މި މަހުގެ 18 ވަނަ ދުވަހު ބާއްވާ ސްވިމިން އެސޯސިއޭޝަނުގެ އިންތިހާބުގައި އެ އެސޯސިއޭޝަންގެ އިސް މަގާމުތަކުގެ ތެރެއިން ކޮންމެ މަގާމަށް ވެސް އެންމެ ބޭފުޅަކު ކުރިމަތިލައްވައިފި އެވެ.
އެސޯސިއޭޝަނުގެ ރައީސްގެ މަގާމަށް ކުރިމަތިލެއްވީ މުހައްމަދު އަބުދުއްސައްތާރެވެ. ނާއިބް ރައީސް ކަމަށް ކުރިމަތިލެއްވީ ގިނަ ދުވަސްތަކެއްވަންދެން ޖެނެރަލް ސެކްރެޓަރީގެ މަގާމު ފުރުއްވި މިހާރުގެ ވެސް ނާއިބް ރައީސް އިސްމާއީލް އަލީ އެވެ. ހަޒާންދާރަށް އަލީ ޝަމީމް ކުރިމަތިލެއްވިއިރު ކުލަބުތަކުން ހޮވާ މެމްބަރަކަށް ކުރިމަތިލެއްވީ އަހުމަދު ފަޔާޒެވެ. މިއީ މިހާރު ވެސް އެ މަގާމުތައް އަދާކުރައްވާ ބޭފުޅުންނެވެ.
މި އިންތިހާބުގައި ހޮވަންޖެހޭ އަދަދަށްވުރެ ގިނަ މީހުން ކުރިމަތިލާފައިވަނީ އިންޑިވިޖުއަލް މެމްބަރުންގެ ކެޓަގަރީ އަށެވެ. އިންޑިވިޖުއަލް މެމްބަރުންގެ ކެޓަގަރީ އަށް ހޮވަންޖެހޭ ތިން މަގާމަށް ހަތަރު ފަރާތަކުން ވާދަކުރެ އެވެ. އެއީ އާދިލް ރަޝީދާއި ހައްސާން ސިރާރާއި މުހައްމަދު ސަމީރު އަދި ޔާމީން ފައިސަލް އިބްރާހީމެވެ.
މި އިންތިހާބުގައި 73 ފަރާތަކުން ވޯޓުލާނެ އެވެ. މީގެ ތެރޭގައި ފަސް ކުލަބެއް ވެސް ހިމެނެ އެވެ. އެއީ ރިއަލް ޓީ ސްޕޯޓްސް އާއި ޓީނޭޖް ބޯއީސް އާއި މޯލްޑިވްސް ލައިފްގާޑް އެސޯސިއޭޝަނާއި ނާޑް ސްޕޯޓްސް އަދި ނިއު ލެގޫންސް ސްވިމިން ކުލަބެވެ.
