މަޝްހޫރު ޑައިރެކްޓަރު ފާތިމަތު ނަހުލާގެ ބިރުވެރި ފިލްމަށް ކަމުދާ ވަރުގެ ވަގު ބުޅަލަކަށް އިއުލާނުކޮށްފައި ވަނިކޮށް މިއޮތީ ނިކަން ވަގުބުޅައެއްގެ ވާހަކަ ފަޅާއަރައިފަ އެވެ. އެކަމަކު މި ބުޅާ، ނަހުލާގެ ތި ފިލްމެއްގެ ސެޓަކަށް ގެންގޮސްގެން އެއްގޮތަކަށް ވެސް ކަމުދާނެ ހެނެއް ހީއެއް ނުވެ އެވެ.
ސަބަބަކީ މި ބުޅަލެއްގެ ޝައުގުވެރިކަން މުޅިން އެހެން ކަމަކާ ގުޅިފައިވާތީ އެވެ. ގަބޫލުކުރަން ކިތަންމެ ދައްޗަށް، މިއީ ޖަންގިއާ ވަގަށް ނަގާ ބުޅަލެކެވެ. ވަކިން ހާއްސަކޮށް މި ބުޅާ އަދި ޝައުގުވެރިވަނީ ފިރިހެނުންގެ ޖަންގިޔަލަށެވެ. ކީއްވެގެންކަން ނުވަތަ އޭގެ ސަބަބަކީ ކޮބައިކަން އެނގޭ ހެއްޔެވެ؟
މިއީ އަންހެން ބުޅަލެކެވެ. ނަމަކީ ބްރިޖިޓް އެވެ.
މިދިޔަ ހަފުތާ އިން ފެށިގެން އިންޓަނެޓްގައި މަޝްހޫރުކަން ހޯދާފައިވާ މި ބުޅަލެއްގެ މި އާދަޔާހިލާފު ވާހަކައެއް ފަޅާއެރިއިރު އޭތި މި ވައްކަމެއްގައި އުޅޭތާ ދެ މަސްވެއްޖެ އެވެ. ވެރިމީހާ އަށް މިކަން ފަޅާއެރިއިރު ދެ މަސް ދުވަސް ތެރޭގައި ބްރިޖިޓް ވަނީ، ފިރިހެނުންނަށް ހާއްސަ 11 ޖަންގިއާއެއް ވަގަށް ނަގައިގެން ގެނެސް އޭތީގެ ސަރަހައްދުގައި ވަޅުލައިފަ އެވެ.
ފިރިހެނުންގެ ޖަންގިއާގެ އިތުރުން އިސްޓާކީނު ވެސް ވަރަށް ބައިވަރު "ކަޓުވާލާފައި" ހުއްޓެވެ. ވަގަށް ނަގާފައިވާ އިސްޓާކީނުގެ އަދަދު 50 އަށް ވުރެ މައްޗަށް އަރަ އެވެ.
އުމުރުން އަދި އެންމެ ހަ މަސްވީ މި ކުޑަކުޑަ ބުޅަލުގެ ވައްކަން ފަޅާއަރައިގެން ވާނުވާ ބަލައިލިއިރު އޭތި މި ހުރިހާ ފިރިހެން ޖަންގިޔަލެއް ގެއަށް ގެންނަނީ އޭތި ދިރިއުޅޭ އެޕާޓްމަންޓާ ޖެހިގެން ހުރި ފްލެޓަކުންނެވެ. ތަހުގީގުކޮށް މައްސަލަ ބެލިއިރު އެ ފްލެޓްގައި މުޅިން ވެސް ދިރިއުޅެނީ ފިރިހެނުންނެވެ.
ބްރިޖިޓްގެ ވެރިޔާ ސާރާ ނަތާން ބުނެފައި ވަނީ އޭނާގެ ބުޅަލަކީ ދޫންޏާއި އެފަދަ އެހެން ސޫފިތައް ފަހަތުން އުޅޭ ބުޅަލެއް ނޫން ކަމަށެވެ.
އެހެންވީމަ ނަހުލާ ކޮބައި ހެއްޔެވެ؟ ނަހުލާ ބުނަނީ ކީކޭތޯ ވެސް ބަލައިލަން ޖެހޭނެ ނޫން ހެއްޔެވެ؟
ޚަބަރު ލިބޭ ގޮތުން ވަގު ބުޅަލެއް ހޯދަން އުޅޭއިރު ނަހުލާ އަކީ ބުޅަލެއްގައި ފިރުމާލަން ވެސް ކެރޭ މީހެއް ނޫން ކަމަށްވެ އެވެ. އަދި އޭނާގެ ފިލްމުގައި އުޅޭ ގިނަ އެކްޓަރުން ވެސް ބުޅާ ދެކެ ވަރަށް ބިރުގަންނަ ކަމަށްވެ އެވެ.