ހޯމޯންގެ ސަބަބުން، ހާއްސަކޮށް ހަކުރުބަލީގެ ސަބަބުން ނާރުތަކާއި ލޭ ހޮޅިތަކަށް ލިބޭ ގެއްލުންތައް ޓެސްޓުކުރާ ލެބޯޓްރީއެއް އޭޑީކޭ ހޮސްޕިޓަލްގައި ހުޅުވައިފި އެވެ.
އޭޑީކޭ ހޮސްޕިޓަލްގައި މިއަދު ހުޅުވި އެންޑޯކްރައިން ލެބޯޓްރީއަކީ ހޯމޯންގެ ސަބަބުން ނާރުތަކާއި ލޭހޮޅިތަކަށް ލިބޭ އުނިކަންތަކާއި މައްސަލަ ދެނެގަތުމަށް ހަދާ އެކި ޓެސްޓުތައް ހެދުމަށް ރާއްޖޭގައި ހުޅުވާ މިފަދަ ފުރަތަމަ ކްލިނިކެވެ. ހާއްސަކޮށް ހަކުރު ބަލީގެ ސަބަބުން ލޭގައި ހުންނަ ހަކުރު ކޮންޓްރޯލް ނުކުރެވި ދުވަސް ވުމުން، އަތް ފައިގެ ނާރުތައް ހަލާކުވެ އިހުސާސްވާ މިންވަރު ކުޑަވާން ދިމާވާ މައްސަލަ އެ ކްލިނިކުން ޓެސްޓު ކުރެވޭނެ އެވެ.
މިއަދު ހުޅުވި އެންޑޯކްރައިން ލެބޯޓްރީއާ ގުޅިގެން އޭޑީކޭގެ ޗީފް މެޑިކަލް އޮފިސާ ޑރ. އަބްދުﷲ ނިޔާފް ވިދާޅުވީ، ލޭހޮޅިތަކާއި ނާރުތަކުގައި މައްސަލަޖެހި، ބައެއް ފަހަރަށް ނާރުތައް ނެތިގެން ދިއުމަކީ ހަކުރު ކޮންޓްރޯލް ނުކުރެވުމުގެ ސަބަބުން، ހަކުރު ބަލި ހުންނަ މީހުންނަށް ދިމާވާ ނުރައްކާތެރި މައްސަލައެއް ކަމަށެވެ. އޭގެ ސަބަބުން ބައެއް ގުނަވަންތައް، ހާއްސަކޮށް، ފައިތިލަ ފަދަ ގުނަވަންތަކުގެ ހިއްސު ކެނޑި، ގުނަވަންތައް ބުރިކޮށްލަންޖެހޭ ހާލަތުވެސް މެދުވެރިވާ ކަމަށާއި، އެންޑޯކްރައިން ލެބޯޓަރީގެ ސަބަބުން އެ ފަދަ މައްސަލަތައް އަވަހަށް ދެނެގަނެ ރައްކާތެރިވުމުގެ ފިޔަވަޅު އަޅަން މަގު ފަހިވާނެ ކަމަށެވެ.
ނިޔާފު ވިދާޅުވީ އެ ލެބޯޓްރީ އިން މިހާރު ހެދޭ ޓެސްޓުތަކުގެ ތެރޭގައި ގުނަވަނެއްގެ ވަކި ވަކި ތަންތަނުގައި ނާރުތަކުގެ މަސައްކަތްކުރުން ހުރި މިންވަރާއި އިހުސާސް ކުރުމުގެ މިންވަރު ހުރި ވަރު ދެނެގަތުން ހިމެނޭ ކަމަށެވެ. އޭގެ ސަބަބުން ބަލި ގޯސް ނުވަނީސް މައްސަލަތައް ދެނެގަނެ، ކޮންޓްރޯލް ކުރަން އިތުރު މަސައްކަތް ކުރުމުގެ ފުރުސަތު ފަހިވެގެންދާ ކަމަށެވެ.
".. ދުނިޔޭގެ ނިސްބަތަށް ބަލާނަމަވެސް ފައި ބުރިކޮށްލަން ޖެހޭ ގިނަ ކޭސް ތަކަކީ ހަކުރުބަލީގެ ސަބަބުން އަންނަ ކޭސް ތަކެއް. މިއަދު މި ތައާރަފްކުރާ ހިދުމަތުގެ ސަބަބުން ގުނަވަންތަކުގެ ނާރުތަކާއި ލޭހޮޅިތަކަށް ހަކުރުބަލީގެ ސަބަބުން ލިބޭ ގެއްލުންތައް ދުރާލާ ދެނެގަނެވި އެ މައްސަލަތައް ކުޑަކޮށް، އެކަމުން ސަލާމަތްވާން ކުރަންޖެހޭ މަސައްކަތްތަކަށް ވަގުތު އޮއްވައި ފުރުސަތު އެބަ ލިބޭ،" ނިޔާފް ވިދާޅުވި އެވެ.
ހޯމޯންގެ ސަބަބުން ނާރުތަކަށް ދިމާވާ މައްސަލަތައް ޓެސްޓުކުރާ އެ ލެބޯޓްރީ ފަށައިގަންނަނީ ހަމައެކަނި ހަކުރު ބަލީގެ ސަބަބުން ނާރުތަކަށް ދިމާވާ މައްސަލަތައް ދެނެގަންނަ ޓެސްޓުތަކާއެކު އެވެ. ނަމަވެސް ކުރިއަށް އޮތްތަނުގައި އާ ޓެސްޓުތަކެއް ތައާރަފްކުރާނެ ކަމަށް އޭޑީކޭ އިން ވަނީ ބުނެފަ އެވެ. އޭޑީކޭ އެންޑޮކްރައިން ލެބޯޓްރީގެ ހިދުމަތް ކޮންމެ ދުވަހަކުވެސް ހަވީރު 3:00 އިން ފެށިގެން އެ ހޮސްޕިޓަލުން ދޭނެ އެވެ.