ރާއްޖޭގައި އެކިއެކި މިނިވަންކަން ނެތް ކަމަށް ބުނެ، ބޭރުގެ ފަރާތްތަކުން ކިޔަމުންދާ ފާޑުކިޔުންތަކަށް ރައްދުދީ ވާހަކަ ދައްކަން ޖެހެނީ ހަމައެކަނި ސަރުކާރުން ނޫން ކަމަށް ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ. ރައީސް ވިދާޅުވީ، ރާއްޖެއަކީ ސައްތައިން ސައްތަ މުސްލިމު ގައުމަކަށްވުމުން ބޭރުގެ ބައެއް ގައުމުތަކުން ރާއްޖެއާމެދު ނުރުހުންވާ ކަމަށެވެ.
މޯލްޑިވްސް އިސްލާމިކް ޔުނިވާސިޓީގެ ފުރަތަމަ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން ވިދާޅުވީ، އިސްލާމީ އުސޫލުތަކާ ހިލާފު އެއްވެސް ކަމަކަށް އެއްބަސްނުވާނެ ކަމަށާއި އެފަދަ ކަންކަމަށް ދައުލަތަށް ޕްރެޝަރުކުރާނަމަ އެކަމުގެ ދިފާއުގައި ނިކުންނަން ޖެހޭނީ ހަމައެކަނި ދައުލަތުން ނޫން ކަމަށެވެ. ޔުނިވާސިޓީ ފަދަ ތަންތަނުން ދިރާސާކޮށް، އިލްމީ ޖަވާބެއް އެފަދަ ފިއްތުންތައް ރާއްޖެއަށްކުރާ ފަރާތްތަކަށް ދޭން ޖެހޭ ކަމަށް ވިދާޅުވި އެވެ.
"އެ ބުނާ މިނިވަންކަމެއް ނެތިގެން އުޅޭއުޅުމަށް ޖަވާބުދޭނީ ހަމައެކަނި ސަރުކާރަކުން ނޫން، ޔުނިވާސިޓީގެ ބޯޑް ރޫމްތަކުން ޔުނިވާސިޓީގެ ކްލާސް ރޫމްތަކުން، ފެކަލްޓީތަކުގެ ޓީޗަރުންގެ ފަރާތުން ތަހިލީލީ ކަރުދާހެއްގެ ގޮތުގައި ނިކުންނަންޖެހޭ، އޭރުން މިފަދަ އިލްމީ މަރުކަޒެއްގެ ބޭނުން ފުރިހަމަ ގޮތުގައި ހިފިގެންދާނެ،" ރައީސް ވިދާޅުވި އެވެ.
"ގައުމުގެ ހަމަޖެހުމާއި ގައުމުގެ ކުރިއެރުމަކީ ހަމައެކަނި ސަރުކާރުގެ ޒިންމާއެއް ނޫން، ޝައްކެއް ވެސް ނެތް ގޮތުގައި އެންމެ ބޮޑު ޒިންމާއެއް އުފުލާ ބަޔަކީ އެއީ، އެހެން ނަަމެވެސް ދައުލަތުގެ ހަމަނުޖެހުން ގެއްލި ދައުލަތުގެ މަސްލަހަތު ގެއްލި، އަޅުގަނޑުމެން ގަބޫލުކުރާ އުސޫލުތަކާ އެތައް ކަމެއް ހިނގައިގެންދާއިރު އުފައްދަން ޖެހޭ ސުވާލަކީ މިއަދު ދަސްވެނިވި ކުދިންނާއި އެކުދިންގެ މުދައްރިސުންނާ މައްސަލަތަކުގައި މިފަދަ ހިޔާލު ތަފާތުވާ މައްސަލަތަކުގައި ހުދޫދުން ނެއްޓިގެންދާ ކަންކަމުގައި އަޅުގަނޑުމެން އެބަޖެހޭ ހައްގު ބަސް ބުނަން، މިއީ ތަރުބިއްޔަތުގެ ބޭނުމަކީ،"
ރައީސް ވިދާޅުވީ އިސްލާމް ދީނަށް ދަތިތަކާ ކުރިމަތިލާންޖެހޭ ސަބަބުން ދެނެގަންނަޖެހޭ ކަމަށެވެ. ނަސްލުތަކުގެ ތެރޭގައި ނުތަނަވަސްކަން އުފެދިފައިވާވާ ސަބަބާމެދު ވެސް ވިސްނަންޖެހޭ ކަމަށާއި ހަމަނުޖެހުން އުފެދޭއިރު އެއް ނަސްލާއި އަނެއް ނަސްލު އަދި އެއް ދީނާއި އަނެއް ދީން ހިޔާލު ތަފާތުވާ ސަބަބު ވެސް ހޯދަންޖެހޭ ކަމަށެވެ.
ޔުނިވާސިޓީން ދަސްވާ އެއްޗެހިތަށް ބޭނުންކޮށްގެން މިފަދަ ކަންކަން ދިރާސާކޮށް، ތަހުލީލުކުރާ ޖެހެން ކަމަށް ރައީސް ވިދާޅުވި އެވެ. އަދި ރާއްޖޭގެ އިސްލާމިކް ޔުނިވާސިޓީއަކީ އިލްމީ ދިރާސާތަކެއްކުރާ ޔުނިވާސިޓީއަކަށްވުމަކީ އެމަނިކުފާނު އެދިވަޑައިގަންނަވާ ކަމެއް ކަމަށް ވިދާޅުވި އެވެ.
މި ރަސްމިއްޔާތުގައި އެ ޔުނިވާސިޓީގެ 499 ދަރިވަރުން ދަސްވެނިވެފައިވެ އެވެ. މި ރަސްމިއްޔާތުގައި ދައުލަތުގެ ވަޒީރުންނާއި ޔުނިވާސިޓީގެ އިސް ބޭފުޅުން އަދި ދަރިވަރުންނާއި ބެލެނިވެރިން ބައިވެރިވި އެވެ.
އިސްލާމިކް ޔުނިވާސިޓީގެ ފުރަތަމަ ދަސްވެނިވުމުގެ ރަސްމިއްޔާތުގެ ތެރެއިން - އަވަސް ފޮޓޯ: އަހުމަދު ޝުރާއު