ނާޒިމް ވަގުތުން މިނިވަންކުރަން އެމްޑީޕީ އިން ގޮވާލައިފި

ނުރައްކާތެރި ހަތިޔާރު ގެންގުޅުނުކަމުގެ ތުހުމަތުގައި ކުރީގެ ޑިފެންސް މިނިސްޓަރު މުހައްމަދު ނާޒިމް ދައުވާ އުފުލައި 11 އަހަރު ދުވަހަށް ޖަލަށް ހުކުމްކޮށްފައި ވަނިކޮށް ނާޒިމްގެ ގެއިން ފެނުނު، ފިސްތޯލުން އަދީބުގެ ޑީއެންއޭ ފެނުނު ކަމަށް ފުލުހުން ބުނުމަކީ ނާޒިމްގެ ކުށެއް ނެތްކަން ކަށަވަރުވާ ކަމެއް ކަމަށާއި އެހެންކަމުން މިހާރުން މިހާރަށް ނާޒިމް މިނިވަންކުރަން ޖެހޭކަމަށް އެމްޑީޕީން ބުނެފި އެވެ.

ނާޒިމްގެ އެޕާޓްމަންޓުން ފެނުނު ފިސްތޯލުން އަދީބުގެ ޑީއެންއޭ ފެނުނުކަމަށް ފުލުހުން ރޭ ހާމަކުރުމާ ގުޅިގެން އެމްޑީޕީން މިރޭ ނެރުނު ބަޔާނެއްގައި ބުނީ، ނާޒިމްގެ އެޕާރޓްމެންޓުން ފެނުނުކަމަށް ބުނާ ހަތިޔާރާ ނާޒިމާ ގުޅުވޭނޭ އެއްވެސް ގޮތެއް ނެތްކަން މިހާރު ފުލުހުންގެ ތަހުގީގުން ވެސް ހާމަވެފައިވާ ކަމަށެވެ.

ނާޒިމް ޖަލަށް ހުކުމް ކޮށްފައިވަނީ ނާޒިމްގެ އާއިލާއިން ފޮރެންސިކް ތަހުލީލެއް ކުރުމަށް ބާރު އަޅަމުން ދަނިކޮށް ތަހުލީލު ކުރުމަކާއި ނުލައިކަން ފާހަގަކޮށް އެމްޑީޕީން ބުނީ، ހުކުމް ކުރިތާ ދޮޅުއަހަރަށް ވުރެ ގިނަ ދުވަސްވީ ފަހުން، ފުލުހުން ރޭ ކުއްލިގޮތަކަށް ހާމަކުރި މަޢުލޫމާތުން ނާޒިމް ފްރޭމްކޮށްފައިވާކަން އިތުރަށް ކަށަވަރުވާ ކަމަށް އެމްޑީޕީ އިން ބުންޏެވެ.

ސަރުކާރުން ދައުވާއެއް އުފުލައި ހުކުމެއް ކުރި އިރު، އެ މައްސަލައިގެ ތަހުގީގު ނުނިމޭ ކަމަށް، ހުކުމް ތަންފީޒުކުރަން ފެށިތާ ދޮޅު އަހަރުފަހުން ފުލުހުން ބުނުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫންކަމަށްވެސް އެމްޑީޕީން ބުންޏެވެ.

"ސަރުކާރުންނާއި ދައުލަތުން ބޭނުންވި ދައުވާއެއް މުހައްމަދު ނާޒިމްގެ މައްޗަށް އުފުލައި، ބޭނުންވިގޮތަށް ބޮޑު ހުކުމެއް އިއްވައި، އިތުރު ތުހުމަތެއްކޮށްފައި ނުވުމުން އިތުރަށް ހިންގަންޖެހޭ ތަހުގީގެއް އޮވެގެން ނުވާނޭއިރު، ދޮޅުއަހަރު ފާއިތުވިފަހުން ތަހުގީގު ނުނިމޭކަމަށް މޯލްޑިވްސް ޕޮލިސް ސާވިސުން ބުނުމަކީ ފުލުހުންގެ މުވައްސަސާއަކުން ބުނެވޭނޭ އެންމެ ދަށްފެންވަރުގެ ވާހަކައެވެ،" އެމްޑީޕީގެ ބަޔާނުގައި ބުންޏެވެ.

ނާޒިމްގެ މައްސަލައިގައި ކަން ހިނގާފައިވާ ގޮތަށް ބަލާއިރު ރާއްޖޭގެ ޖިނާއީ އަދުލުގެ ނިޒާމު ދަށަށް ގޮސްފައިވާކަން ހާމަވާކަމަށް ވެސް އެ ބަޔާނުގައި ބުންޏެވެ.