މިހާރު ރާއްޖެއަށް ކުރަމުންދާ ވިއްސާރައަކީ ތޫފާނެއް ނުވަތަ ކޮޅިގަނޑެއްގެ ސަބަބުން ކުރަމުންދާ ވިއްސާރައެއް ނޫން ކަމަށް މޫސުމާބެހޭ ގައުމީ އިދާރާއިން ބުނެފި އެވެ. އެ އިދާރާއިން ބުނީ މިހާރު ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަ ކަމަށެވެ.
މެޓް އޮފީހުގެ ވެދާ ފޯކާސްޓަރު ވިދާޅުވީ، ކުރިއަށް އޮތް 24 ގަޑިއިރު ތެރޭގައި އުތުރާއި މެދު ރާއްޖެ ތެރެއަށް ވިއްސާރަކުރާނެ ކަމަށެވެ. މި ވިއްސާރާގައި އުދަ އަރާނެ ކަމަށް ލަފާނުކުރެވޭ ކަމަށް ފޯކާސްޓަރު ވިދާޅުވި އެވެ.
ފޯކާސްޓަރު ވިދާޅުވީ، އުތުރާއި މެދު ރާއްޖެ ތެރޭގެ ކަނޑުތައް އާދައިގެ މިންވަރަކަށް ގަދަ ވާނެ ކަމަށާއި އެހެން ކަމުން ދަތުރުފަތުރުކުރާ ފަރާތްތަކުން ސަމާލުވުމަށް އިލްތިމާސްކުރާ ކަމަށެވެ. ވައި ވެސް ގަދަވާނެ ކަމަށާއި 10 މޭލާއި 18 މޭލާ ދެމެދުގެ ބާރު މިނުގައި ވައި ޖެހޭނެ ކަމަށް ފޯކާސްޓަރު ވިދާޅުވި އެވެ.
ހުޅަނގު މޫސުމުގެ ވިއްސާރަ ރާއްޖެއަށް ކުރަމުންދާއިރު، ހުޅަނގު މޫސުން ފެށިފައިވަނީ މި މަހުގެ ނުވަވަނަ ދުވަހު އެވެ.
މިހާރު ރާއްޖެއަށް ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަ ކަމަށް މެޓުން ބުނޭ - އަވަސް ފޮޓޯ: އަހުމަދު ޝުރާއު