝަން މިނިސްޓްރީން ބުނީ ޕަމްޕް ސްޓޭޝަން ލިބުނު ގެއްލުން މިއަދު ވަގުތީ ގޮތުން ހައްލުކުރީ އާރްޑީސީ އާއި ސްޓެލްކޯގެ އެހީތެރިކަމާއެކު ކަމަށެވެ.
ކޮންސްޓްރަކްޝަން މިނިސްޓަރު އަބްދުﷲ މުއްތަލިބް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މާފަންނު ސަހަރާގައި ހުރި ސްޓޯމްވޯޓާ ޕަމްޕް ސްޓޭޝަނަށް ގެއްލުންތަކެއް ލިބުނީ ސަހަރާގެ ބައެއް ހުސްކުރުމަށް މާލެ ސިޓީ ކައުންސިލުން މިހާރު އެ ސަރަހައްދުގައި ކުރަމުންދާ މަސައްކަތްތަކުގެ ތެރެއިން ކަމަށެވެ.
މާލެ ސިޓީ ކައުންސިލުން އެ މަސައްކަތް ކުރަނީ ކޮންސްޓްރަކްޝަން މިނިސްޓްރީގެ ހުއްދައެއް ނެތި ކަމަށްވެސް މުއްތަލިބް ތުހުމަތު ކުރެއްވި އެވެ. އަދި ސިޓީ ކައުންސިލުން މާފަންނު ސަހަރާގެ ކައިރީގައި މަސައްކަތް ކުރަނީ ވަރަށް ޒިންމާދާރުކަން ކުޑަކޮށް ކަމަށްވެސް ވިދާޅުވި އެވެ.
"އެ މަސައްކަތުން ލިބުނު ގެއްލުމާ ގުޅިގެން މާފަންނު ސަރަހައްދުގައި ފެންބޮޑުވުމުގެ މައްސަލަ ދިމާވަމުންދާކަން ފާހަގަވޭ،" މުއްތަލިބް ވިދާޅުވި އެވެ.
މާލެއަށް ރޭ ދަންވަރު ބޯކޮށް ވާރޭ ވެހުމާ ގުޅިގެން މަގުތަކުން މިއަދު މެންދުރުކުރީގެ ވަގުތެއްގައި 13،882 ޓަނުގެ ފެން ހިންދާފައިވާ ކަމަށް އެމްއެންޑީއެފް އިން ބުނެ އެވެ.