ފުވައްމުލަކުގައި މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް ހަރަކާތްތެރިވާ ކަމަށް ދެ މީހުން އަނެއްކާވެސް ހައްޔަރުކޮށްފި އެވެ.
ފުލުހުން ހައްޔަރު ކުރި ދެ މީހުންނަކީ ފުވައްމުލައް، ދޫޑިގަން، ކަރަންކާވިލާ، އަހްމަދު ނިއުޝާދު (34 އަހަރު) އާއި، ޏ. ފުވައްމުލައް، ދޫޑިގަން، ޒަމާނީގެ، ހަސަން އާޒިމް (29 އަހަރު) އެވެ.
ފުލުހުން އެންމެ ފުރަތަމަ މި ދެ މީހުން ހައްޔަރުކުރީ މިދިޔަ ޑިސެމްބަރު ނުވަވަނަ ދުވަހު ފުވައްމުލަކުގައި ކުރިއަށް ގެންދިޔަ ހާއްސަ އޮޕަރޭޝަން -- "އޮޕަރޭޝަން ވެށި ރައްކަލް"ގެ ތެރެއިންނެވެ.
މި ދެ މީހުން އެންމެ ފުރަތަމަ ބަންދުކޮށްފައި ތިއްބާ ދޫކޮށްލީ އެ މީހުން ބަންދުކުރި މައްސަލަ އެ މީހުންގެ ފަރާތުން ހައިކޯޓުގައި އިސްތިއުނާފް ކުރުމުން ހައިކޯޓުން ދޫކޮށްލަން އަމުރުކޮށްގެންނެވެ.
މި ދެ މީހުން ދެވަނަ ފަހަރަށް ހައްޔަރުކޮށް އެ މީހުންގެ ބަންދާ މެދު ގޮތެއް ނިންމުމަށް މިދިޔަ ހޮނިހިރު ދުވަހު ކޯޓަށް ހާޒިރު ކުރުމުން ހަސަން އާޒިމްގެ ބަންދަށް ހަތް ދުވަސް އަދި އަހްމަދު ނިއުޝާދުގެ ބަންދަށް 10 ދުވަސް ކޯޓުން ޖަހައިދީފައިވެ އެވެ.