ރާއްޖޭގެ ޖަލުތަކުގައި ހިންގާ އަނިޔާވެރި އަމަލުތަކަގެ ވާހަކައަކީ އަބަދުހެން ދައްކާ ވާހަކައެކެވެ. ރައީސުލްޖުމްހޫރިއްޔާގެ މަގާމަށް ވަޑައިގަތުމަށްޓަކައި ކޮންމެ ބޭފުޅަކުވެސް ޖަލުތަކުގެ ހާލަތު ރަގަޅު ކުރައްވާނެ ކަމަށް ވިދާޅުވެ އެވެ. އެހެންނަމަވެސް އެމަގުން އަމަލުކުރައްވާތީއެއް ނުފެނެ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެން ޖަލުތަކަށް ޒިންމާދާރުވާ ވަޒީރެއްގެ ގޮތުގައި ހަމަޖެއްސެވީ ހޯމްލޭންޑް ސެކިއުރިޓީ މިނިސްޓަރު އަލީ އިހްސާން އެވެ. ރައީސް މުއިއްޒުގެ ފަރާތްޕުޅުން މިނިސްޓަރު އިހްސާނާ ހަވާލުކުރައްވާފައި އޮތް އެންމެ މުހިއްމު އެއް މަސައްކަތަކީވެސް ޖަލުތަކުގެ ހާލަތު ރަނގަޅު ކުުރުމުގެ މަސައްކަތެވެ.
ގައުމީ ބޮޑު މަސައްކަތާ ހަވާލުވެވަޑައިގަތުމަށްފަހު މިނިސްޓަރު އިހްސާން ވަނީ ގޯސްކޮށް ހާލަތު ރަނގަޅު ހާލަތަކަށް ގެނައުމުގެ މަސައްކަތްތައް ވަކި ޕްލޭނެއްގެ ތެރެއިން ފައްޓަވާފަ އެވެ. އެގޮތުން އިހްސާނުގެ އިރުޝާދުގެ ދަށުން 42 މީހުންގެ ޖާގައިގެ ގޮޅިތަކެއް މުޅިން އަލަށް ޖަލުގައި މިހާރު ވަނީ އިމާރާތްކުރަން ފަށާފަ އެވެ.
ގައިދީންގެ ރިހިބިލިޓޭޝަން ޕްރޮގްރާމަކީ ބޮއްސުންލާފައިވާ ޕްރޮގްރާމަކަށްވާތީ މަގާމާ ހަވާލުވެވަޑައިގަތުމަށްފަހު އިހްސާން ވަނީ އެކަން ހަމަމަގަށް އަޅުވާފަ އެވެ. ޖަލުތަކުގައި ގައިދީން ބައިތިއްބައިގެން ރިހިބިލިޓޭޓް ކުރުމުގެ މަސައްކަތްތަކުގެ ތެރެއިން މާފުށީ ޖަލުގައި ސަގާފީ ގޯއްޗެއް ހަދައި އެތަނުގައި ދިވެހިންގެ ސަގާފީ އަދި ފަންނީ މަސައްކަތްތައް ދަސްކުރުމުގެ މަގު ގައިދީންނަށް ވަނީ ފަހިކޮށްދީފަ އެވެ.
ޖަލުން ނިކުންނަ ގައިދީންއަކީ އަހްލާގު ރަނގަޅު ދީނަށް ލޯބި ކުރާ ބަޔަކަށް ހެދުމަށްޓަކައި ގައިދީންނަށް އަމާޒުކޮށްގެން ކުރިއަށް ގެންދާ ދީނީ ނަސޭހަތް ޕްރޮގްރާމު މުރާޖައާކޮށް ހެޔޮ ބަދަލުތަކެއް ގެނައީވެސް މިނިސްޓަރު އިހްސާންގެ ބެއްލެވުމުގެ ދަށުންނެވެ. އަދި ކީރިތި ޤުރުއާނާ ބެހޭ ގައުމީ މަރުކަޒާ ގުޅިގެން، ގައިދީންނަށް ރީތިކޮށް ޤުރުއާން ކިޔަވަން ދަސްކޮށްދިނުމުގެ ޕްރޮގްރާމެއްވެސް ވަނީ ފައްޓަވާފަ އެވެ.
މީގެއިތުރުން ކޮމިއުނިޓީ ސާވިސް ތަންފީޒު ކުރާނެ ގޮތުގެ ޕްލޭން ނިންމައި، ތަންފީޒު ކުރުމުގެ މަސައްކަތް ކުރިއަށް ގެންދިއުމާއި މުޖުތަމައަށް ދޫކުރެވޭ މީހުން ކުށްކުރުމުން ދުރުހެލި ކުރުމަށާއި މުޖުތަމައަށް ކާމިޔާބު ކަމާއެކު ދޫކޮށްލުމަށް ބޭނުންވާނެ ޕްރޮގްރާމްތައް ރޭވުމަށް އަތޮޅުތަކުގެ ކައުންސިލްތަކާއި ޖަމިއްޔާތަކާ ބައްދަލުކޮށް މަޝްވަރާކޮށް، ރިފަރަލް މެކޭނިޒަމެއް އެކުލަވާލުމުގެ މަސައްކަތްވެސް މިހާރު ވަނީ ފައްޓަވާފަ އެވެ.
ޖަލަށް ވެއްދުން މަނާ ތަކެތި ވެއްދުން ހުއްޓުވުމަކީ މީގެކުރިން އެއްވެސް ސަރުކާރަށް ކުރެވިފައި އޮތް ކަމެއް ނޫނެވެ. ޖަލަށް މަނާ ތަކެތި ވައްދަނީ ސީދާ އެ ތަންތަނުގައި ތިބޭ ކަރެކްޝަން އޮފިސަރުންގެ އެހީތެރިކަމާ އެކު ކަމަށް އެތައް ބަޔަކަށް ގަބޫލުކުރެވިފައި އޮތަސް އެކަމުގެ ހަގީގަތް ބެލުމަށް މީގެކުރިން އެއްވެސް ސަރުކާރަކުން މަސައްކަތެއް ކޮށްފައެއް ނުވެ އެވެ. ނަމަވެސް މިނިސްޓަރު އިހްސާން މަގާމާ ހަވާލުވެވަޑައިގަތުމަށްފަހު ޖަލަށް މަނާ ތަކެތި ވެއްދުމުގައި ހަރަކާތްތެރިވާ ކަރެކްޝަންސް ބޮޑު ނެޓްވޯކެއް ހޯދައި އެކަމުގައި ޝާމިލްވާ އެންމެން ހައްޔަރުކޮށް އެއް ބަޔަކަށް މިހާރު ވަނީ ދައުވާ އުފުލަން ތައްޔާރުވެފަ އެވެ.
ޖަލަށް މަނާ ތަކެތި ވައްދަމުން ދިޔަ ޔުނީފޯމް އެޅި އޮފިސަރުންތަކެއް އަތުލައިގަތުމަށްފަހު މިނިސްޓަރު އިހްސާން ވަނީ ޔުނީފޯމް އެޅި އިދާރާތަކުގައި ހަރަކާތްތެރިވާ އޮފިސަރުންނަށް ވަރުގަދަ އިންޒާރެއްވެސް ދެއްވާފަ އެވެ. އެގޮތުން މިނސްޓަރު ވިދާޅުވީ ޔުނީފޯމް އަޅައިގެން ތިބެ ގާނޫނާ ހިލާފު އެއްވެސް އަމަލެއް ހިންގަން އަދި އެފަދަ އަމަލެއް ހިންގައިގެން އެއްވެސް މުއައްސަސާއެއްގެ ގަދަރާއި ހައިބަތު އަދި އެފަދަ އިދާރާތަކަށް އާންމުން ކުރާ އިތުބާރު ގެއްލުވާލަން ފުރުސަަތު ނުދެއްވާނެ ކަމަށެވެ.
ހޯމްލޭންޑް ސެކިއުރިޓީ މިނިސްޓަރު އިހްސާންގެ ބެއްލެވުމުގެ ދަށުގައި ސަރުކާރުގެ އެންމެ ގިނަ އިދާރާތައް ހުރި ނަމަވެސް ހުރިހާ އިދާރާއެއް ވެސް "ބެލެންސް" ހަމަކޮށް ހިންގާލުމަކީ އިހްސާންގެ ހިންގުންތެރިކަން ފެނިގެންދާ ކަމެކެވެ. ވަކިން ހާއްސަކޮށް މިނިސްޓަރު އިހްސާންގެ އެންމެ ޒުވާން ދުވަސްވަރު ފުރިހަމަ ކުރެއްވި އަސްކަރީ ތަމްރީން ތަކުގެ ތެރެއިން ޖަލުތަކުގެ ހާލަތު ރަނގަޅު ކުރުމަށާއި ގައިދީން އަހްލާގާއި އުޅުން ރަނގަޅު ކުރުމަށް ކުރަމުން ގެންދަވަނީ ތައުރީފް ހައްގު އުދަނގޫ މަސައްކަތްތަކެކެވެ.
