ޖަނަރޭޓަރުތަކެއްގައި މައްސަލަތަކެއް ޖެހި އައްޑޫގެ ގުޅިފައިވާ އަވަށްތަކުން ކަރަންޓު ކަނޑަން ފަށައިފި އެވެ.
އައްޑޫ އިން ކަރަންޓު ކެނޑެމުން ދަނީ މަރުކަޒީ އިންޖީނުގޭގެ ހަ ޖަނަރޭޓަރަކަށް ޓެކްނިކަލް މައްސަލަތަކެއް ދިމާވެފައިވުމުން ކަމަށް ފެނަކައިން ވަނީ ބުނެފަ އެވެ.
ފެނަކައިން ބުނީ އެ މައްސަލަ ހައްލު ކުރެވެންދެން ހިތަދޫ، މަރަދޫ، މަރަދޫފޭދޫގެ އިތުރުން ފޭދޫ އިން ކޮންމެ ދުވަހަކު ހަވީރުން ފެށިގެން އެކި ގަޑިތަކުގައި ކަރަންޓު ކަނޑަމުންދާނެ ކަމަށެވެ.
ދިމާވެފައިވާ މައްސަލަ ހައްލުކުރުމަށް މުވައްޒަފުން މަސައްކަތް ކުރަމުންދާ ކަމަށްވެސް ފެނަކައިން ވަނީ ބުނެފަ އެވެ.
އައްޑޫއަށް ދިމާވެފައިވާ އެންމެ ބޮޑު އެއް މައްސަލައަކީ ކަރަންޓުގެ މައްސަލަ އެވެ.
އައްޑޫއަށް ދިމާވެފައިވާ ކަރަންޓްގެ މައްސަލައަށް ދާއިމީ ހައްލެއް ހޯދުމަށް ޗައިނާގެ ކުންފުންޏަކާ މިހާރު ވަނީ މަޝްރޫއެއްވެސް ހަވާލުކޮށްފަ އެވެ.
މި މަޝްރޫއުގެ ދަށުން 32 މެގަވޮޓްގެ ކަރަންޓް ބޭނުންކުރެވޭ ގޮތަށް ޕަވާޕްލާންޓް ތަރައްގީކޮށް ވަސީލަތްތައްވެސް ތަރައްގީކުރާނެ އެވެ.
މިމަޝްރޫއުގެ ދަށުން ދެ ފިޔަވައްސަކަށް ބަހާލައިގެން 9.8 މެގަވޮޓްގެ ދެ ޖެންސެޓާއި 5.8 މެގަވޮޓްގެ ދެ ޖެންސެޓް އިންސްޓޯލް ކުރާނެ އެވެ.