ލޯކަލް ގަވަމެންޓް އޮތޯރިޓީ (އެލްޖީއޭ) ބޯޑްގެ ރައީސް ކަމަށް ހޯމް މިނިސްޓަރު އަދި އެ އޮތޯރިޓީގެ ބޯޑް މެންބަރު އަހުމަދު ޒުހޫރު އިންތިހާބުކޮށްފި އެވެ.
އެ މަގާމަށް ޒުހޫރު އިންތިހާބު ކުރީ މިއަދު ބޭއްވި މި އަހަރުގެ އެބޯޑްގެ ނުވަ ވަނަ ބައްދަލުވުމުގައި މިއަދު ބައިވެރިވެ ވަޑައިގެންނެވި ހަތް މެންބަރުންގެ އިއްތިފާގުންނެވެ. ނުވަ މެންބަރުން ތިއްބަވާ ބޯޑުގެ އެ މަގާމަށް ވާދަ ކުރެއްވީ ވެސް ޒުހޫރު އެކަންޏެވެ.
އެލްޖީއޭ އުފެދުނީއްސުރެ ކޯޅުންތައް ގިނަކޮށް އޮންނަ އެ ބޯޑްގައި ޒުހޫރު ހިމެނި ވަޑައިގަންނަވަނީ އެ ބޯޑަށް ރައީސުލް ޖުމްހޫރިއްޔާ އައްޔަން ކުރައްވާ މެންބަރުގެ ގޮތުގައެވެ. އެލްޖީއޭގެ ބޯޑުގެ ރައީސް ކަމުގައި އެންމެ ފަހުން ހުންނެވީ ކުރީގެ ހޯމް މިނިސްޓަރު އުމަރު ނަސީރެވެ.