ޕީއެސްއެމްގެ މޯލްޑިވެސް މީޑިއާ އިންސްޓިޓިއުޓް (އެމްއެމްއައި)އާ ގުޅިގެން މީޑިއާގެ ދާއިރާއަށް މީހުން ބިނާކުރުމުގެ މަސައްކަތް ފެށުމަށް މޯލްޑިވްސް ބްރޯޑްކާސްޓިން ކޮމިޝަނުން ޕީއެސްއެމާ އެކު އެމްއޯޔޫއެއްގައި ސޮއިކޮށްފި އެވެ.
ބްރޯޑްކާސްޓިން މީޑިއާގެ އެކި ދާއިރާތަކަށް މީހުން ތަމްރީންކުރުމަށް މިއަދު ބްރޮޑްކޮމް އާއެކު ޕީއެސްއެމުން ސޮއިކޮށްފައިވާއިރު، އެކުންފުނީގެ ދަށުން ހިންގާ އެމްއެމްއައި އަކީ މީގެ ކުރިން ވެސް މީޑިއާގެ އެކި ކޯސްތައް ހިންގާ ތަނެކެވެ. މިއަދު ސޮއިކުރި އެއްބަސްވުމުގެ ދަށުން މީޑިއާގެ ދާއިރާ، ހާއްސަކޮށް ބްރޯޑްކާސްޓިން ދާއިރާގެ ކޯސްތައް ފުޅާ ދާއިރާއެއްގައި ހިންގާނެ ކަމަށް ޕީއެސްއެމުން ބުންޏެވެ.
މިއަދު ރޭޑިއޯ ބިލްޑިންގައި ބޭއްވި ރަސްމިއްޔާތެއްގައި އެއްބަސްވުމުގައި ސޮއިކުރެއްވީ ޕީއެސްއެމްގެ ފަރާތުން އެމްޑީ އިބްރާހިމް ހަލީލެވެ. ބްރޯޑްކާސްޓިން ކޮމިޝަނުން އެތަނުގެ ރައީސް މުހައްމަދު ޝަހީބެވެ.
މިއަދު ސޮއިކުރި އެއްބަސްވުމާ ގުޅިގެން ހަލީލް ވިދާޅުވީ، މީޑިއާގެ ދާއިރާގައި ނޫސްވެރިންގެ އިތުރުން އެތައް ފަންނެއްގެ ބަޔަކު މަސައްކަތްކުރާއިރު، އެ އެންމެންގެ އިލްމީ ފެންވަރު ކުރިއަށްޖެއްސުމަކީ ކޮންމެހެން ކުރަންޖެހިފައިވާ ކަމެއް ކަމަށެވެ. މިއަދު ސޮއިކުރި އެއްބަސްވުމުގެ އެންމެ ބޮޑު މަގުސަދަކީ އެއީ ކަމަށާއި، ކުރިމަގުގައި އުންމީދަކީ ރާއްޖޭގެ މީޑިއާގެ ދާއިރާގައި މަސައްކަތްކުރާ މީހުންނަކީ ދުނިޔޭގެ މެންވަރުގައި ބަލައިގަންނަ އިލްމީ ގާބިލު ބަޔަކަށް ހެދުން ކަމަށް ހަލީލް ވިދާޅުވި އެވެ.
ޝަހީބު ވިދާޅުވީ، ރާއްޖޭގެ މީޑިއާ ދާއިރާއަށް މިވަގުތު ދިމާވެފައިވާ އެންމެ ބޮޑު ގޮންޖެހުމަކީ ދާއިރާއަށް އެކަށޭނަ މިންވަރަށް އިލްމީ ގޮތުން ތަރައްގީވެފައިވާ މުވައްޒަފުން ނުލިބުން ކަމަށެވެ. އެހެން ނަމަވެސް މިއަދު އެ ދެފަރާތުން ސޮއިކުރި އެއްބަސްވުމުގެ ދަށުން، މީޑިއާގެ ދާއިރާއިން މީހުން ތަމްރީނުކުރުމަށް ގިނަ މަޝްރޫތަކެއް ފެށިގެންދާނެ ކަމަށާއި، އޭގެ ސަބަބުން ކުރިއަށް އޮތްތަނުގައި މީޑިއާގެ ދާއިރާގައި މަސައްކަތްކުރާ މީހުންނަށް ގަދަރުވެރި ކޮލިޓީ ރަނގަޅު މަސައްކަތްތަކެއް ކުރުމުގެ ފުރުސަތު ލިބިގެންދާނެ ކަމަށެވެ.
"އެނގިވަޑައިގަންނަވާނެ، ސަރުކާރުން ދޭ ސްކޮލާޝިޕާއި ލޯނުތަކާއި މިފަދަ ކަންކަން ވެސް ބޮޑަށް ބިނާވެފައި މި އޮންނަނީ ތައުލީމާއި ސިއްހަތާއި އެނޫންވެސް މިފަދަ އެކި ދާއިރާތަކަށް. މި ދާއިރާއަކީ އެފަދަ ޕްރޮގްރާމްތަކުންވެސް އިސްކަން ނުދެވި ބާކީކޮށްލެވިފައި އޮތް ދާއިރާއެއް. އެކަން ބަދަލުކުރުމަށް އަޅުގަނޑުމެން މި މަސައްކަތް ފެށީ،" ޝަހީބް ވިދާޅުވި އެވެ.
ޕީއެސްއެމުން ބުނީ މިއަދު ސޮއިކުރި އެއްބަސްވުމުގެ ދަށުން ވަރަށް އަވަހަށް ތަމްރީން ކޯސްތަކެއް ފަށާނެ ކަމަށެވެ. ކުރިއަށް އޮތްތަނުގައި އެމްއެމްއައި އިން މާސްޓާސް ފެންވަރުގެ ކޯސްތައްވެސް ތައާރަފްކުރާނެ ކަމަށް ވެސް އެކުންފުނިން ވަނީ ބުނެފަ އެވެ.