ރާއްޖޭގެ ފުރަތަމަ ވެކޭޝަންސް އެކްސްޕޯ މިއަދު ހުޅުވަނީ

ރާއްޖޭގައި ބާއްވާ ފުރަތަމަ ޓްރެވަލް ފެއާ ކަމަށްވާ "ވެކޭޝަންސް އެކްސްޕޯ" މިއަދު ހުޅުވާނެ އެވެ.

ނޭޝަނަލް އާޓްގެލަރީގައި ހޮނިހިރު ދުވަހުގެ ނިޔަލަށް ކުރިއަށް ގެންދާ މި ފެއާގައި 35 ފަރާތަކުން ބައިވެރިވެފައިވެ އެވެ. މީގެ ތެރޭގައި ރާއްޖެ އާއި ރާއްޖޭން ބޭރުގެ ގިނަ ފަރާތްތަކެއް ހިމެނެ އެވެ. ފެއާގައި ބައިވެރި ވެފައިވާ ހާއްސަ ބައެއް ފަރާތްތަކުގެ ތެރޭގައި މެލޭޝިޔާ ޓޫރިޒަމް ބޯޑާއި ސިންގަޕޯ ޓޫރިޒަމް ބޯޑު ހިމެނެ އެވެ.

މި ފެއާއަށް ޒިޔާރަތްކުރާ މީހުންނަށް ގިނަ އިނާމުތަކެއް ހުށަހަޅާފައިވެ އެވެ. މި ގޮތުން ފެއާ އޮންނަ ކޮންމެ ރެއަކު ވެސް އަށް ވަރަކަށް ލަކީޑްރޯ ނެގުން އޮންނާނެ އެވެ. ލަކީޑްރޯ އިން ހުށަހަޅާފައިވާ އިނާމުތަކުގެ ތެރޭގައި ތައިލޭންޑުގެ ޕުކެޓާއި ސިންގަޕޫރު އަދި މެލޭޝިޔާގައި ޗުއްޓީ ހޭދަ ކުރުމަށް ދޭ ޕެކޭޖުތައް ހިމެނެ އެވެ. މީގެ އިތުރުން ގެސްޓް ހައުސްތަކުންނާއި ރިސޯޓުތަކުން ވެސް ޗުއްޓީ ހޭދަ ކުރުމަށް ޕެކޭޖުތައް ހުށަހަޅާފައިވެ އެވެ.

"ވެކޭޝަންސް އެކްސްޕޯ" އިންތިޒާމު ކުރާ ހައިރައިޒްއިން ބުނި ގޮތުގައި ފެއާ ހުޅުވުމަށް ހަމަޖެހިފައިވަނީ މިއަދު 2:30 ގަ އެވެ. އަދި ފެއާ ހުޅުވިފައި ހުންނާނީ މާދަމާ ނޫން އެހެން ދުވަސްތަކުގެ ހަވީރު 4:00 އިން 6:00 އަށް އަދި ރޭގަނޑު 8:00 އިން ރޭގަނޑު 11:00 އަށެވެ.