ޖަޕާނުގެ ޖަޒީރާ ރަށެއް ކަމުގައިވާ، ހޮކައިޑޯގައި ދެމަފިރިއަކު އެމީހުންގެ ހަތް އަހަރުގެ ފިރިހެން ދަރިފުޅު މީގެ ހަފުތާއެއްހާ ދުވަސް ކުރިން ޖަންގައްޔަކަށް ދޫކޮށްލީ މަގުމަތިން ދާއިރު ކާރާއި އާންމުންނާ ދިމާއަށް ގާއުކާތީ އަދަބެއްގެ ގޮތުންނެވެ. އެގޮތަށް ދަރިފުޅަށް އަދަބު ދިނުމަށް ފަހު އޭނާ ބަލާދިޔައިރު އެ ކުއްޖާ ވަނީ ގެއްލިފަ އެވެ.
ނަމަވެސް ޖަޕާނުގެ އަސްކަރިއްޔާ އިން ހިންގި ހަރަކާތެއްގައި މި ކުއްޖާ މި ވަނީ އެންމެފަހުން ހޯދައިފަ އެވެ. އޮފިޝަލުން ވިދާޅުވެފައި ވަނީ އޭނާ ފެނިފައި ވަނީ ސިފައިންގެ ތަމްރީންތަކަށް ހާއްސަތަނެއްގައި ގާއިމުކޮށްފައިވާ އިމާރާތެއްގެ ތެރެއިން ކަމަށެވެ.
އެއީ ޔަމަޓޯ ޓަނޫކާ ނަމަކަށް ކިޔާ މި ކުއްޖާ ގެއްލުނު ސަރަހައްދާ ހަ ކިލޯމީޓަރު ދުރެވެ. ފުލުހުން ސުވާލުކުރުމުން މި ކުއްޖާ ބުނެފައި ވަނީ އޭނާ ހަ ކިލޯމީޓަރު ކަޑައްތުކޮށް އެ އިމާރާތަށް ގޮސްފައި ވަނީ އެންމެ ރެއަކުންނެވެ. އަދި ޑޮކްޓަރުން ބެލިބެލުމަށް ފަހު ބުނެފައި ވަނީ ކުއްޖާ އަށް އެއްވެސް އަނިޔާއެއް ވެސް ލިބިފައި ނުވާ ކަމަށާއި ހަތް ދުވަސް ވަންދެން ނުކައިހުރިއިރު އޭގެ ނޭދެވޭ އަސަރުތަކެއް ވެސް މާ ބޮޑަށްކޮށްފައި ނުވާ ކަމަށެވެ.
މި ކުއްޖާ ގެއްލިގެން ޖަޕާނުން، އޭނާ ހޯދުމުގެ މަސައްކަތަށް 200 މީހުންގެ ޓީމެއް ނެރެފައިވެ އެވެ.
ކުއްޖާ ގެއްލުނު ވާހަކަ އެންމެ ފުރަތަމަ އޭނާގެ ބައްޕަ އާއި މަންމަ ފުލުހުންނަށް ރިޕޯޓްކުރީ ހަގީގަތް އޮޅުވާލައިގެންނެވެ. އެމީހުން ފުރަތަމަ ބުނެފައި ވަނީ ތަރުކާރީ ކޮށަން، ވަލުތެރެއަށް ގޮސްގެން އުޅެނިކޮށް ކަމަށެވެ. ނަމަވެސް ފަހުން ވަނީ، އަދަބެއްގެ ގޮތުން ދަރިފުޅު ޖަންގައްޔަށް ދޫކޮށްލި ކަމަށް އެއްބަސްވެ އެވެ.