މާދަމާ ރޭ ފްރާންސްގައި ފަށާ ޔޫރޯ ފުޓްބޯޅަ މުބާރާތާއި މިހާރު އެމެރިކާގައި ކުރިޔަށްދާ ކޯޕާ އެމެރިކާ ފުޓްބޯޅަ މުބާރާތަށް ހާއްސަކޮށް އަވަސް އޮންލައިން އިން ތައްޔާރުކުރި ހާއްސަ ޔޫރޯ ގައިޑް "އެމްޓީސީސީ އަވަސް ޔޫރޯ" މެގަޒިން މިދިއަ ހަފުތާގައި ރަސްމީކޮށް އިފްތިތާހު ކުރުމަށްފަހު މިއަދު ހިލޭ ބަ ހަން ފަށައިފި އެވެ.
މުބާރާތުގައި ވާދަކުރާ 24 ޓީމުގެ މައުލޫމާތާއި މުހިންމު ކުޅުންތެރިން އަދި ފްރާންސްގެ ތައްޔާރުވުންތަކުގެ އެންމެ ފަހުގެ މައުލޫމާތު ހިމެނޭ މި ފޮތް ހިލޭ އާއްމުންނަށް ބަހަން އަވަސް އިން ނިންމީ ދެ ކަމަކާ ގުޅިގެންނެވެ. އެއީ ބޮޑު ކުޅިވަރު މުބާރާތަކަށް މިހާބޮޑު ފޮތަކާއިގެން އަވަސް ކިޔުންތެރިންނާ ބައްދަލުކުރި ފުރަތަމަ ފަހަރަށްވުމުގެ އިތުރަށް މިއީ ނޫހުގެ އިޖްތިމާއީ ޒިންމާއެއްކަމުގައި ވެސް ދެކިގެންނެވެ.
މި ފޮތުގައި މިހާރު ކުރިއަށްދާ ކޮޕާ އެމެރިކާ ސެންޓެނާރިއޯ އަށް ހާއްސަ ސަޕްލިމެންޓެއް ހާއްސަކޮށްފައިވާއިރު ފޮތާއެކު ދުނިޔޭގެ އެންމެ މޮޅު ދެ ކުޅުންތެރިން ކަމަށްވާ ކްރިސްޓިއާނޯ ރޮނާލްޑޯ އާއި ލަޔޮނަލް މެސީ އަދި ފްރާންސްގެ ޕައުލް ޕޮގްބާ އާއި ސްވިޑްންގެ ފޯވަޑް ޒްލަޓާން އިބްރަހިމޮވިޗްގަ ޕޯސްޓަރުތައް ވެސް ހިލޭ ލިބޭނެ އެވެ. އަދި މުބާރާތުގެ ސްކޯ ޗާޓް ވެސް ހިލޭ ލިބޭނެ އެވެ.
މި ފޮތް އަވަސްގެ އިދާރާއިން ލިބެން މިހާރު ހުރި މާދަމާ ހަވީރު ލޮނުޒިޔާރަތްކޮޅުގައި ވެސް ފޮތާއި ޕޯސްޓަރު ބެހުމުގެ ހަރަކާތެއް އޮންނާނެ އެވެ. އަދި ޔޫރޯ މުބާރާތް މާދަމާ ރޭ ފެށުމާއެކު ވެސް ފޮތް ހިލޭ ދޫކުރާނެ އެވެ.
އަވަސް ޔޫރޯ ފޮތް މިދިޔަ އާދިއްތަ ދުވަހު ނެރެދެއްވީ އެފްއޭއެމުގެ ރައީސް އަދި ކުރީގެ ގައުމީ ފޯވަޑް އަހުމަދު ތޯރިގް (ޓޮމް) އެވެ. މި މުބާރާތަށް އަވަސް އިން ތައްޔާރުކޮށްފައިވާ ވެބްސައިޓާއި އަވަސް ޔޫރޯ އެޕްލިކޭޝަން ނެރެދެއްވީ ކުޅިވަރާ ބެހޭ ވަޒީރު އަހުމަދު ޒުހޫރެވެ. ފޮތް އިފްތިތާހު ކުރި ދުވަހު ވެސް މާލޭގައި ފޮތް ބަހާފައި ވެއެވެ.
މާދަމާއިން ފެށިގެން އެއް މަސްދުވަހަށް ކުރިއަށްދާ މުބާރާތަށް ހާއްސަކޮށް ބޮޑު ސްކްރީނުގައި މެޗު ބަލާލުމަށް އަވަސް ޔޫރޯ ޖަގަހަ ވެސް ހުޅުވަން ވެސް ވަނީ ނިންމާފަ އެވެ.