ލުބްނާނުގެ ބޮޑުވަޒީރުގެ މަގާމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގެ ފަނޑިޔާރު ނަވާފް ސަލާމް އައްޔަން ކުރައްވައިފި އެވެ. އޭނާ ބޮޑުވަޒީރުގެ މަގާމަށް އައްޔަންކުރެއްވީ ލުބްނާންގެ ރައީސް ޖޫޒީފް އޫން އެވެ.
ނަވާފް ސަލާމް، 71، މިހާތަނަށް ހުންނެވީ އައިސީޖޭގެ ރައީސްގެ މަގާމުގަ އެވެ. އޭނާ އުފަންވެ ވަޑައިގަތީ ޑިސެމްބަރު 15، 1953 ގައި ލުބްނާންގެ ވެރިރަށް ބޭރޫތަށެވެ.
ނަވާފް ސަލާމް ބޮޑުވަޒީރުގެ މަގާމަށް އައްޔަންކުރަން ބޭނުންވާ ތާއީދު، ގާނޫންހަދާ މަޖިލީހުން ވަނީ ލިބިފަ އެވެ. މި ތާއީދާ އެކު ލުބްނާންގައި މުޅިން އާ ސަރުކާރެއް އެކުލަވާލެއްވުމަށް ރައީސް އޫން ވަނީ ބޮޑުވަޒީރަށް ދަންނަވާފަ އެވެ.
ލުބްނާންގެ ވަގުތީ ބޮޑުވަޒީރުގެ މަގާމުގައި މިހާތަނަށް ހުންނެވި ނަޖީބް މީގާތީއަށް ބޮޑުވަޒީރުގެ މަގާމުގައި ދެމިހުންނެވޭ ގޮތް ވަނީ ނުވެފަ އެވެ. އެއީ ހިޒްބުﷲގެ ބާރު ގާނޫންހަދާ މަޖިލީހުގައި ކެނޑިފައި އޮތުމުން ކަމަށް މީޑިއާ ރިޕޯޓްތައް ބުނެ އެވެ.
ނަވާފް ސަލާމް ބޮޑުވަޒީރު މަގާމަށް އައްޔަންކުރެއްވުމާ ގުޅިގެން ހިޒްބުﷲ އިން ވަނީ ނުތަނަވަސްކަން ފާޅުކޮށްފަ އެވެ. ހިޒްބުﷲ ގަބޫލުކުރާ ގޮތުގައި ބޮޑުވަޒީރުގެ މަގާމުގައި ހުންނަވަން ވާނީ އެ ޖަމާއަތަށް ފޫޅުކެނޑި މީހެކެވެ.