ބެލަސްޓިކް މިސައިލްގެ މެދުރާސްތާ ދެ މިސައިލް އުތުރު ކޮރެއާއިން މިއަދު ޓެސްޓް ކޮށްފި އެވެ. އަވަށްޓެރި ދެކުނު ކޮރެއާގެ ދިފާއީ ބާރުން ބުނީ، އުތުރުން، މިއަދު ވަރަށް ހެނދުނު ފުރަތަމަ މިސައިލް ފޮނުވާލީ އެ ގައުމުގެ އިރުމަތީ ކަނޑުގެ އައްސޭރިއާ ދިމާލުން ކަމަށެވެ.
އަދި އެ މިސައިލް 150 ކިލޯ މީޓަރަށް ދަތުރު ކުރި ފަހުން، ފެއްލްވީ ކަމަށް ދެކުނުން ވަނީ ބުނެފަ އެވެ. އަދި ދެ ވަނަ މިސައިލް ޓެސްޓް ކުރީ، އޭގެ ގަޑިއެއްހާއިރު ފަހުން ކަމަށާއި އެ މިސައިލް 400 ކިލޯ މީޓަރަށް ވާސިލުވި ކަމަށް ވެސް ބުންޏެވެ.
އެމެރިކާގެ އަސްކަރިއްޔާގެ އޮފީޝަލަކު ވިދާޅުވީ އެ ދެމިސައިލް ވެސް އަމާޒު ކުރީ ޖަޕާނު ކަނޑަށް ކަމަށެވެ.
ދެކުނުގެ ސަލާމަތީކަންކަމާ ބެހޭ ދެ އޮފިޝަލަކާ ހަވާލަދީ އެގައުމުގެ ޔޮންހެޕް ނިއުސް އެޖެންސީ ބުނީ ފުރަތަމަ މިސައިލް ފެލުވެފައިވާކަން ޔަގީން ކުރަން އެނގޭ ކަމަށެވެ.
މި ދެ މިސަލްއަކީ "މުސްދާން" ގެ ނަންދީފައިވާ ބްރޭންޑްގެ ދެ މިސައިލެވެ. މި ދެ މިސައިލުގައި ވެސް އެމެރިކާގެ ގުއާމްއާ ހަމަޔަށް ވާސިލުވުމުގެ ގާބިލުކަން ހުންނާނެ ކަމަށް އޮފިޝަލުން ވިދާޅުވެ އެވެ.
މިއަދު ދެ މިސައިލެއް އުތުރުން ލޯންޗް ކޮށްފައި މިވަނީ މިއަހަރު މިހާތަނަށް ހަތަރު ފަހަރެއްގެ މަތިން މިސައިލް ޓެސްޓް ކުރުމަށްފަހުގަ އެވެ. އެ ހަތަރު ފަހަރުވެސް ވަނީ ނާކާމިޔާބު ވެފައެވެ.
އުތުރު ކޮރެއާގެ މުސްދާން ބްރޭންޑްގެ ދެ މިސައިލް އަސްކަރީ ހެވިކަމުގެ ތެރޭގައި ދައްކާލަނީ. އެގައުމުން މިއަދު ވަނީ އެމެރިކާގެ މައިރަށާ ހިސާބަށް ފޯރާވަރުގެ މިސައިލެއް ޓެސްޓްކޮށްފައި --- ފޮޓޯ: އީޕީއޭ