"އަޅުގަނޑަށް އެންމެ ކަމުދަނީ މި ގައުމު! އަޅުގަނޑު އުފަންވި މި ވަޒަން، އަޅުގަނޑުގެ މި ދިވެހި ރާއްޖެ!"
މި ޑައިލޮގް ކޮޅަކީ އަހަރެމެންގެ ޗީފް އޮފް ޑިފެންސް ފޯސް މޭޖާ ޖެނެރަލް އަހުމަދު ޝިޔާމާއި އެމަނިކުފާނުގެ ރީތި އަޑާއި އޭނާގެ ގައުމީ ޖޯޝްހުރި ވާހަކަފުޅުތަކާ ވަރަށް ގުޅޭ ޑައިލޮގު ކޮޅެކެވެ. ސަބަބަކީ އެ އަޑުން ގައުމުވަންތަކަން އުފައްދައިދޭތީ އެވެ. މިލިޓަރީ ގޮތުން އެންމެ އުހުގައި ހުންނެވި ޗީފަކީ އާޓްގެ ތަފާތު ފަންނުތަކުގައި ވެސް އާދަޔާ ހިލާފު ޝަހުސިއްޔަތެވެ. ޗީފްގެ މަޑު މައިތިރި ކަމާއި ކެތްތެރި ކަމޭ ހިތްތެވުމާއި ރަހުމަތްތެރި ކަމާއި ހުރިހާ ކަމެއްގައި ވެސް ގައުމު އިސް ކުރުމަކީ އެންމެ ހާއްސަ ސިފައެވެ.
ގުޅުން ހުރި ވާހަކައެއް ދައްކާލަން ހެއްޔެވެ؟ ނުވަ ދިހައިގެ އަހަރުތަކުން ފެށިގެން ފިލްމުތަކާއި ޑްރާމާތަކުގައި އެންމެ ހިނގާ އަދި އޭރުން ފެށިގެން މީހުންގެ ލޯތްބާއި ރުހުން ލިބިފައިވާ ޝަހުސިއްޔަތަކީ ފިލްމާއި ޑްރާމާތަކުގައި މަޑުމައިތިރި ކަމާއެކު ބުނެލާ ބަސްތަކުން ބެލުންތެރިންގެ ލޮލުން ކަރުނަ ހިލުވައިލައި އަދި ރޮއްވާލައިދޭ އިބްރާހިމް ޝާކިރެވެ. ދިވެހިންގެ ޝާކިރުބެ އެވެ. އެ ފިލްމުތަކާއި އެ ޑްރާމާތަކުގައި ބައްޕައެއްގެ ރޯލުން ފެނުނު ޝާކިރުބެއަކީ އަހަރެމެންގެ ޗީފް ބައްޕާފުޅެވެ. މަތީގައިވާ ޑައިލޮގް ކޮޅަކީ ޝާކިރުބެގެ ޑައިލޮގް ކޮޅެކެވެ.
ޝާކިރުބެއަކީ އަބަދުވެސް ފިލްމީ ދާއިރާގައި ހަރަކާތްތެރިވާން ބޭނުންފުޅުވި ބޭފުޅެކެވެ. އޭނާ ކުޅުއްވި ހުރިހާ ފިލްމެއް އަދިވެސް ޑްރާމާ އެއް ވެސް ކުޅުއްވީ ވަރަށް ޝައުގުވެރިވެ ވަޑައިގެން ވަރަށް ބޮޑަށް އެކަން ކުރައްވަން ބޭނުންފުޅު ވެގެނެވެ. އެކަމަކު ފުރުސަތެއް ނުލިބި ވެސް އެތައް ދުވަހަކު އިންތިޒާރުގައި ވެސް ހުންނަން ޖެހިވަޑައިގަތެވެ.
ނަވަރާސަތޭކަ ނުވަދިހަ އެއްވަނަ އަހަރު ޝާކިރުބެ އުޅުއްވީ ޓީވީއެމްގަ އެވެ. އޭރު އަދާކުރެއްވި ވަޒީފާއަކީ ޑިއުޓީ އޮފިސަރު ކަމެވެ. އޭރުވެސް އުމުރުފުޅު ފަންސާހުން މައްޗަށް ދަތުރުކޮށްފި އެވެ. ފިލްމީ ދާއިރާއިން ޝާކިރުބެއަށް ފުރުސަތެއް ލިިބި ވަޑައިގެންނެވީ ގަމީހެއް ނުލައި ކެމެރާ ކުރިމަތީގައި ހަރަކާތްތެރިވާނެ މީހަކު ނުވެގެން އުޅެނިކޮށް ޝާކިރުބެ އަމިއްލަފުޅަށް ގަމީހާ ނުލައި ކެމެރާ ކުރިމައްޗަށް ނުކުންނަވައިގެނެވެ. އެ އަހަރު ފެނިގެން ދިޔަ އެ ޑްރާމާގައި ޝާކިރުބެ ދައްކާލެއްވި އާދަޔާހިލާފު ހުނަރާއެކު އެންމެންގެ ހިތް ފަތަހަ ކުރެއްވި އެވެ. ޝާކިރުބެ އޭނާގެ ހުނަރުން އެންމެ ކޮސް ކޮށްލެއްވި އިރު އޭނާގެ އަސަރުގަދަ ރީތި އަޑު ދިވެހިންގެ ހިތްތަކުގައި ކަނޑާ ނެގި އެވެ.
ޓީވީއެމްގެ ޑްރާމާތައް އެ ހިސާބުން ފެށުނީ ޝާކިރުބެއާ އެކު އެވެ. އޭގެފަހުން އައި އަހަރުތަކުގައިވެސް ޑްރާމާތަކުން ޝާކިރުބެއަށް ފުރުސަތު އޮވެ އެވެ. ފިލްމު އުފައްދާ އަމިއްލަ ފަރާތްތަކުގެ ފިލްމުތަކާއި ޑްރާމާތަކުގައި ވެސް ޝާކިރުބެއަށް ރޯލެއް ދިނުމަކީ ގާތްގަނޑަކަށް މަޖޫބުރު ކަމަކަށް ވިއެވެ. އޭނާގެ އެކްޓް ކުރެއްވުމުގެ ހުނަރުގެ މޮޅު ކަމުންނެވެ.
ކުރުކުރުކޮށް ޝާކިރުބެ ބައެއް ވާހަކަ ވިދާޅުވެ ދެއްވި އެވެ:
"އެއްރޭ އިނީ ޓީވީއެމްގައި ޑިއުޓީ ކުރަން... އޭރު ދެ ކުއްޖަކު އުޅޭ ހުސް ގަޔާ [މަތިން އެއްޗެއް ނުލައި] ކެމެރާ ކުރިމައްޗަށް އަރާނެ މީހަކު ނުވެގެން. ދެން ޝާކިރުބެ ގޮވާލާފައި އެކުދިން ގާތުގައި އަހައިފިން ކެރިދާނެހޭ ޝާކިރުބެ ގެންދަން. އެކުދިން ބުނެފި ޝާކިރުބެއާ އެކަހަލަ ކަމަކާ ނުވެސް ގުޅޭ ނޫންހޭ! އެކަމަކުވެސް ބުނެފިން އަޅެ ޝާކިރުބެ ގެންދިޔައީމަ ނޫންހޭ އެނގޭނީ، ދެން އެކުދިން ގެންގޮސް ޝާކިރުބޭ ލައްވާ ކުޅުވީ! އެވަގުތުން ފެށިގެން އެންމެންނަށްވެސް ޝާކިރުބެ ވަރަށް ކަމުގޮސްފި،"
އޭރު މުޖުތަމައު އޮތް ގޮތުން ފިލްމީ ދާއިރާގެ އެހެން ތަރިންނެކޭ އެއްގޮތަށް ޝާކިރުބެއަށް ވެސް ފިލްމާއި ޑްރާމާ ކުޅެގެން މަލާމާތް ރައްދުވާ ގޮތްވި އެވެ. މަގުމަތިން ފެނިގެން މީހުން ޖެއްސުމަށް އެއްޗެހި ބުނެލަ އެވެ. ބައެއް ފަހަރު ފުރައްސާރަ ކޮށްލަ އެވެ. އެއިން އެއްވެސް ކަމަކަށް ޝާކިރުބެ ސަމާލު ކަމެއް ނުދެއްވަ އެވެ. ބީރު ކަންފަތް ދެއްވާފައި ވަޑައިގެންނެވީ ކުރިއަށެވެ. މިއަދު ޝާކިރުބެއަށް ސަޕޯޓުކޮށް ތަރުހީބުދޭ މީހުން ހާހުން ގުނެ އެވެ. ޝާކިރުބެއަކީ އެންމެންގެ ލޯބި އޮތް ތަރިއެކެވެ.
އޭރުއްސުރެ މެދުކެނޑުމެއްނެތި އެތައް އަހަރެއް ވަންދެން ފިލްމީ ދާއިރާއަށް ހިދުމަތް ކުރެއްވުމަށްފަހު ކުއްލިއަށް ޝާކިރުބޭ ފިލްމީ ދާއިރާއިން ގެއްލުނީ އެވެ. ހަމަ ކުއްލިއަކަށެވެ. އެހެން ނަމަވެސް މިއަދާ ހަމައަށްވެސް އެންމެން ވެސް ޝާކިރުބޭގެ މަތިން ހަނދާން ކުރެ އެވެ. ފިލްމާއި ޑްރާމާތަކުން ޝާކިރުބެ މިސްވެގެން އުޅެ އެވެ. ޝާކިރުބެ އަސަރުގަދަ އަޑު ދިވެހި ފިލްމީ ޖައްވުން ކެނޑިފައި އޮތުމަކީ ފިލްމީ ދާއިރާގެ އަސަރު ކަނޑައިގެން ދިޔަ ކަމަކަށް އޮތީ ވެފަ އެވެ.
އެގާރަ އަހަރުވީ އެވެ. މިއޮތީ ޝާކިރުބެއާ ދިމާވެފައެވެ، ފިލްމާއި ޑްރާމާތަކުން ޝާކިރުބެ ފެނިލަން އެދޭ މީހުންނަށް މިއޮށް ފެނިލީ އެވެ. "ޗެނަލް 13" އިން ރޭ ގެނެސްދިން ޔޫސޭގެ "ދިރިއުޅުމަކީ މިއީ ބާ"ގެ މި އަހަރުގެ ދެވަނަ އެޕިސޯޑުގަ އެވެ. އުފާވެރި އެހެން ހަބަރެކެވެ. "ދިރިއުޅުމަކީ މިއީބާ" ގެ ކުރިއަށް ހުރި އެޕިސޯޑުތަކުން ވެސް ޝާކިރުބެ ފެނި ވަޑައިގަންނަވާނެ އެވެ.
އަސްލު މިހުރިހާ ދުވަހު ޝާކިރުބެ ކޮބައި ހެއްޔެވެ؟ އުޅުއްވީ ކޮންތާކު ހެއްޔެވެ؟
"ވީ ގޮތަކީ އަންހެނުން [ވާހަކަ ލިޔުއްވުމާއި އާޓްގެ ފަންނުގައި ވަރަށް ކުޅަދާނެ ބޭކަނބަލެއް ކަމަށްވާ ކުރަހާ ޒަރީނާ] ވަރަށް ބޮޑަށް ބަލިވެގެން އަންހެނުން ގޮވައިގެން ބޭސްފަރުވާ ކުރަން އިންޑިޔާގައި މިއުޅުނީ މިދިޔަ 11 އަހަރު، މިހާރު ހިނގާލާ ހަދާލާ އުޅެވޭތީ އަނެއްކާ އެނބުރި މިއައީ،" އަހަރުތަކެއް ފަހުން އުފަން ވަޒަނަށް އާދެވުމުގެ އުފާ އިހުސާސް ކުރައްވަމުން ޝާކިރުބެ ވިދާޅުވި އެވެ. "އަޅުގަނޑަށް އެންމެ ކަމުދަނީ މި ގައުމު! އަޅުގަނޑު އުފަންވި މި ވަޒަން، އަޅުގަނޑުގެ މި ދިވެހި ރާއްޖެ،"
އުމުރުފުޅުން މިހާރު 80 އަހަރުގެ ޝާކިރުބޭ އެނބުރި ފިލްމީ ދާއިރާއަށް އަލުން ނުކުންނެވީ ކީއްވެގެންކަން އެނގޭ ހެއްޔެވެ؟ ހުރިހާ ބެލުންތެރިން ޝާކިރުބޭގެ އިންތިޒާރުގައި ތިބިކަން އެނގިވަޑައިގެންނެވެ. އަދި އެކްޓް ކުރެއްވޭ ކަހަލަ ކޮންމެ ރޯލެއް ދެއްވި ކުޅުއްވާ ހިތްޕުޅުވާތީ އެވެ.
މިހާތަނަށް ސާޅީހަކަށް ޑްރާމާ އާއީ އަށެއްކަ ފިލްމު ކުޅުއްވާފައިވާ ޝާކިރުބެ ސަރުކާރުގެ ވަޒީފާގައި 38 އަހަރު ވަނީ ގައުމަށް ހިދުމަތް ކުރައްވާފަ އެވެ. އުމުރުފުޅުން 11 އަހަރުގައި ބައްޕަ އަވަހާރަވެ، ގާތްގަނޑަކަށް މުޅީން އެކަނި ޝާކިރުބެ ދިރިއުޅުއްވެވީ އަމިއްލައަށް މަސައްކަތް ކުރައްވައިގެނެވެ. މިއަދާ ހަމައަށް ވެސް ޝާކިރުބެގެ އެންމެ ބޮޑު އުފުލަކީ އެއްވެސް މީހަކަށް ދާރާފައި ނެތުމެވެ. އެއްވެސް ތަނަކަށް ވެސް ދަރަނިވެރިވެފައި ނެތުމެވެ. އަދި ހަރުދާނާ ބޭފުޅަކު ހުންނެވުމަށެވެ.