އީ ވޯޓިންއާ ގުޅޭގޮތުން ސިޔާސީ ޕާޓީތަކާއެކު މަޝްވަރާކުރުމަށް އިލެކްޝަން ކޮމިޝަން (އީސީ) އިން މިމަހުގެ 28 ވަނަ ދުވަހަށް ބައްދަލުވުމެއް ތާވަލުކޮށްފި އެވެ.
އީވޯޓިން އާ ބެހޭ މަޝްވަރާ ބައްދަލުވުމަކަށް އީސީން ޕާޓީތަކަށް ދައުވަތު ދީފައިވާއިރު، އީވޯޓިން ރާއްޖެއަށް ތައާރަފްކުރުމާ ގުޅިގެން އިދިކޮޅު އެމްޑީޕީން ވަނީ، އީވޯޓިން ރާއްޖެއަށް ތައާރަފު ކުރުމުން އިންތިހާބު ނަތީޖާގެ އިތުބާރު ގެއްލި ވޯޓު ލުމުގެ ނިޒާމް ހަލާކުވެގެންދާނެ ކަމަށް ބުނެ ވަރަށް ބޮޑަށް ފާޑުކިޔާފަ އެވެ.
އީސީގެ މެންބަރު އަހުމަދު އަކްރަމް މިއަދު ވިދާޅުވީ، އަންނަ ލޯކަލް ކައުންސިލް އިންތިހާބަށް އީވޯޓިން ތައާރަފްކުރަން އެ ކޮމިޝަން ތައްޔާރުވެފައިވާއިރު ސިޔާސީ ޕާޓީތަކާއެކު އިތުރު ބައްދަލުވުމަކަށް ދާން އެ ކޮމިޝަނުން ނިންމާފައިވާ ކަމަށެވެ. އެގޮތުން މިދިޔަ ބުރާސްފަތި ދުވަހު ހުރިހާ ޕާޓީތަކަށް ބައްދަލުވުމުގެ ދައުވަތު ފޮނުވާފައިވާ ކަމަށެވެ. މަޝްވަރާގައި ބައިވެރިވެ ވަޑައިގަންނަވާނެ ބޭފުޅުންގެ ނަން މިމަހުގެ 27 ގެ ކުރިން ފޮނުވުމަށް އަންގާފައިވާ ކަމަށް ވެސް ވިދާޅުވި އެވެ.
އަންނަ ޖެނުއަރީމަހު އޮންނަ ލޯކަލް ކައުންސިލް އިންތިހާބަށް އީވޯޓިން ތައާރަފްކުރަން އީސީ އިން ނިންމާފައިވީ ނަމަވެސް ފުރަތަމަ އެ ނިޒާމް ތައާރަފްކުރާނީ މުޅި ރާއްޖެއަށް އެއްފަހަރާ އެއް ނޫނެވެ.