ރޯދައާއި އަޅުކަންތަކާ ބެހޭގޮތުން މައުލޫމާތުދީ އަޅުކަންތަކާ ބެހޭގޮތުން އުފެދޭ ސުވާލުތައް ދީނީ އިލްމުވެރިންނާ ކުރުމުގެ ފުރުސަތު ހުޅުވައިލުމުގެ ގޮތުން އިސްލާމިކް މިނިސްޓްރީން "ރަމަޟާން މަހަށް ތައްޔާރުވުން" ނަމުގައި ވޯކްޝޮޕެއް ފަށައިފި އެވެ. ވޯކްޝޮޕް ފެށީ މިއަދު ހެނދުނު އެވެ.
ރަމަޟާން މަހަށް ތައްޔާރުވުން ވޯކްޝޮޕަކީ ހުރިހާ އުމުރުފުރާ އަކަށް ހުޅުވާލައިގެން ބައިވެރިވުމަށް އިއުލާންކުރި ވޯކްޝޮޕެކެވެ. އެގޮތުން 70 އަށް ވުރެ ގިނަ މީހުން ވަނީ ވޯކްޝޮޕްގައި ބައިވެރިވެފަ އެވެ. މިއަދު ހެނދުނު އިސްލާމިކް މަރުކަޒުގައި ބޭއްވި ރަސްމިއްޔާތެއްގައި ވޯކްޝޮޕް ފައްޓަވައިދެއްވީ އިސްލާމިކް މިނިސްޓްރީގެ އެޑްވައިޒަރު ފަޟީލަތުއްޝައިހް މުހައްމަސު ރަޝީދް އިބްރާހިމް އެވެ.
ވޯކްޝޮޕް ފެށުމާ ގުޅިގެން އިސްލާމިކް މިނިސްޓަރު ޑރ. އަހުމަދު ޒިޔާދު ވަނީ ރޯދަމަހު ހާއްސަކޮށް އަޅުކަމަށް އިސްކަން ދިނުމަށް ގޮވާލައްވާފަ އެވެ. އަދި ފުރިހަމަ މުސްލިމަކަށް ވުމަށްޓަކައި ހެޔޮ ނަސޭހަތް އަޑުއެހުމަށާއި ހެޔޮ އަމަލުކުރުން މަތީގައި ދެމިތިބުމަށް ގޮވާލައްވާފަ އެވެ.
މިއަދު ފެށި ވޯކްޝޮޕްގައި ހަތަރު ދީނީ އިލްމުވެރިން މައުލޫމާތު ދެއްވާނެ އެވެ. އަދި އެ ބޭފުޅުން މައުލޫމާތު ދެއްވައި ނިމުމުން ބައިވެރިން ބޭނުންވާ ދީނީ އެކި ކަންކަމާ ގުޅޭ ސުވާލުތައް ކުރުމަށް ވެސް ފުރުސަތު ހުޅުވާލާނެ އެވެ.
ވޯކްޝޮޕް ކުރިއަށްދާނީ މިއަދު ހަވީރުގެ ނިޔަލަށެވެ.