ޖަރުމަނުން އިތުރު 50 މިލިއަން ޔޫރޯގެ އެހީ ސީރިއާއަށް ދެއްވާނެ ކަމަށް ޖަރުމަނުގެ ޚާރިޖީ ވަޒީރު އަނަލޭނާ ބެއާބޮކް ވިދާޅުވެއްޖެ އެވެ.
ބެއާބޮކް ވިދާޅުވި ގޮތުން އެހީ ފޯރުކޮށްދިނުމަށް ހަމަޖެހިފައި ވަނީ ކާބޯތަކެއްޗާއި، އެމެޖެންސީ ހާލަތުގައި ބޭނުންކުރާ ސާމާނު، އަދި ބޭސްފަރުވާއަށް ބޭނުންވާ ތަކެތީގެ ގޮތުގަ އެވެ.
ސީރިއާގެ ހާލަތަށް އަވަސް ހައްލެއް ހޯދައިދޭން ޖެހިފައި އޮތް ކަމަށް ވަޒީރު ވިދާޅުވި އެވެ. އޭނާ އަދި ވިދާޅުވީ 50 މިލިއަން ޔޫރޯގެ އިތުރު އެހީތައް ވެސް -- ކުރިން މަޝްވަރާކުރެވިފައި އޮތް ގޮތަށް ސީރިއާއަށް ދެއްވާނެ ކަމަށެވެ.
ދާޚިލީ ހަނގުރާމައިގެ ސަބަބުން ސީރިއާގެ އާންމު ރައްޔިތުން ވަރަށް ބޮޑަށް ނިކަމެތިވެފައިވާ ކަމަށް ބެއާބޮކް ވިދާޅުވި އެވެ. މިހެންކަމުން، މި އެހީ އަކީ އާންމު ރައްޔިތުންގެ ހާލަތު ރަނގަޅުކުރުމަށް ދެއްވާ އެހީއެއް ކަމަށް ވަޒީރު ވިދާޅުވި އެވެ.
ބައްޝާރުލް އަސަދުގެ ވެރިކަމުގައި ސީރިއާގެ އާންމު ރައްޔިތުންނަށް ނިކަމެތި ހާލުޖެއްސި، އަސަދުގެ ބައިވެރިންނަށް ހައްގު އަދަބު ދެވެން ޖެހޭނެ ކަމަށްވެސް ޖަރުމަނުގެ ޚާރިޖީ ވަޒީޜު ވިދާޅުވި އެވެ.
ސީރިއާއަށް އެހީދިނުމާ ބެހޭ ގޮތުން ޖަރުމަނުގެ ޚާރިޖީ ވަޒީރު ސައޫދީ އަރަބިއްޔާގައި ނޫސްވެރިންނަށް މުޚާތަބުކުރައްވައި ވަނީ ވާހަކަދައްކަވާފަ އެވެ. އޭނާ ވިދާޅުވީ ޒަރޫރީ ބާވަތްތަކުން އެހީ ދެއްވަނީ އާންމުންގެ ދިރިއުޅުން ފަސޭހަކޮށްދެއްވުމަށް ކަމަށެވެ.
އަސަދުގެ ސަރުކާރުން ސީރިއާގެ އާންމު ރައްޔިތުންނާ ދެކޮޅަށް ހިންގި އަނިޔާވެރި އަމަލުތައް ކުށްވެރިކޮށް ސީރިއާއަށް ދަތިކުރަށް ފިޔަވަޅު އެޅި ގިނަ ގައުމުތަކުގެ ތެރޭގައި ޖަރުމަނު ވެސް ހިމެނެ އެވެ.
ސީރިއާގެ ދާޚިލީ ހަނގުރާމަ 14 އަހަރު ވަންދެން ވަނީ ދިގުދެމިގެން ގޮސްފަ އެވެ. މި ހަނގުރާމައިގައި 500،000 އާ ގާތަށް މީހުން ވަނީ މަރުވެފަ އެވެ.
ހަނގުރާމައިގެ ކުރިން ސީރިއާގައި އޮތް 23 މިލިއަން މީހުންގެ އާބާދީގެ ދެބައިކުޅަ އެއްބައި ވަނީ ގެދޮރު ގެއްލިފަ އެވެ. ގައުމު ދޫކޮށް ހެޔޮ ހާލަތަށް ދަތުރުކުރި އެތައް ހާސް ބަޔަކު ވަނީ ކަނޑުވެގެން މަރުވެފަ އެވެ.