މެލޭޝިއާއަށް ދަތުރުކުރާ ދިވެހިންނަށް އޮންއެރައިވަލް ވިސާ އިތުރުކޮށްދިނުމާ ގުޅޭ ގޮތުން ރައީސް އަބްދުﷲ ޔާމީން، މެލޭޝިއާގެ ބޮޑު ވަޒީރު އާ މަޝްވަރާކުރައްވައިފި އެވެ. މަޝްވަރާކޮށްފައިވަނީ އޮންއެރައިވަލް ވިސާ 90 ދުވަހަށް އިތުރުކުރުމާ ގުޅޭ ގޮތުންނެވެ.
މިކަމާ ގުޅޭ ގޮތުން މަޝްވަރާ ކުރެއްވީ މިއަދު މެލޭޝިއާގެ ބޮޑުވަޒީރު ޑާޓޯ ޝްރީ ހާޖީ މުހައްމަދު ނަޖީބު ބިން ޓުން ހާޖީ އަބްދުލް ރައްޒާގު މުހައްމަދު ނަޖީބު ރައްޒާއާއެކު، ރައީސް ޔާމީން ބޭއްވި ރަސްމީ ބައްދަލުވުމުގަ އެވެ.
އޮންއެރައިވަލް ވިސާ 90 ދުވަހަށް ބަދަލުކުރުމުގެ އިތުރުން ޑިޕެންޑަންޓް ވިސާގެ މައްސަލައަށް ރަނގަޅު ހައްލެއް ހޯއްދަވާދެއްވާނެ ކަމުގެ ޔަގީންކަން ވެސް ބޮޑު ވަޒީރު ވަނީ ދެއްވާފަ އެވެ.
މީގެއިތުރުން މެލޭޝިޔާގެ ގައުމީ ތެޔޮ ކުންފުނިން ރާއްޖެއަށް ތެޔޮ ވިއްކުމާއި މެދު ވިސްނަވާނެ ކަމަށްވެސް މެލޭޝިޔާގެ ބޮޑުވަޒީރު ވަނީ ވިދާޅުވެފަ އެވެ. ރައީސް، ބޮޑު ވަޒީރާއެކު ބޭއްވި ބައްދަލުވުމުގައި މެލޭޝިއާގައި ދިރިއުޅޭ ދިވެހިންނަށް ކަލްޗަރަލް ސެންޓަރެއް ގާއިމްކުރެއްވުމަށްވެސް މަޝްވަރާކޮށްފައިވެ އެވެ.
ރައީސް ވިދާޅުވެފައިވަނީ، މެލޭޝިޔާގެ ވިޝަން 2020 ސިޔާސަތު ރާއްޖެއިން ނަމޫނާ އަކަށް ބަލާނެ ކަމަށާއި ރާއްޖެ އާއި މެލޭޝިޔާ އާއި ދެމެދުއޮތް ޒަމާންވީ އެކުވެރިކަމުގެ ގުޅުން އެ މަނިކުފާނުގެ މި ދަތުރުފުޅުގެ ސަބަބުން އެތައް ތަނެއް އިތުރުވެއްޖެ ކަމަށެވެ.
ރާއްޖެއަކީ ކުޑަ ގައުމަކަށް ވާތީ ބައިނަލް އަގްވާމީ މައިދާނުގައި ތަފާތު ގޮންޖެހުންތަކާއި ކުރިމަތިލާންޖެހޭ ކަމަށާއި ކޮމަން ވެލްތު ފަދަ ޖަމިއްޔާތަކުގައި މިފަދަ ގައުމުތަކާއި ދޭތެރޭ ނުހައްގުން އަޅާ ފިޔަވަޅުތަކާއި ދެކޮޅަށް ބަސް ބުނުމަށް މެލޭޝިޔާގެ ބޮޑުވަޒީރުގެ ކިބައިން އެދިވަޑައިގެންނެވި އެވެ.
ރައީސް އަބްދުﷲ ޔާމީން
މެލޭޝިއާގެ އޮންއެރައިވަލް ވިސާ 90 ދުވަހަށް އިތުރުކުރަން މަޝްވަރާކޮށްފި
Mar 29, 2016
މެލޭޝިއާގެ ބޮޑު ވަޒީރާ ރައީސް ޔާމީން ބައްދަލުކުރައްވަނީ --