ވޭލްސް 2-0އިން ބަލިކޮށް ޔޫރޯ ފުޓްބޯޅަ މުބާރާތުގެ ފައިނަލަށް ޕޯޗުގަލް ދަތުރުކޮށްފި އެވެ.
މި މެޗުގައި ވޭލްސް ކޮޅަށް ގާތްގާތުގައި ލަނޑު ޖަހައިދިނީ ކްރިސްޓިއާނޯ ރޮނާލްޑޯ އާއި ލުއިސް ނާނި އެވެ. ރޮނާލްޑޯ 50 ވަނަ މިނިޓްގައި ލަނޑު ޖަހާފައިވަނިކޮށް ނާނި ލަނޑު ޖެހީ އޭގެ ތިން މިނިޓް ފަހުންނެވެ.
މިއީ އަމިއްލަ ގައުމުގައި 2004 ވަނަ އަހަރު ބޭއްވި މުބާރާތުގެ ފައިނަލުގައި ހައިރާންކުރުވަނިވި ގޮތަކަށް ގްރީސް އަތުން ބަލިވި ފަހުން ބޮޑު މުބާރާތެއްގެ ފައިނަލަށް ޕޯޗުގަލް ދަތުރުކުރި ފުރަތަމަ ފަހަރެވެ. އަދި މިއީ މި ފަހަރުގެ މުބާރާތުގައި މިހާތަނަށް ކުޅުނު ހަ މެޗުގެ ތެރެއިން 90 މިނިޓްގައި ޕޯޗުގަލް ނަތީޖާ ނެރުނު ފުރަތަމަ މެޗެވެ. ކުއާޓާ ފައިނަލާއި ދެ ވަނަ ބުރުން އެ ޓީމު ސަލާމަތްވީ ޕެނަލްޓީ ޖަހައިގެންނެވެ.
އަނިޔާ އާއި ސަސްޕެންޝަނުގެ ސަބަބުން ދެ ޓީމު ވެސް ކުޅުނީ މުހިންމު ބައެއް ކުޅުންތެރިން ނެތި އެވެ. މީގެ ތެރެއިން ވޭލްސްގެ އާރޮން ރަމްސޭ ނެތްތަން ވަރަށް ބޮޑަށް ދެއްކި އެވެ.
މުބާރާތުގެ ފައިނަލުގައި ޕޯޗްގަލް ވާދަކުރާނީ މުބާރާތް ބާއްވާ ގައުމު ފްރާންސް އާއި ދުނިޔޭގެ ޗެމްޕިއަން ޖަރުމަނު މިރޭ ކުޅޭ ސެމީ ފައިނަލް މެޗުން މޮޅުވާ ޓީމަކާ އެވެ.
ވޭލްސް މުބާރާތުގެ ސެމީ ފައިނަލަށް ދިޔައިރު މިއީ 1958ގެ ފަހުން ބޮޑު މުބާރާތެއްގައި އެ ގައުމު ވާދަކުރި ފުރަތަމަ ފަހަރެވެ. މިހެންވެ ސެމީ ފައިނަލަށް ދެވުމަކީ ވޭލްސްގެ އެފްއޭއިން ގަބޫލު ކުރާ ގޮތުގައި ވަަރަށް ބޮޑު ކާމިޔާބީއެކެވެ.