ޔޫއެފާ ޗެމްޕިއަންސް ލީގުގެ ފުރަތަމަ ލެގުގައި ލިވަޕޫލުން ޕީއެސްޖީއާ ބައްދަލުކޮށް 1-0 އިން މެޗު ކާމިޔާބުކޮށްފި އެވެ.
ޕެރިހުގެ ޕާކް ޑެ ޕްރިންސް ސްޓޭޑިއަމްގައި ކުޅުނު މި މެޗުގައި ބޯޅަ ގިނަ ވަގުތު ހިފަހައްޓައި، މެޗު ކޮންޓްރޯލްކޮށް ކުޅުނީ ޕީއެސްޖީ އެވެ. ނަމަވެސް އެ ޓީމަށް ގޯލު ޖަހަން ލިބުނު ފުރުސަތުތައް ބޭކާރުވީ އެވެ. މެޗުގައި ޕީއެސްޖީން ފޮނުވާލި ނުވަ ޝޮޓް ލިވަޕޫލްގެ ކީޕަރު އެލިސަން ބެކާ ވަނީ މަތަކޮށްފަ އެވެ.
މެޗުގެ ފުރަތަމަ ހާފްގައި ޕީއެސްޖީގެ ކްވިޗާ ކްރަވަޝްކޭލިއާ ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން އޮފްސައިޑް ކަމަށް ނިންމި އެވެ. އަދި ދެވަނަ ހާފްގައި ލިވަޕޫލްގެ ޑިފެންޑަރު އިބްރާހިމާ ކޮނާޓޭ، ޕީއެސްޖީގެ ބްރެޑީ ބާކޮލާއަށް ފައުލުކުރި ކަމަށް ބެލެވުނު ހާދިސާއެއްގައި ވީއޭއާރް އިން ނިންމީ ޕެނަލްޓީއެއް ނޫން ކަމަށެވެ.
ލިވަޕޫލްގެ ކޯޗު ޖުރްގެން ކްލޮޕް އެ ޓީމަށް ގެނައި ބަދަލެއްގެ ހެޔޮ އަސަރު މެޗުގައި ފެނިގެން ދިޔަ އެވެ. ބަދަލު ކުޅުންތެރިޔެއްގެ ގޮތުގައި ކުޅެން އެރި ޑާވިން ނޫނޭޒް ދިން ބޯޅަ ހާވީ އެލިއަޓް ވަނީ މެޗުގެ 87 ވަނަ މިނެޓުގައި ޕީއެސްޖީގެ ކީޕަރު ޖިއަންލުއީޖީ ޑޮނަރުންމާ އަތުގައި ޖައްސާފައި ގޯލަށް ވައްދާލާފަ އެވެ.
މިއީ، ޕާކް ޑެ ޕްރިންސްގައި ޕީއެސްޖީއާ ދެކޮޅަށް ކުޅުނު ތިން މެޗުން ލިވަޕޫލް މޮޅުވި ފުރަތަމަ ފަހަރެވެ.
މި ދެ ޓީމު އަންނަ ހަފްތާގައި ދެވަނަ ލެގުގައި އެންފީލްޑްގައި ބައްދަލުކުރާނެ އެވެ. ލިވަޕޫލްގެ 1-0 ގެ ލީޑަކާއެކު ދެވަނަ ލެގަށް ދާނީ ކޮން ޓީމެއްތޯ ބެލުމަށް ގިނަ ބައެއްގެ ޝައުގުވެރިކަން ބޮޑެވެ.
