ބެންކޮކް (27 މެއި) - މިއީ އައްޓާޕޯން ބޫންމަކްޗުއޭ ނަމަކަށް ކިޔާ ތައިލެންޑްގެ މީހަކަށް މިއަދު ހެނދުނު ދިމާވި ވަރަށް ބަދުނަސީބު ކަމެއްގެ ވާހަކަ އެވެ. ހެނދުނު ހޭލައިގެން ގޮސް ފާޚާނައަށް ވަދެ ތަށި ޖައްސާލައިގެން އިންދައި، ފާޚާނާތަށީގެ ތެރެއިން ދެމިގެން ފުންމައިގެން އައި 10 ފޫޓްގެ ހަރުފައެއް އޭނާގެ ނާޒުކު ގުނަވަނުގައި ދަތްއެޅީ އެވެ.
އެ މަންޒަރު ހިޔާލަށް ގެންނާނެ ކަމެއް ނެތެވެ. އުމުރުން 38 އަހަރުގެ އެ މީހާގެ ހާލު ތިޔަ ހީކުރާ ވަރަކަށް ގޯހެއް ނޫނެވެ.
އައްޓާޕޯންއަށް ހަމަލަ ދިނީ ހަރުފަ އާއިލާތަކުގެ ތެރެއިން ސައިޒުން އެންމެ ބޮޑުވާ ޕައިތޮންއެކެވެ. ޕައިތޮން އަކީ ވިހަ ހަރުފައެއް ނޫނެވެ. އޭގައި ވަރުގަދަ ދަތްތަކެއް ހުރެ އެވެ. އެކަމަކު އާންމުކޮށް ޝިކާރަކޮށް އުޅެނީ "ހަށިގަނޑު" ގެ ބާރު ދައްކައިގެންނެވެ.
މިހާރު ހޮސްޕިޓަލެއްގައި ފަރުވާ ހޯދަމުން ދުނިޔޭގެ އެކި ކަންކޮޅުތަކުގެ މީޑިއާތަކަށް އިންޓަވިއު ދެމުން އަންނަ އައްޓާޕޯން ބުނެފައި ވަނީ ދަތްއެޅި ވަގުތު ހީވީ ގުނަވަން އިރައިގެން ގެންދިޔަހެން ކަމަށެވެ. ނަމަވެސް ހަރުފައިގެ ބޮލާއި ކަރުގައި އޭނާ ހިފަހައްޓާލި ގޮތުން ހަރުފައަކަށް ވެސް އިތުރަަކަށް މާ ބޮޑު ކަމެއް ނުކުރެވުނެވެ.
އަނެއްކޮޅުން ފިރިމީހާގެ ހަޅޭކުގެ އަޑަށް ފާހާނާ އަށް ދުވެފައި ވަން، އައްޓާފޯންގެ އަނބިމީހާ ވަނީ ހަރުފައިގެ ކަރުގައި ވަލެއް ވެސް އައްސައިފަ އެވެ. ބެލެވޭ ގޮތުގައި ހަރުފައިގެ ބާރު އިރުކޮޅަކުން ދޫވީ އެވެ. އަދި ހަރުފައިގެ އަނގަ ގަދަކަމުން ހުޅުވައިގެން ސަލާމަތްވެވުނު ވަގުތު އެ ފިރިހެން މީހާ ވެސް ހޭނެތިގެން ވެއްޓިއްޖެ އެވެ.
މި ހާދިސާއެއް ހިނގީ ހެނދުނު ހޭލައިގެން ވަޒީފާ އަށް ދާން ތައްޔާރުވުމަށް އައްޓާޕޯން ފާހާނާއަށް ވަން ވަގުތު އެވެ. އޭނާގެ ގެ ހުންނަނީ ތައިލެންޑްގެ ވެރިރަށް ބެންކޮކްގެ އިރުމަތީ ބިތުގައި އޮންނަ ޗަޗޮއެންސާއޯގަ އެވެ.
ފާހާނާތަށިގަނޑުގެ ތެރެއިން ނުކުމެ ހަމަލާ ދިން ހަރުފަ އެތަނުން ނެރުނީ ތަށިގަނޑު އެއްކޮށް ތަޅާލައިގެންނެވެ. އެއަށް ފަހު އޭތި ވަނީ ވަލުތެރެއަށް ދޫކޮށްލައިފަ އެވެ.