ދެކުނު ކޮރެއާގެ ދިފާއީ ވަޒީރު، ކިމް ޔޮން ހޫން އިސްތިއުފާދެއްވައިފި އެވެ. އޭނާ ވިދާޅުވި ގޮތުން މަގާމުން އިސްތިއުފާދެއްވީ، އަސްކަރީ ގާނޫން ހިންގުމަށް ރައީސް ޔޫން ސުކް ޔޯލްއަށް ލަފާއެރުވުމުގައި އެރި އޮޅުންތަކެއްގެ ސަބަބުން ކަމަށެވެ.
އަސްކަރީ ގާނޫން ހިންގުމާ ގުޅިގެން އަމަން ގެއްލިގެން ހިނގައިދާނެ ފަދަ އަލާމާތްތަކެއް ފެނިވަޑައިގެންނެވި ކަމަށްވެސް ވަޒީރު ވިދާޅުވި އެވެ.
އަސްކަރީ ގާނޫން އިއުލާންކުރުމުގެ ސަބަބުން ހިނގައިދިޔަ ހަމަނުޖެހުންތަކުގެ ޒިންމާ އެންމެ ފުރިހަމައަށް ނަންގަވާ ކަމަށް ވެސް ކިމް ޔޮން ހޫން ވިދާޅުވި އެވެ.
ދެކުނު ކޮރެއާގައި އަސްކަރީ ގާނޫނު އިއުލާންކުރުން ގިނަ ބަޔަކަށް ވެފައި ވަނީ ބޮޑު އަޖައިބަކަށެވެ. މި ފަދަ ހާލަތެއް ގައުމަށް މެދުވެރިވެފައި ނުވާ ކަމަށް އިދިކޮޅު ސިޔާސީ ލީޑަރުން ވެސް ވަނީ ބުނެފަ އެވެ.
ރައީސް ޔޫން ވިދާޅުވި ގޮތުން ދެކުނު ކޮރެއާ އޮތީ އަސްކަރީ ގާނޫން އިއުލާންކުރަން ޖެހޭ ހާލަތެއްގަ އެވެ.
އުތުރު ކޮރެއާގެ ކޮމިއުނިސްޓް ބާރުތަކުގެ ނުފޫޒު ދެކުނު ކޮރެއާއަށް ވަދެފައި ވަނީ އަސްކަރީއްޔާ ބޭނުންނުކޮށް ހައްލުކުރެވިދާނެ މިންވަރަށް ވުރެ ބޮޑަށް ކަމަށްވެސް ރައީސް ވިދާޅުވި އެވެ.
ދެކުނު ކޮރެއާގައި އަސްކަރީ ގާނޫން އިއުލާންކުރުމާ ގުޅިގެން އިދިކޮޅު ސީޔާސީ ލީޑަރުން ގާނޫންހަދާ މަޖިލީހަށް ކަރުދާހެއް ހުށަހަޅައި، ރައީސް ޔޫންގެ އަމުރު ބާތިލުކުރި އެވެ. އަދި އަސްކަރީ ގާނޫނަށް އަމަލުކުރުން ހުއްޓުވި އެވެ.
އޭތެ އިރުތަކެއް ފަހުން ރައީސް ޔޫން ވަނީ އަސްކަރީ ގާނޫން ބާތިލުކުރެއްވިކަން އިއުލާންކުރައްވާފަ އެވެ.
ރައީސް ޔޫންގެ މި ނިންމެވުމަށް އިހުތިރާމްކުރައްވާ ކަމަށް ވިދާޅުވެ، ދިފާއީ ވަޒީރު ވިދާޅުވި ސަރުކާރަށް ގޯހެއް ހެދިއްޖެކަން ގާނޫންހަދާ މަޖިލީހުން ބުނެދީފި ކަމަށެވެ. އަދި ދިފާއީ ވަޒީރުގެ މަގާމުގައި އިތުރަށް ދެމިހުންނެވުމަކީ ސަރުކާރަށް ލިބިދާނެ ގެއްލުމެއް ކަމަށެވެ.