ބްރިޖް ސައިޓް އަންތަރީސްވާހާ ހިތްފަސޭހަ!

ވެރިރަށް މާލޭގެ އިރުމަތީ ފަރާތަށް އެހެންޏާ ފަތިސްވެ އަލިވިލެނީ ރާޅު ޖަހާ އަޑަށެވެ. ނަމަވެސް އިރުމަތީ ފަރާތަށް އަލި ވިލޭ އިރު އިވެނީ ޗައިނާގެ ސީސީސީސީ ކުންފުނީގެ މުވައްޒިފުން މަސައްކަތް ފަށަން ނުކުމެ ޖުންފައިގައި ހިނގާ އަޑަށާއި ބޮޑެތިހާ ދަގަނޑު ހޮޅުތައް ފުރޮޅާ އަޅާއި ކަނޑުގެ އަޑިއަށް ގަންނަވާލާ އަޑެވެ. ރާއްޖޭގެ ތާރީހުގައި ރަން އަކުރުން ލިޔެވޭނެ މެގާ ޕްރޮޖެކްޓް ބާރަށް މިއޮށް ދަނީ އެވެ. ޗައިނާ-މޯލްޑިވްސް ފްރެންޑްޝިޕް ބްރިޖުން ގުޅުވައިދެނީ ހަމައެކަނި މާލެއާ ހުޅުލެއެއް ނޫނެވެ. މިއީ ޗައިނާ އާއި ރާއްޖޭ އެކުވެރިކަމުގެ ވަރުގަދަ ގުޅުމަކުން ގުޅައިލެވޭ ވެސް ބްރިޖެކެވެ.

ބްރިޖްގެ މަސައްކަތް ބާރަށް ކުރިޔަށްދާއިރު މާލޭގެ މަގުމަތިން އޮރެންޖް ކުލައިގެ ކޯޓު ހެދުމުގައި ޗައިނާ މީހެއް ފެނިއްޖެ ނަމަ އެއީ ބްރިޖްގެ މަސައްކަތް ކުރާ ސީސީސީސީ ކުންފުނީ މީހުންކަން އެންމެނަށް އެނގެ އެވެ. އެންމެވެސް އެމީހުންނާ ދިމާއަށް ބަލައިލަނީ ބްރިޖް އަޅާ މީހުންގެ ގޮތުގަ އެވެ. ރާއްޖޭގެ އިގްތިސޯދާއި ތަރައްގީއަށް އިންގިލާބީ ބަދަލެއް ގެނައުމަށް އެމީހުން ކުރާ މަސައްކަތް ބަލައިގަންނަމުންނެވެ.

ވާހަކަ ދިގުވެފައި އޮތް ބްރިޖްގެ ހުވަފެން ހަގީގަތަކަށްވަމުން ދަނީ އެވެ. ދިވެހިން ދަނީ ތަޖުރިބާކޮށްލަން އިންތިޒާރު ކުރަމުންނެވެ. ބަަލަމުންދަނީ ޗައިނާގެ މީހުންގެ އަޖައިބު ކުރުވަނި މަސައްކަތެވެ.

ޗައިނާގެ ސީސީސީސީގެ މަސައްކަތްތެރިން ރާއްޖޭގައި ބްރިޖްގެ މަސައްކަތާއެކުވެ ދެ އަހަރަށް އުޅެން ޖެހޭ އިރު، ރާއްޖޭގައި އެމީހުންގެ ދިރިއުޅުން ހުރި ގޮތް ބަލައިލަން އަވަސްގެ ނޫސްވެރިން ވަނީ ސީސީސީސީގެ ސައިޓްތަކަށް ވަދެފައެވެ. މިއީ ސީސީސީސީ އިން ރާއްޖޭގެ ނޫހަކަށް އަދި ނޫސްވެރިންނަށް ދިން މިފަދަ ފުރަތަމަ ފުރުސަތެވެ.

ސީސީސީސީ މަސައްކަތްތެރިންގެ ދިރި އުޅުމާއި ބްރިޖު އަޅަން ކުރާ މަސައްކަތް ސައިޓު ތެރެއަށް ވަދެ ގާތުން ބަލައިލެވުނު އިރު އެތައް މަންޒަރެއް ފެނުނެވެ. ބައިވަރު ހިޔާލުވެސް ހިތަށް ވަނެވެ. އެންމެ ފުރަތަމަ ވެސް ހިތަށް އެރި އެއްޗަކީ ޗައިނާ ކިޔައިފި ނަމަ އާންމުކޮށް "ފޭކް" އޭ ބުނާ ވާހަކަ އެވެ. ޗައިނާގެ މީހުންގެ މަސައްކަތުގެ ކޮލިޓީއަށް ޝައްކު އުފައްދާ ވާހަކަ އެވެ.

މި ހިޔާލުތަކެއްގައި ބްރިޖް ސައިޓުގެ އޮފީސް އިމާރަތްތަކަށް ވަދެވުމާއެކު އެމީހުނާމެދު ދެކޭ ގޮތް މުޅިން ބަދަލުވެއްޖެ އެވެ. މިއީ އެއްގޮތަކަށް ވެސް ފޭކޭ ބުނެވޭ ވަރުގެ ބައެއް ނޫނެވެ.

ބްރިޖު އެޅުމުގެ އިދާރީ ހުރިހާ މަސައްކަތް ކުރާ އޮފީސްތައް އަތުރާލާފައި ހުރި ގޮތުން ހީވީ ރާއްޖޭގެ އެންމެ ބޮޑު އޮފީސް އެކުވެނި ވެލާނާގޭގެ އޮފީސްތަކުގެ ތެރޭގައި އުޅެވޭ ހެނެވެ. ރީޗަށް އަތުރާލައި ފެންވަރުގައި ރެޑީކޮށް މަސައްކަތް ހިނގަ ހިނގާ ހުރި އޮފީސްތަކެކެވެ. އިތުރަށް އަޖައިބުވާން ޖެހުނީ އެމީހުންގެ ފެންވަރު ދައްކާލާފައި ވަނީ ހަމައެކަނި އޮފީސް އިމާރާތްތަކުން އެކަނި ނޫން ކަމަށް ވެގެނެވެ. މަސައްކަތް ކުރާ އުސޫލާއި ގަވައިދުތައް ހަރުކައްޓެވެ، ތަރުތީބު ވެފައި މަސައްކަތް އެހާމެ ހަރުދަނާ އެވެ. އެކަން ފާހަގަވީ ސައިޓަށް ވަން ތަނުން ބައްދަލު ކުރެއްވި ސީސީސީސީ ކުންފުނީގެ ކޮމާޝަލް ޑިޕާޓްމަންޓުގެ އިސްކޮށް އުޅުއްވާ ޖެސީއާ ދިން އިރުޝާދު ތަކުންނެވެ.

"އަޅުގަނޑުމެން ކުންފުނިން މަސައްކަތް ކުރަނީ ވީހާވެސް އަވަހަކަށް ނަމަވެސް އެންމެ ކޮލިޓީ ފެންވަރުގެ މަސައްކަތެއް މުވައްޒިފުން ލައްވާ ކުރުވަން. މި ސަރަހައްދު [އޮފީސް ސައިޓް] ގައި އުޅޭނީ ހުރިހާ އިދާރީ މަސައްކަތް ކުރާ ބޭފުޅުން. އަޅުގަނޑުމެންވެސް އަދި ސައިޓުގައި މަސައްކަތް ކުރާ މީހުންވެސް ހެނދުނު 6:00 ހާއިރު މަސައްކަތް ފަށައި 11:00 ހާއިރު ބްރޭކް ނަގާނެ. ދެން އަނެއްކާވެސް 2:30 އިން 6:30 އަށް ހުއްޓާނުލައި މަސައްކަތްތައް ކުރާނެ،" ޖެސީ ވިދާޅުވި އެވެ.

ހަގީގަތަކީ ޗައިނާ މީހުންގެ މަސައްކަތުގެ ރޭޓު މަތިކަމެވެ. އެމީހުން މަސައްކަތު ވަގުތަކަށް އެކަނި ބަލާލިޔަސް އެ ހަރުދަނާ ސިފަތައް އެބަ އެނގެ އެވެ. މި ވާހަކަތައް އިވުމުން ހިސާބަކަށް ލަދު ގަތެވެ. އިދާރީ މަސައްކަތުގައި އެމީހުންގެ ތަރުތީބު ކަމެވެ. ފަރުވާ ބެހެއްޓުމާއި ޝައުގުވެރި ކަމެވެ. މަޝްވަރާ ކުރުމާއި އަޑު އެހުމެވެ. އެ މީހުންގެ މަސައްކަތުގެ އަހުލާގާއި ކުރާ މަސައްކަތުން އަވަސް ނަތީޖާ ނެރުމަށް އެކުވެ ސައްލާކޮށްގެން ކުރާ މަސައްކަތް ފެނުނު އިރު އެ އަހުލާގު ދިވެހިންގެ ގައިައި ހަރުލާފައި ނެތީ ކީއްވެގެންތޯ އަމިއްލަ ނަފުސަށް ވެސް ސުވާލު އުފެދުނެވެ.

ޖެސީގެ ތައާރަފްއަކަށް ފަހު "އަވަސް"ގެ ޓީމާއި ހަވާލުވީ ޓުއާ ގައިޑެކެވެ. އޭނާ އަކީ ކޮމާޝަލް ޑިޕާޓްމަންޓުގައި މަސައްކަތް ކުރާ ބޭފުޅެކެވެ. ނަމަކީ އެލެކްސް އެވެ.

އަަރެމެނަށް އޮފީސް އިމާރަތްތަކާއި މަސައްކަތާއި ރޭވުންތަކާއި ފާޑުވެރިކަން ދައްކާލުމަށް ފަހު އެލެކްސް މިސްރާބު ޖެހީ ކުންފުނީގެ ލޭބަރުން ދިރިއުޅޭ ހިސާބަށެވެ. ކުޑަ ތަންކޮޅަކަށް ހިނގާލުމާއެކު އެހެރަން ފެންނަން ފެށީ ހީވެސް ނުކުރާ ކަހަލަ މަންޒަރެކެވެ.

ކުރީގެ އުސްފަސްގަނޑުގެ ބޭރު ތޮށިގަނޑު ކައިރީގައި ފަނުން ހިޔާކޮށް ފެންވަރުގައި ހަދައިފާ ހުރި ހޮޅުއަށިތަކެކެވެ. ހިފި ނުހުރެވިގެން އެ ދިމާލަށް ބާރަށް ހިނގައި ގަނެ ހޮޅުއަށީގައި ހަދައިފައި ހުރި ޖޯއްޔެއްގައި އިށީނދެލީމެވެ. ހީވީ ރާއްޖެތެރޭ ރަށަކަށް ދެވުނު ހެނެވެ. ލޯ މަތިން ކުދި ރާޅުތައް ބާންޏާއެކު ނަގަމުންދާއިރު މޫނު މައްޗައް ޖެހެނީ ހިއްފަސޭހަ ވައެވެ. ކުޑަ އިރުކޮޅަކު އެތާނގައި މަޑުކޮށް ހިތް ހަމަޖައްސާލުމަށް ފަހު އެލެކްސްއާ ސުވާލުކޮށްލުމުން އޭނާ ވިދާޅުވީ އެއީ ކުންފިނީ މުއައްޒިފުން ފޫހި ފިލުވާލަން ދާ މައިޒާ ކަމަށެވެ.

"މިއީ އަހަރުމެންނަ ވެސް ވަރަށް ހިންހަމަޖެހުން ލިބޭ ތަނެއް. ބްރިޖު އެޅުމުގެ ބުރަ މަސައްކަތައް ފަހު ވަރުބަލިވެގެން އައިސް އަރާމުކުރަން މިތާގައި އުޅޭނީ. ބޭރުން މި ފެންނަ މަންޒަރު ވެސް އެހާމެ ނަލަ. މިއީ މުވައްޒިފުންނަށް ސައިޓުން އެންމެ ފޭވަރިޓް އެއްތަން،" އެލެކްސް ވިދާޅުވި އެވެ.

ހަގީގަތުވެސް އަޖައިބުވި އެވެ. ވަރަށް ހިއްގައިމެވެ. ކޮންމެއަކަސް ޓުއާ ގައިޑްގެ އިރުޝާދާއި އެކު ކުރިޔަށް ހިނގައިގަތީމެވެ. ދެން ފިޔަވަޅު އެޅީ ކުޑަވަރެއްގެ ޗައިނާ ޓައުން އަކަށެވެ. ބްރިޖު އަޅައި މުވައްޒިފުން ދިރިއުޅުމަށް ހުރި ގެތައް ހުރި ހިސާބެވެ.

ފައިވް ސްޓާ އެކޭ ނުދެންނެވޭނެވެ. ނަމަވެސް ދެ އަހަރަށް ވަގުތީ ހިޔާގައި އުޅޭ ބަޔަކާއި ބަލާފައި މިއީ އަރާމު ދިރިއުޅުމެއް އުޅެވޭ ފެންވަރަށް ހަދާލާފައިވާ ތަންތަނެވެ. އެތާނގައި ޗައިނާ މީހުން ދިރިއުޅެމުންދަނީ ވަރަށް ހަމަޖެހިލައިގެން ވަރަށް އަރާމުގަ އެވެ. އެހެން ގައުމަކަށް އާދެވިގެން އުޅޭ ބައެއް ހެނެއް ހީނުވެއެވެ. ރާއްޖޭގައި ޗައިނާ ޓައުން އަޅައި، އަމިއްލަ ގައުމުގައި އުޅޭހައި ހަމަޖެހިލާގެން އެމީހުން ތިއްބެވެ.

"އަޅުގަނޑުމެންގެ ކުންފުނީ މީހުން ރާއްޖޭގައި ދިރި އުޅެނީ މިތާ. ކޮންމެ 100 އެއްހާ މީހުނަށް ހައުސިން ޔުނިޓެއް އަމިއްލައަށް އަޅައިގެނއް އެތާ ދިރި އުޅެނީ މިއިން ކޮންމެ ކޮޓަރިއެއް ގާތްގަނޑަކަށް 15 ފޫޓު 15 ފޫޓު ވާނީ. ދެން ކޮންމެ ކޮޓަރި އެއްގައި ބަންކު ބެޑު ޖަހައިގެން އުޅޭނީ ހަ މީހުން،" އެލެކްސް ވިދާޅުވި އެވެ.

ކޮންމެ އަކަސް ޗައިނާ މީހުންގެ ބޯހިޔާވެހިކަން ވަނީ ފެންވަރުގައި ހަމަޖައްސައިފައެވެ. ދެން އޮތީ އެމީހުން ބަނޑުހައި ހޫނުކަން ފިލުވުމެއްވެ. ޗައިނާ މީހުންނަކީ ކެއުމާއި ކެއްކުމުގައި ދުނިޔެ ފެންވަރުގައި ވެސް ތަފާތު ބައެެކެވެ. ތަފާތު މަންޒަރެއް ފެންނާނެ ކަމަށް އެތާންގައި ހަދައިފައި ހުރި ކެންޓީނަށް ވަދެލީމެވެ. ވަރަށް ފައްކަލެވެ. އަސްތާ، އަޑުގަދައީ ބަދިގެ ފަޅީގައެވެ. ގޮސް ބޯދިއްކޮށްލުމުން ތަފާތު ކެއުންތައް ކައްކާ ތަން ފެނުނެވެ. ބޮޑެތިހާ ތެލިތަކުގެ ކައިރީ ޝެފުން ތިބީ ސީސީސީސީ ކުންފުނީގެ 500 އަށް ވުރެއް ގިނަ މުވައްޒިފުން ބުނި އެއްޗެއް ކައްކަން ތައްޔާރަށެވެ. މިއީ ބްރިޖު އަޅައި ބައެއް ނޫނެވެ. ކައްކާ ކާން ދިނުމުގެ ޗައިނީސް އެކްސްޕާޓުންނެވެ.

ބްރިޖު އަޅައި މީހުން ކައިރީ ހޭދަ ކޮށްލެވުނު މި ކުޑަ ވަގުތު ކޮޅުންވެސް އެނގިގެން ދިޔައީ ޗައިނާ މޯލްޑިވްސް ފްރެންޑްޝިޕް ބްރިޖު އަޅަން ހަވާލު ކުރީ އިތުބާރު ކުރެވޭ ބައެއްގެ އަތް މައްޗައް ކަމަށެވެ. މަސައްކަތުގެ އަހުލާގު ހުރި ބައެއްގެ އަތަށް ކަމެވެ.

ސީސީސީސީއަކީ ދުނިޔޭގެ މިފަދަ އަދި މިއަށް ވުރެއް ބޮޑެތި އެތައް ބްރިޖެއް އަޅައިފައިވާ ކުންފުންޏެކެވެ. އެމީހުނަށް އާ ކަމަކަށް ނުވެދާނެ އެވެ. ނަމަވެސް ދިވެހިންނަށް ވަރަށް އަލެވެ. ދިވެހިން މި އަހުލާގު ދަސްކުރަން ޖެހެ އެވެ.