ގޭހުގެ އަގު އަނެއްކާ ވެސް ހެޔޮކޮށްފި

މޯލްޑިވް ގޭސް އިން ވިއްކާ ކައްކާ ގޭހުގެ އަގު އަނެއްކާ ވެސް ހެޔޮ ކޮށްފި އެވެ.

މޯލްޑިވްސް ގޭސް އިން މިއަދު ބޭއްވި ނޫސްކޮންފަރެންސެއްގައި އެ ކުންފުނީގެ މެނޭޖިން ޑިރެކްޓަރު އަބްދުﷲ މައުމޫނު (މާނު) ވިދާޅުވީ މާދަމާ އިން ފެށިގެން އެ ކުންފުނިން ވިއްކާ 10 ކިލޯގެ ގޭސްފުޅި އަކުން 10ރ. އަގު ހެޔޮކޮށްފައިވާ ކަމަށާއި، އަގަށް ގެނެވުނު މި ބަދަލާއެކު ކުރިން 210ރ. އަށް ވިއްކަމުން ދިޔަ ގޭސްފުޅިއެއް ވިއްކާނީ 200ރ. އަށް ކަމަށެވެ.

"ގޭހުގެ އަގަށް މި ބަދަލު ގެނެސްފައިވަނީ ރޯދަމަހު ގޭހުގެ ޑިމާންޑް މަތިވުމުން،" މާނު ވިދާޅުވި އެވެ.

"ހުރިހާ ގެއެއްގައި ވެސް ބޭނުންކުރަނީ 10 ކިލޯގެ ފުޅި. ގޭބިސީތަކުގައި ބޭނުންކުރަނީ މި ސައިޒު [10ކިލޯ] ގެ ފުޅި."

މޯލްޑިވް ގޭހުން ކައްކާ ކޭހުގެ އަގު މި އަހަރު ދެ ފަހަރެއްގެ މަތިން ހެޔޮކޮށްފައިވެ އެވެ. އެންމެ ފަހުން ގޭހުގެ އަގަށް ބަދަލު ގެނައިއިރު ގޭސް ފުޅިއެއް ވިއްކަމުން ގޮސްފައިވަނީ 225ރ. އަށެވެ. އެ ފަހަރު ގެނެވުނު ބަދަލާއެކު ގޭސް ފުޅިއެއް ވިއްކަމުން ގޮސްފައިވަނީ 210ރ. އަށެވެ.

"އަވަސް" އިން ކުރި ސުވާލަކަށް ޖަވާބު ދެއްވަމުން މާނު ވިދާޅުވީ ގޭހުގެ އަގަށް ބަދަލު ގެނެސްފައިވަނީ ދުނިޔޭގެ ބާޒާރުގައި ގޭހުގެ އަގަށް އައިސްފައިވާ ބަދަލަށް ބެލުމަށްފަހު ނޫން ކަމަށެވެ. އޭނާ ވިދާޅުވީ އަގަށް ގެނެސްފައިވާ މި ބަދަލު ރައްރަށުގައި ތިބި ރައްޔިތުންނާ ހަމައަށް ގެނެސް ދިނުމަށް ބޭނުންވާ ކަމަށާއި، އެކަން ކުރުމަށް ގޭސް ސަޕްލައިކުރާ ފަރާތްތަކާއެކު މަސައްކަތް ކުރާނެ ކަމަށެވެ.

"މިދިޔަ އޭޕްރީލް މަހު އަގު ހެޔޮ ކުރުމާ ގުޅިގެން އަގަށް އައި ބަދަލު އާއްމުންނާ ހަމައަށް ގެނެސް ދެވިފައެއް ނުވޭ. އަތޮޅުތެރޭގައި އެންމެ އެދެވޭ ގޮތުގައި ބެނެފިޓް ލިބިގެން ނުދިޔަކަން ފާހަގަ ކުރެވޭ. އެހެންވެ ކުރިއަށް އޮތް ތަނުގައި ހޮޓްލައިނެއް ވެސް ގާއިމް ކުރާނަން،" މާނު ވިދާޅުވި އެވެ.

އޭނާ ވިދާޅުވީ ރަށްރަށުގައި ގޭސް ސަޕްލައިކުރާ ފަރާތްތަކުން ގޭހުގެ އަގަށް އަންނަ ބަދަލު ރައްޔިތުންނާ ހަމައަށް ނުގެނެސްދެވޭނަމަ، ގޭސް ސަޕްލައިކުރާ ފަރާތްތައް ބަދަލު ކޮށްގެން ނަމަވެސް މި ބަދަލު ގެންނާނެ ކަމަށެވެ.

"މޯލްޑިވް ގޭހުން ބަލްކްކޮށް ގޭސް ނަގާ އެޖެންޓުނާ އެހެން ފަރާތްތަކުން ވެސް އަތޮޅު ތެރޭގައި ތިބޭ ފަރާތްތަކާ ހަމައަށްވެސް ގެނެދެން ޖެހޭނެ. ދެން މިހެން ދެންނެވި ނަމަވެސް ދޯނީގެ ނާލާ އެހެން ކަންކަންވެސް އެބަހުރި. ނަމަވެސް އަޅުގަނޑުމެން ފުޅިން މި އަގުހެޔޮކޮށްދިން ބައި އަގުހެޔޮ ކޮށްދޭން ޖެހޭނެތޯ" މާނު ވިދާޅުވި އެވެ.

މޯލްޑިވް ގޭހުން ވަނީ ރޯދަ މަހު ގޭސް ސަޕްލައި ކުރާ ގަޑިތައްވެސް ބަދަލުކޮށްފަ އެވެ. މިގޮތުން ހޮނިހިރު-ބުރާސްފަތި ދުވަހު ގޭގެއަށް ގޭސް ގެންގޮސް ދޭނީ ހެނދުނު 10:00 އިން ހަވީރު 16:00 އަށެވެ. އަދި ރޭގަނޑު 20:00-11:00 އަށެވެ. މީގެ އިތުރުން ފޯނުން ގުޅައިގެން އޯޑަރު ނަގާ ގަޑިތަކަކީ ދުވާލު 3:30އން ރޭގަނޑު 10:30 އަށެވެ. އަދި ހުކުރު ދުވަހު 1:00 އިން 4:00 އަށެވެ.