ކުރީގެ މެންބަރު އަހުމަދު ނާޒިމް ސިންގަޕޫރަށް ފުރާފައިވަނީ ޑިޕާޓްމަންޓް އޮފް ޕެނިޓެންޝަރީ އެންޑް ރިހެބިލިޓޭޝަން (ޑީޕީއާރްއެސް)އިން ދޫކުރި ޓްރެވެލް ޑޮކިއުމެންޓެއްގައި ކަމަށާއި ޕާސްޕޯޓެއް ނާޒިމަށް ދޫކޮށްފައި ނޯންނާނެ ކަމަށް އިމިގްރޭޝަނުން ބުނެފި އެވެ.
އިމިގްރޭޝަންގެ އިންފޮމޭޝަން އޮފިސަރު ހަސަން ހަލީލު އަވަސްއަށް މިއަދު ވިދާޅުވީ، ނާޒިމްގެ ޕާސްޕޯޓް އިމިގްރޭޝަނުން ދޫކުރި ކަމަށް ބުނެ ފަތުރާފައިވާ ހަބަރުތަކަކީ ހަގީގަތެއް ނެތް ވާހަކަތަކެއް ކަމަށެވެ. ނާޒިމްގެ އަތުގައި ޑީޕީއާރްއެސްއިން ދޫކުރި ޓްރެވެލް ޑޮކިއުމެންޓްގެ އިތުރުން އެހެން އެއްވެސް ޓްރެވެލް ޑޮކިއުމެންޓެއް ނޯންނާނެ ކަމަށް ހަލީލު ވިދާޅުވި އެވެ.
ހަލީލު ވިދާޅުވީ، ނާޒިމްގެ ޕާސްޕޯޓް އިމިގްރޭޝަނުގައި އޮތްތޯ ބެލުމަށް، އެންޓި ކޮރަޕްޝަން ކޮމިޝަނާއި ފުލުހުން އިމިގްރޭޝަންގެ ތިޖޫރީ ބަލާ ފާސްކޮށް، ބައެއް ލިޔެކިޔުންތައް ގެންދިޔަ ކަމަށް ބުނާ ވާހަކައަކީ ދޮގެއް ކަމަށާއި، އެފަދަ ކަމެއް ހިނގާފައިނުވާ ކަމަށެވެ. އަދި އިމިގްރޭޝަންގައި ކަންކަން ހިނގަމުންދަނީ އުސޫލާ އެއްގޮތައްތޯ ބެލުމަށް ހާއްސަ ސެކްޝަނެއް އުފައްދާފައިވާ ކަމަށާއި ކަމެއް ގޯސްކޮށް ހިނގާނަމަ އެހެން ބަޔަކު އެކަން ތަހުގީގުކުރުމުގެ ކުރިން އިމިގްރޭޝަންގެ އެ ސެކްޝަނުން އެ މައްސަލައެއް ބަލާނެ ކަމަށެވެ.
އޭސީސީއިން އިމިގްރޭޝަން ބަލާ ފާސްކުރި ކަމަށް ދެކެވޭ ވާހަކަތައް އެ ކޮމިޝަންގެ ރައީސް ހަސަން ލުތުފީ ވެސް ވަނީ ދޮގުކުރައްވާފަ އެވެ. ލުތުފީ މިއަދު ވިދާޅުވީ، އިމިގްރޭޝަންގެ އިދާރާ ބަލާ ފާސްކޮށްފައިނުވާ ކަމަށެވެ.
ހަލީލު ވިދާޅުވީ، ނާޒިމް ރާއްޖެއިން ބޭރަށް ގޮސް، އެހެން ގައުމަކަށް ދިޔުމަކީ އިމިގްރޭޝަނަށް ބާރު ފޯރުވޭނެ ކަމެއް ނޫން ކަމަށާއި ރާއްޖެ ބޭރުވުމަށްފަހު އެމީހަކަށް ބޭނުން ގައުމަކަށް ދަތުރުކުރުމުގެ ފުރުސަތު އޮންނާނެ ކަމަށެވެ. އަދި ނާޒިމް ސިންގަޕޫރުން އިނގިރޭސިވިލާތަށް ދިޔަތޯ ބެލުމަށް ކަރެކްޝަނުން ސިޓީއެއް ފޮނުވާފައިވާ ކަމަށާއި އެކަން މިހާރު ފޮރިން މިނިސްޓްރީއާ ގުޅިގެން ބަލަމުންދާ ކަމަށެވެ.
ނާޒިމް އިނގިރޭސިވިލާތަށް ދިޔަތޯ ފޮރިން މިނިސްޓްރީން ވެސް މިހާރު ދަނީ ބަލަމުންނެވެ.
މީޑިއާގައި ނާޒިމް އިނގިރޭސިވިލާތަށް ދިޔަ ކަމަށް އަޑުތައް ފެތުރިފައިވީ ނަމަވެސް ނާޒިމްގެ ފަރާތުން މިކާ ގުޅިގެން އެއްޗެއް ވިދާޅުވެފައެއް ނުވެ އެވެ. ނާޒިމް ވަނީ ބޭސްފަރުވާގެ މުއްދަތު އިތުރުކޮށްދިނުމަށް އެދިފަ އެވެ. ނަމަވެސް ކަރެކްޝަންސްއިން ވަނީ މުއްދަތު އިތުރުކޮށް ނުދީ، ނާޒިމް އަނބުރާ ރާއްޖެ އައުމަށް އަންގާފަ އެވެ.
އެ އެންގުމާ ގުޅިގެން ކަރެކްޝަންސްއަށް ނާޒިމް ފޮނުއްވި ސިޓީގައި ވިދާޅުވެފައިވަނީ، ކަރެކްޝަންސްއިން އެންގި ނަމަވެސް ބޭސްފަރުވާގެ މުއްދަތު ހަމަނުވަނީސް ރާއްޖެ ނާންނާނެ ކަމަށެވެ. މުއްދަތު ހަމަވުމުން ވެސް ރާއްޖެ ނާންނާނެ ކަމަށް ނާޒިމް ވިދާޅުވުމުން އެކަމާ ގުޅިގެން އަޅާނެ ފިޔަވަޅެއް އަދި ނުނިންމާ ކަމަށް ކަރެކްޝަންސްއިން ބުނެފައިވެ އެވެ.
ރާއްޖެ އައުމަށް ނާޒިމް ދެކޮޅު ހަދާފައިވާއިރު، ނާޒިމްގެ މައްޗަށް ދައުލަތުން އުފުލާފައިވާ ދައުވާތަށް ވަނީ އަނބުރާ ގެނެސްފަ އެވެ.
ކުރީގެ މެންބަރު ނާޒިމް ---