ކުރިއަށް އޮތް 24 ގަޑިއިރު ތެރޭގައި އުތުރާއި މެދު ރާއްޖެއަށް ވައިގަދަވެ ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާއިން ބުނެފި އެވެ. އުތުރާއި މެދު ރާއްޖެއަށް މޫސުން ގޯސްވި ނަމަވެސް ދެކުނަށް މޫސުން ގޯހެއް ނުވާނެ އެވެ.
މެޓް އޮފީހުން ބުނީ، މެދު ރާއްޖެ ތެރެއަށާއި އުތުރުގެ އަތޮޅުތަކަށް ގަދަ ވަޔާއެކު ބޯކޮށް ވިއްސާރަކުރާނެ ކަމަށެވެ. ވިއްސާރަކުރާނީ ގުގުރުމާއެކު ކަމަށް ވެސް މެޓުން ބުންޏެވެ.
މެޓުން ލަފާކޮށްފައިވާ ގޮތުގައި 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ އެވެ. އަދި ކޮޅުގަނޑުގައި 40 މޭލަށް ވައިޖެހޭނެ ކަމަށް ވެސް މެޓުން ވަނީ ލަފާކޮށްފަ އެވެ.
މޫސުން ގޯސްވުމުގެ ސަބަބުން ކަނޑުތައް ވެސް ގަދަވެފައިވާއިރު، ކަނޑު އުޅަނދު ދުއްވާ ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފަ އެވެ. އެމްއެންޑީއެފްއިން ވެސް ވަނީ ކަނޑު ދަތުރުފަތުރުކުރުމުގައި ސަމާލުވުމަށް އިލްތިމާސްކޮށްފަ އެވެ.
އުތުރަށާއި މެދު ރާއްޖެއަށް ކުރަމުންދާ ވިއްސާރައަކީ ތޫފާނެއްގެ ނުވަތަ ކޮޅިގަނޑެއްގެ ވިއްސާރައެއް ކަމަށް ލަފާނުކުރެވޭ ކަމަށް ވެސް މެޓުން ވަނީ ބުނެފަ އެވެ.