މިއަދު ދައްކަން އޮތީ ހިތް ހެޔޮކަމުގެ ވާހަކަ އެވެ. އެހެން ނަމަވެސް ހިތްދަތި ވާހަކައެއްވެސް މެ އެވެ. މޯލްޑިވިއަން އައިޑޮލްގެ ޝޯ އިން ބެލުންތެރިންނަށް ފެނިގެން ދިޔަ އަބުދުﷲ ސޯދިގު (ސޯދު) މުބާރާތާއި ވަކިވި ވާހަކަ އެވެ. މުޅި މުބާރާތުގައިވެސް އޭނާ އަކީ ހިތްހެޔޮ ކަމުގެ ނަމޫނާ އެކެވެ. އެސިފަޔާއެކު ސޯދު ވަކިވީ އެންމެން ރޮއްވާލާފަ އެވެ.
ހިތް ހެޔޮ ކަމުގެ އިތުރަށް ސޯދުގެ ފާހަގަކުރެވޭ އަނެއް ސިފަ އަކީ ލަވަކިޔުންތެރިޔާ ޝައްމު އާއި ވައްތަރުކަމަށް ދައްކާ ވާހަކައިން ނެވެ. އެއީ ހަމަ ދެވަނަ ޝައްމު އެވެ. އެހާވެސް ވައްތަރެވެ. މިއީކީ އަދި މިއަދުގެ މައުލޫއެއް ނޫނެވެ. ސޯދުގެ ސަޕޯޓަރުން އުފާވާ ކަހަލަ ވާހަކައަކުން ފަށައިގަންނަން އުޅޭށެވެ. އައިޑޮލް ޝޯ އާއި ސޯދު ވަކިވި ނަމަވެސް މިއީ ސޯދުގެ ކެރިއާގެ ނިމުނެއް ނޫނެވެ. ސޯދުގެ ކެރިއާ ފެށުނީ އެވެ. މިހާރަށްވުރެ އަލިގަދަކޮށް ލަވަޔާއި މިޔުޒިކްގެ ދުނިޔޭގައި ސޯދު ފިޔަޖަހައިގަންނަ ދުވަސްތައް ގާތް ވަނީ އެވެ. މިހާރުވެސް ފުރުސަތުތައް ލިބިފައި އެބަހުއްޓެވެ. އެހެން ނަމަވެސް މިފަދަ މުބާރާތަކުން ދެނެއް ސޯދުއެއް ނުފެންނާނެ އެވެ.
ކުރިންވެސް ބުނިހެން ސޯދު މީ ހިތްތިރި ކަމުގެ ނަމޫނާ އެއްވެސް މެ އެވެ. އަދި ކަންކަމާއި އުއްމީދު ކަނޑާލާ ކުއްޖެއްވެސް ނޫނެވެ. މި މުބާރާތާއި ސޯދު ކުރިމަތިލީ އެހާ ހިތްވަރާ އެކީ އެވެ. އޮޑިޝަނަށް ދިޔައިރު ހޮވޭނެ ކަމުގެ މާބޮޑު އުންމީދެއް ނެތަސް އައިޑޮލް ޝޯ އަށް ގޯލްޑެން ޓިކެޓު ލިބުމާއެކު ސޯދުއަށް އިތުރު ހިތްވަރެއް ލިބުނީ އެވެ. ޕިއާނޯ ރައުންޑު ނިމި ގާލާ ރައުންޑަށްވެސް ސޯދު އައީ ހިތްވަރާއެކު ސާބިތު ކަމާއެކީގަ އެވެ. އައިޑޮލްގެ ތަށި ލިބޭނީ އެންމެ ކުއްޖަކަށްކަން އެނގޭ އިރުވެސް ސޯދުގެ ހިތްވަރަށް ބަދަލެއް ނަ އެވެ. ޖެހިޖެހިގެން ތިން ރޭ ހޮޓް ސީޓަށް ދާން ޖެހުނީމަވެސް މުބާރާތުން ވަކިވާކަށް ސޯދު އުންމީދެއް ނުކުރެ އެވެ.
"އުންމީދެއް ނުކުރަން ކަޓާނެ ކަމަކަށް. އެންމެ ފަހު ވަގުތާ ޖެހެންދެން އުންމީދު ކުރިން. އެވަގުތު ޖެހުނީމަ އުނމީދު ކަނޑާލާނީ. އެކަމަކު ކޮންމެ ރެއަކުވެސް މެންޓަލީ ރެޑީވެގެން ހުންނަނީ ކަޓަން ޖެހިދާނެ ކަމަށް. މިހާ ހިސާބަށް އާދެވުމަކީވެސް ވަރަށް ބޮޑުވަރެއް. އަނެއް ރައުންޑަށް ދިޔައީމަ ދެން ވިސްނަނީ" ރޭގެ ޝޯ ނިންމާލާފައި އަވަސް އަށް ދިން އިންޓަވިއުއެއްގައި ސޯދު ބުނީ މިހެންނެވެ. ހިތްހެޔޮ ހިނިތުންވުމަކާ އެކީގަ އެވެ.
މޯލްޑިވިއަން އައިޑޮލް އާ އެކު ސޯދުގެ މުޅި ދިރިއުޅުންވެސް ބަދަލުވެއްޖެ އެވެ. ކުރިން އެއީ ކާކު ކަމެއް ނޭނގުނަސް މިހާރު އެއީ އެންމެންގެވެސް ފެވަރިޓެކެވެ. މަގުމަތިން ކުޑަކުދިންވެސް އަދި ބޮޑެތި މީހުންވެސް ސޯދު ފެނިއްޖެނަމަ ހީލާ ނުވަތަ ގޮވާލާ ހަދަ އެވެ.
ލަވަ ކިޔުމުގެ އިތުރަށް ހަލަބޮލިކަމާއި އާދަޔާހިލާފު ޑާންސް މޫވްތަކަކީ ސޯދު ކިބައިން ފެންނަ ފާހަގަކޮށްލެވޭ ހާއްސަ ސިފަ އެކެވެ.
ހަގީގަތަކީ މި މޫވްސްތަކަކީ އޭނާ ސީދާ މޯލްޑިވިއަން އައިޑޮލްއަކަށް ހާއްސަކޮށްގެން ދަސްކޮށްފައިވާ މޫވްސްތަކެއް ނޫން ކަމެވެ. ސޯދިގަކީ އޭނާގެ މުޅި ހަޔާތުގައި ނަށައި ސަކަރާތް ޖަހައި މީހުން ހެއްވާލަދިން ޒުވާނެކެވެ. އެންމެ ކުޑައިރު އޭނާ ރަށުގައި ސްޓޭޖު ޝޯ ދީ އުޅުނީ ޑަބިޔާ އާއި ހުސް ދަޅުފަދަތަކެތި އެއްކޮށްލައިގެން އުފެއްދި "ޑްރަމް ސެޓް" ބޭނުންކޮށްގެންނެވެ.
"އެއީ ސާސްކަފް ފެށުނު ހިސާބު. ދަޅުން ޑަބިޔާއިން ޑްރަމް ސެޓް ހަދައިގެން އެ ޑްރަމްސެޓް ވީލްބަރޯ އަކަށް ލައިގެން ރަށުގެ އެކި ހިސާބުގައި ޝޯ ދެމުން އޭރު ދާނީ. ރުފިޔާއަކަށް ލަވައެއް ކިޔަމުން އޭރު ދާނީ ތަނަކަށް މަޑުކޮށްލާފައި. އެގޮތަށް އަމިއްލަ އަށް ޑްރަމް ސެޓް ހަދައިގެން ރަށުގައި ހުންނާނެ ޝޯ ވެސް ދީފައި މީހުން އެއްވާވަރަށް،" ކުރިން އަވަސް އަށް ދިން އިންޓަވިއު އެއްގައި ސޯދު ބުންޏެވެ.
"ދަޅުން ޑްރަމް ހަދައިގެން ލަވަކިޔަން އުޅޭއިރު ވެސް ރަށުގައި ޝޯ ދޭން ދައުވަތު ލިބޭނެ. ޝޯގައި ސްމޯކް އަރުވާލާނީ ބޮނބިގަނޑުތަކުގައި އަލިފާން ރޯކޮށްލައިގެން. ވަރަށް ސަޕޯޓް ލިބޭނެ ދެން މިއުޒިކް ކުޅޭއިރު ޑަބިޔާ ޖަހަައިގެން. ވަރަށް ގިނަ މީހުން ވެސް އެއްވާނެ. އޭރު ސްޓޭޖު ހަދާފައި ހުންނާނީ ތެޔޮ ހުސްކުރި ބޮޑެތި ފީފާތައް ޖަހައިގެން."
މިމުބާރާތާއި ސޯދު ވަކިވެގެން ދިޔައީ އެތަކެއް ހަނދާންތަކެއްދީ އެތަކެއް ހަނދާނެއް ހިފައިގެންނެވެ. ލައިވް މިޔުޒިކާއެކު ކިޔާލެވުނު ތަކަކީ ދުވަހަކުވެސް ސޯދުގެ ހަނދާނުން ކައްސާލައިގެން ފުރޮޅިގެންދާނެ ލަވަތަކެއް ނޫނެވެ. މުބާރާތް ހިންގާ ޕީއެސްއެމާއި ޕާމްޓިއުންސް މިޔުޒިކް ބޭންޑާއި ހާއްސަކޮށް ޓީމް ސޯދގްގެ މެމްބަރުން އަދި ސޯދުއަށް ސަޕޯޓުކުރި ހުރިހާ މީހުންނަށް އަދި ވަކިން ހާއްސަކޮށް ސޯދު ވަޒީފާ އަދާކުރާ މިފްކޯ އަށް ސޯދު ހާއްސް ޝުކުރެއް އަދާކުރި އެވެ.