މަޝްހޫރު ލަވަކިޔުންތެރިޔާ ޖެނިފާ ލޮޕޭޒް ތިން ވަނަ ދަރިއަކަށް ބަލިވެ އިނދެއްޖެ އެވެ.
އުމުރުން 47 އަހަރުގެ ޖެނިފާ އާއި ލޯބީގެ ގޮތުން ގުޅިގެން އުޅޭ ކޮރިއޮގްރާފާ ކެސްޕާ ސްމާޓް 29، ގެ ދަރިއަކަށް ބަލިވެއިންކަން ދެމީހުން ޔަގީންކޮށްދީފައިވާ ކަމަށް ހޮލީވުޑްގެ ހަބަރުތައް ގެނެސްދޭ ބައެއް ނޫސްތަކުގައިވެ އެވެ.
ދެހާސް އެގާރަވަނަ އަހަރުން ފެށިގެން ޖެނިފާ ލޯބީގެ ގޮތުން ގުޅިގެން އުޅޭ ކެސްޕާ އަށް ފުރަތަމަ ދަރިފުޅު ލިބެން އުޅޭކަމުގެ ވާހަކަތައް ދެކެވެމުން އަންނައިރު، މި ދެމީހުން ވަރަށް އަވަހަށް ކައިވެނިކުރަން އުޅޭ ކަމަށްވެސްވެ އެވެ. އެގޮތުން ޖެނިފާ ބަލިވެއިންކަން ދެމީހުންނަށް އެނގުމުން ވަނީ އޭނާ ވިހައި ގަދަވުމުން ކައިވެނިކުރާ ގޮތަށް ނިންމާފަ އެވެ.
މީގެކުރިން ތިން ކައިވެންޏެއް ކޮށްފައިވާ ޖެނިފާ. މަޝްހޫރު ލަވަކިޔުންތެރިޔާ މާކް އެންތަނީއާ ކައިވެނިކޮށްގެން ވަނީ ޓްވިންސްއެއް ލިބިފަ އެވެ. އެމޭ އާއި މެކްސްގެ އުމުރަކީ ހަތް އަހަރެވެ.
ޖެނިފާ ބަނޑޮބޮޑުކަން ޔަގީންވުމުން އޭނާއާ ކެސްޕާ ތިބީ ވަރަށް އުފަލުން ކަމަށް އެދެމީހުންގެ ގާތްފަރާތަކުން ބުނެފައިވާ ކަމަށް ނޫސްތަކުގައިވެ އެވެ. ކެސްޕާ ބޭނުންވަނީ ފިރިހެން ކުއްޖެއް ކަމަށާއި ނަމަވެސް ޖެނިފާގެ އުމުރުން މިހާރު އެހާ ދުވަސްވެފައި ވުމުން އޭނާ ބޭނުންވަނީ އެމީހުންނަށް ލިބޭ ކުއްޖަކީ ސިއްހަތު ރަނގަޅު ކުއްޖަކަށް ވުން ކަމަށް އެފަރާތުން ބުނެފައިވެ އެވެ.
ޖެނިފާ ބަލިވެއިން އިންތާ ކިހާ ދުވަހެއް ވެފައިވާ ކަން އަދި ޔަގީންނުވާއިރު، އޭނާ ވިހާނެ ދުވަހެއްވެސް އަދި ހާމަކޮށްފައިނުވާ ކަމަށްވެ އެވެ.