އެމްއެމްޕީއާރްސީގެ ހިޔާނާތުގެ ފައިސާ ލިބުނު މީހުން ހޯދަން ފަށައިފިން: އޭސީސީ

އެމްއެމްޕީއާރްސީ ހިޔާނާތާ ގުޅޭ ގޮތުން ކުރާ ތަހުގީގުގެ ފުރަތަމަ މަރުހަލާ ނިމިފައިވާ ކަމަށާއި މިހާރު ކުރިއަށް ދަނީ އެ ފައިސާ ލިބިފައިވާ ފަރާތްތައް ހޯދުމުގެ މަސައްކަތް ކަމަށް، އެންޓި ކޮރަޕްޝަން ކޮމިޝަން، އޭސީސީ އިން ބުނެފި އެވެ.

ގާތްގަނޑަކަށް 1.5 ބިލިއަން ރުފިޔާއަށް އަރާ އެ ހިޔާނާތާ ގުޅޭ ގޮތުން އޭސީސީ އިން ކުރިއަށް ގެންދާ ތަހުގީގާ ގުޅޭ ގޮތުން، އެ ކޮމިޝަންގެ ނައިބު ރައީސް މުއައްވިޒު ރަޝީދު މިއަދު، "އަވަސް" އަށް ވިދާޅުވީ 60 ރަށް ކުއްޔަށް ދިނުމުގައި ކަންތައްތައް ހިނގާފައިވާ ގޮތުގެ ތަހުގީގު މިހާރު ނިންމައި ރިޕޯޓް އެކުލަވާލުމުގެ ކަންކަން ކުރިއަށް ދާ ކަމަށެވެ. އެހެން ނަމަވެސް އެ ހިޔާނާތާ ގުޅޭ ދެވަނަ މަރުހަލާ ކަމަށްވާ، އެ ފައިސާ ދައުރުވެފައިވާ ގޮތް ހޯދުމަށް ކުރާ ތަހުގީގު މިހާރު ފަށައިގެން ކުރިއަށް ދާ ކަމަށް މުއައްވިޒު ވިދާޅުވި އެވެ. އޭނާ ވިދާޅުވި ގޮތުގައި އޭސީސީ އިން ނިންމާފައި ވަނީ ދެ ވަނަ މަރުހަލާ ވެސް ނިމުމުން ދެ ރިޕޯޓް އެކީގައި އާންމު ކުރުމަށް ކަމަށެވެ.

މުއައްވިޒު ވިދާޅުވީ އެމްއެމްޕީއާރުސީގެ ފައިސާ ލިބިފައިވަނީ ކޮން ބަޔަކަށްކަން ބެލުމަށް ހިންގައި ތަހުގީގުގައި ވަރަށް ގިނަ ބޭންކް އެކައުންޓްތަކުގެ ސްޓޭޓްމަންޓްތައް ވެސް ބަލައި އަންނަނީ ދިރާސާ ކުރަމުންނެވެ. އަދި އެ ސްޓޭޓްމަންޓްތަކަށް ބަލައި ވަރަށް ގިނަ ފަރާތްތަކާ ސުވާލުކުރަން ޖެހުން އެކަށީގެންވާ ކަމަށް މުއައްވިޒު ވިދާޅުވި އެވެ. އޭނާ ވިދާޅުވީ އެކަމާ ގުޅިގެން ސުވާލު ކުރަން ޖެހޭ ކޮންމެ ފަރާތަކާ އޭސީސީ އިން ސުވާލު ކުރާނެ އެވެ. އެއީ ރައީސުލްޖުމްހޫރިއްޔާއަށް ވީ ނަމަވެސް އޭސީސީ އިން ތަހުގީގުގައި ކުރަން ޖެހޭ ސުވާލެއް ކުރާނެ ކަމަށް ވެސް ވިދާޅުވި އެވެ.

ސުވާލު ކުރަން ޖެހޭ ވަކިވަކި މީހުންގެ ނަމެއް މުއައްވިޒު ހާމައެއް ނުކުރެއްވި އެވެ. މިހާރު ވެސް ބައެއް ފަރާތްތަކާ ސުވާލު ކުރިކަން އޭނާ ފާހަގަ ކުރެއްވި އެވެ.

"ފުރަތަމަ މަރުހަލާ ނިންމާލެއްވިއްޖެ. ދެން މި ދަނީ އެންމެ އުނދަގޫ މަރުހަލާ. އެއީ އެ ފައިސާ ލިބުނު ފަރާތްތަކަކީ ކޮބައިކަން ބެލުން. އެ ފައިސާ ދިޔަ ދިމާތައް ބެލުން. ބޭންކްތަކުން ސްޓޭޓްމަންޓް ލިބޭ ވަރަކުން އަދި ބޭންކްތަކުން އެއްބާރުލުން ދޭ ވަރަކުން އަޅުގަނޑުމެން މި އަންނަނީ އެކަން ބަލަމުން. ސީދާ މިވަގުތު އެ ފައިސާ ދިޔަ ދިމާތައް އަޅުގަނޑުމެންނަށް ހޯދޭނެއެކޭ ނޫން މި ދަންނަވަނީ. މައުލޫމާތު ލިބޭ ވަރަކުން އެ މުއާމަލާތްތައް ބަލައި އެ ފައިސާ ލިބުނު ފަރާތްތަކާ ވެސް އެކު އަޅުގަނޑުމެންގެ ރިޕޯޓް އާންމު ކުރާނީ،" މުއައްވިޒު ވިދާޅުވި އެވެ.

އޭނާ ވިދާޅުވީ ދެވަނަ މަރުހަލާގެ އުނދަގޫ ކަމާ ބޮޑުކަމުން ތަހުގީގު އަދި ނިންމާލެވޭނެ ދުވަހެއް ނޭނގެ އެވެ. އެހެން ނަމަވެސް އެކަމަށް އަދި ދުވަސްކޮޅެއް ނަގާނެ ކަމަށް އޭނާ ވިދާޅުވި އެވެ. މުއައްވިޒު ވިދާޅުވި ގޮތުގައި މިއީ މިހާރު ވެސް އެންމެ އިސްކަން ދީގެން އޭސީސީ އިން ހިންގާ ތަހުގީގެވެ. އެ ތަހުގީގަށް އޭސީސީގެ ވަރަށް ގިނަ ރިސޯސްތައް ހުސްކޮށްފައިވާ ކަން އޭނާ މިއަދުވެސް ފާހަގަ ކުރެއްވި އެވެ.

އޭސީސީ އިން މީގެ ކުރިން ބުނެފައިވާ ގޮތުގައި، މިއީ އެ ކޮމިޝަންގެ ތާރީހުގައި ވެސް ބަލައި އެންމެ ބޮޑު ހިޔާނާތުގެ މައްސަލަ އެވެ. އެ މައްސަލައިގައި އޭސީސީ އިން ގިނަ ބަޔަކާ ސުވާލު ވެސް ކޮށްފައިވެ އެވެ. އޭގެ ތެރޭގައި މަޖިލީހުގެ ބައެއް މެންބަރުން ވެސް ހިމެނިވަޑައިގަންނަވަ އެވެ. އަދި އިސްލާމިކް ބޭންކްގައި އޮތް ރައީސް އަބްދުﷲ ޔާމީންގެ ބޭންކް އެކައުންޓެއްގެ ސްޓޭޓްމަންޓްތަކެއް ވެސް އޭސީސީ އިން ވަނީ ހޯދައިފަ އެވެ.

އެމްއެމްޕީއާރުސީގެ މައްސަލައިގައި ތުހުމަތު ކުރެވިފައި ވަނީ ކުރީގެ ނައިބު ރައީސް އަހުމަދު އަދީބާއި އޭނާގެ ބޮޑު ބޭބެއެއް ކަމަށްވާ ހާމިދު އިސްމާއިލް، ހާމިދު ސޭޓު އަދި އެމްއެމްޕީއާރުސީގެ ކުރީގެ އެމްޑީ، އަބްދުﷲ ޒިޔަތުގެ މައްޗަށެވެ،. އެތިން މީހުންގެ މައްޗަށް އޭގެ ބައެއް މައްސަލަތަކުގައި ވަނީ ދައުވާ ވެސް އުފުލައިފަ އެވެ.