ނައިޖީރިޔާގައި ބޯކޯ ހަރާމުން ހިންގަމުންދާ ޖަރީމާތަކުގެ ސަބަބުން ގެދޮރު ދޫކޮށް ބާމާގެ ރެފިއުޖީ ކޭމްޕްތަކުގައި ދިރިއުޅޭ މީހުންގެ ތެރެއިން ބަނޑުހައި ހޫނު ކަމުގައި ދުވާލަކު ތިރީހަކަށް މީހުން މަރުވަމުންދާ ކަމަށް ރިޕޯޓުތައް ބުނެފި އެވެ.
ބޯކޯ ހަރާމުންދަނީ ނައިޖީރިޔާގެ ކުދިކުދި އަވަށްތަކުގައި ދިރިއުޅެމުންދާ މީހުންނަށް ގެދޮރު ދޫކޮށް ދާން މަޖުބޫރު ކުރަމުންނެވެ. މެޑިކަލް ޗެރިޓީ (އެމްއެސްއެފް) އިން ބުނީ ރެފިއުޖީ ކޭމްޕުތަކުގައި 24،000 ވަރަކަށް މީހުން ދިރިއުޅެމުންދާ ކަމަށާއި ފާއިތުވެދިޔަ މަހެއްހާ ދުވަސް ތެރޭގައި 200 އަށްވުރެ ގިނަ މީހުން ބަނޑަށް މަރުވެފައިވާ ކަމަށެވެ.
ކޭމްޕްތަކުގައި ދިރިއުޅޭ ކޮންމެ ފަސް ކުއްޖަކުން އެއް ކުއްޖަކަށް މާލްނިއުޓްރިޝަންގެ އަސަރުކުރަމުންދާ ކަމަށް އެމްއެސްއެފް އިން ބުނެ އެވެ. އެޓީމުން މިހާރުދަނީ ކޭމްޕްތަކުގައި ތިބި މީހުންނަށް ފަރުވާދީ އެހީތެރިކަން ފޯރުކޮށްދެމުންނެވެ.
އެމްއެސްއެފް އިން ބުނި ގޮތުގައި ބާމާގެ ކޭމްޕްތަކުގައި ދިރިއުޅެމުންދާ މީހުންގެ ސިއްހީ ހާލަތުވަނީ ނުރައްކާތެރި ފައްތަރެއްގަ އެވެ. އެދެވޭ ގޮތެއްގައި ފަރުވާ ނުކުރެވިއްޖެ ނަމަ ގިނަ ބަޔަކު މަރުވުމުގެ ފުރުސަތު ބޮޑެވެ. ބޯކޯ ހަރާމުން އަދިވެސް ދަނީ ނައިޖީރިއާގެ އަވަށްތަކަށް ހަމަލާދީ ހިސާރު ކުރަމުންނެވެ. އަދި އަވަށްތަކުގެ ގޯތިގެދޮރު ހަލާކުކޮށް ފެން ވަޅުތައް ބޭނުން ނުކުރެވޭނެ ގޮތަށް އަލިފާން ރޯކުރުން ވެސް ވަނީ ހައްދު ފަހަނައަޅާފަ އެވެ.