އަންނަ މަހު ބާއްވާ، ވެކޭޝަންސް އެކްސްޕޯގެ ކޯ-ސްޕޮންސަރަކަށް ތައިލެންޑް ޓޫރިޒަމް އޮތޯރިޓީ ހަމަޖައްސައިފި އެވެ.
ވެކޭޝަން އެކްސްޕޯ ބާއްވާ، ހައިރައިސް އިން ބުނީ އަންނަ މަހުގެ ހަވަނަ ދުވަހުން އަށް ވަނަ ދުވަހަށް މާލޭގައި ވެކޭޝަންސް އެކްސްޕޯގެ ގޯލްޑް ޕާޓްނަރަކަށް ޓޫރިޒަމް އޮތޯރިޓީ އޮފް ތައިލޭންޑް ހަމަޖެހިފައިވާ ކަމަށާއި މިއީ ބޮޑު ކާމިޔާބީއެއް ކަމަށެވެ.
ދަތުރުރާވާ އިންތިޒާމުކުރާ ފަރާތްތަކަށް ހާއްސަކޮށް ބާއްވާ މި ފެއާގެ ކޯ ސްޕޮންސަރަކަށް ސްރީލަންކާގެ މަޝްހޫރު "ދަ ކިންގްސްބަރީ" އާއި އަމާރާ ރިސޯޓު ވެސް ހަމަޖެހިފައިވެ އެވެ.
ހައިރައިޒްއިން ބުނީ ރާއްޖޭގައި ބާއްވާ ފުރަތަމަ ޓްރެވަލް ފެއާގައި ގިނަ އެއާލައިން ތަކެއް ތަމްސީލްކުރާ ވޮޔޮޖަސް މޯލްޑިވްސްގެ އިތުރުން ކްރެކަން އެޑްވެންޗާސް އާއި ރިވަރީސް ގެސްޓް ހައުސް އަދި ވިނޯވާ ބައިވެރިވެފައިވާ ކަމަށެވެ. އަދި މީގެ އިތުރުން މި އަހަރު ހައްޖު ކޯޕަރޭޝަންގެ އިތުރުން މުފައްސިރީން ގްރޫޕުން ބައިވެރިވެ އެވެ.
މިދިޔަ އަހަރު ބޭއްވި ވެކޭޝަންސް އެކްސްޕޯއަށް 5،000 އަށްވުރެ ގިނަ މީހުން ގޮސްފައި ވެއެވެ. އަދި މި ފެއާއަށް ޒިޔާރަތް ކުރި މީހުންނަށް ގިނަ އިނާމުތަކެއް ވެސް ހުށަހެޅި އެވެ.