އިއްޔެ އިކުއިޑޯއަށް އައި ބިންހެލުމުގައި މަރުވި މީހުންގެ އަދަދު 272 އަށް އަރައިފި އެވެ. މިހާދިސާގައި ޒަހަމްވި މީހުންގެ އަދަދު 1،500 އަށް އަރާފަ އެވެ. މިއީ ފަހުގެ ތާރީހެއްގައި އިކުއިޑޯއަށް މިހާވަރުގަދަ ބިންހެލުމެއް އައި ފުރަތަމަ ފަހަރެވެ.
މި ހާދިސާގައި ގެއްލުން ލިބުނު ސަރަހައްދުތަކުގައި މީހުން ސަލާމަތް ކުރުމުގެ މަސައްކަތް އެގައުމުގެ ފުލުހުންނާ ސިފައިން ކުރަމުންދާއިރު އަދިވެސް މަރުވި މީހުންގެ އަދަދު އިތުރުވާނެ ކަމަށް ބެލެވޭ ކަމަށް އޮފިޝަލުން ބުނެ އެވެ.
އިކުއިޑޯގެ ރައީސް ރަފައިލް ކޮރޭ މިހާރުވަނީ މިހާދިސާ އާ ބެހޭގޮތުން މަޝްވަރާކުރުމަށް އިޓަލީއަށް ވަޑައިގަންނަވާފަ އެވެ. މި ބިންހެލުމާއި ގުޅިގެން އިކުއިޑޯގެ ހަ ޕްރޮވިންސަކަށްވަނީ ކުއްލި ހާލަތު އިއުލާނުކޮށްފަ އެވެ.
"ހުރިހާ އިމާރާތްތަކާއި މަގުތައް އަލުން އިމާރާތްކުރެވިދާނެ، އެކަމަކު ރިކަވާއެއް ނުކުރެވޭނެ. އެންމެ ހިތްދަތިވާ ކަމަކީ އެއީ" ކުއްލި ހާލަތު އިއުލާނު ކުރައްވަމުން ރައީސް ރަފައިލް ވިދާޅުވި އެވެ.
އިކުއިޑޯ ސަރުކާރުގެ އިސް އޮފިޝަލުން ބުނަނީ މީހުން ސަލާމަތްކުރުމުގެ މަސައްކަތް ކިތަންމެ ބާރަށް ގެންދަން ބޭނުންވިއަސް އެއްވެސް ކަހަލަ މެޝިނަރީއެއް ބޭނުންކުރެވެން ނެތް ކަމަށެވެ. އަދި އެއީ ޒަހަމްވެފައި ތިބި މީހުންނަށް އިތުރަށް އަނިޔާއެއް ނުވަތަ ގެއްލުމެއް ލިބިދާނެތީ ކަމަށެވެ.
ކާބޯތަކެއްޗާއި ޒަރޫރީ ބޭނުންތަކަށް ބޭނުންވާ ތަކެތި ފޯރުކޮށްދިނުމަށް މެކްސިކޯ އަދި ވެނެޒުއޭލާއިން ދަނީ މަސައްކަތް ކުރަމުންނެވެ. އަދި މީގެ އިތުރުން ކޮލަމްބިއާއިންވެސް ވަނީ ރެސްކިއު ޓީމްތަކާއި ކުއްތާ އަދި ބޯފެން ފޯރުކޮށްދިނުމުގެ މަސައްކަތް ކުރަމުން އަންނަ ކަމަށް ބުނެފަ އެވެ.
ބިންހެލުމާއި ގުޅިގެން އެގައުމުގެ ބޮޑު ސަރަހައްދަކުން ވަނީ ކަރަންޓު ކެނޑިފަ އެވެ. ބިންހެލުމާއި ގުޅިގެން އިކުއެޑޯ އާއި އެގައުމުގެ ކައިރި ބައެއް ގައުމުތަކަށް ސުނާމީގެ އިންޒާރު ދިން ނަމަވެސް މިހާރު ވަނީ ސުނާމީގެ އިންޒާރު ކެންސަލް ކޮށްފަ އެވެ.
ބިންހެލުމުގައި ގެއްލުން ލިބުނު ސަރަހައްދުތައް ބަންދުކޮށް އެހެން ހިސާބުތަކަށް ވަގުތީ ގޮތުން ބަދަލުވާން އެގައުމުގެ އިންޓީރިއާ މިނިސްޓްރީން ވަނީ އަންގާފަ އެވެ. އެމިނިސްޓްރީ އާއި ހަވާލާދީ ރިޕޯޓުތައް ބުނަނީ އެގޮތަށް އެންގީ އަނެއްކާވެސް އެސަރަހައްދުތަކަށް ބިންހެލުމެއް އައުމުގެ ފުރުސަތު އޮވެދާނެ ކަމަށެވެ. އަދި އެފަދަ ކަމެއް ނޫޅޭންޏާ 72 ގަޑިއިރު ފަހުން އަނެއްކާވެސް އެސަރަހައްދުތަކަށް މީހުންނަށް ބަދަލުވެވޭނެ ކަމަށެވެ. އިކުއެޑޯގެ ހުރިހާ މޯބައިލް އޮޕަރޭޓަރަކުން ވަނީ ހިލޭ ޓެކްސްޓް މެސެޖް ފޮނުވޭ ގޮތް ހަދާފަ އެވެ.
1987 ވަނަ އަހަރުވެސް އިކުއެޑޯއަށް ވަނީ 7.2 މެގްނިޓިއުޑްގެ ބިންހެލުމެއް އައިސްފަ އެވެ. އެހާދިސާގައި ހާހެއްހާ މީހުން މަރުވި އެވެ.