ދެހާސް ސާދަ ވަނަ އަހަރު ގައުމީ ޔުނިވަސިޓީ، (އެމްއެންޔޫ) ގެ ކޯސްތަކަށް ލިބުނު ސާޅީސް މިލިއަނަށްވުރެ ގިނަ ރުފިޔާ މާލިއްޔަތުގެ ގަވާއިދާ އެއްގޮތަށް އެ ޔުނިވަސިޓީގެ ކޭޝް ރަޖިސްޓްރީގައި ރިކޯޑްކޮށްފައި ނުވާކަމަށް އޮޑިޓާ ޖެނަރަލްގެ އޮފީހުން ބުނެފި އެވެ.
ޔުނިވަސިޓީއަށް 2014 ވަނަ އަހަރު 40،700،643ރ. ކޯސް ފީގެ ގޮތުގައި ލިބިފައިވާ ކަމަށް އެ އަހަރުގެ ފައިނަލް މާލީ ބަޔާނުގައި ބުނެފައިވެ އެވެ. ނަމަވެސް އެ ފައިސާގެ ރިކޯޑްތައް ޔުނިވަސިޓީއަށް އެކި ކަންކަމުން ލިބޭ ފައިސާގެ ތަފްސީލް ހިމަނަންޖެހޭ ރަޖިސްޓްރީގައި ނެތް ކަމަށެވެ.
ޔުނިވަސިޓީން 2014 ވަނަ އަހަރު ފައިސާގެ މުއާމަލާތްތައް ބަލަހައްޓާފައިވާ ގޮތް ދިރާސާކޮށް އެކުލަވާލާފައިވާ އޮޑިޓް ރިޕޯޓުގައި ބުނެފައިވަނީ، ދައުލަތުގެ ކޮންމެ ތަނެއްގައި އެތަނަކަށް ފައިސާ ލިބޭ ކަންތައް ތަފްސީލުކޮށް އެނގޭނެ ފަދަ ރިކޯޑެއް އޮންނަން ވާނެ ކަމަށް ބަޔާންކޮށްފައިވީ ނަމަވެސް އެފަދަ ރިކޯޑެއް އެންމްއެންޔޫ އިން ބަލަހައްޓާފައި ނުވާ ކަމަށެވެ. އެގޮތުން ޔުނިވަސިޓީން ހިންގާ އެކި އެކި ކޯސްތަކަށް ނަގާ ފީތަކުގެ ތަފްސީލް އެއް ގޮތަކަށް ވެސް ހިމަނާފައި ނުވާކަން ރިޕޯޓުގައި ފާހަގަކޮށްފައި ވެއެވެ.
ޔުނިވަސިޓީގެ 2014 ވަނަ އަހަރުގެ މާލީ ހިސާބުތައް ގަވާއިދާ އެއްގޮތަށް ބަލަހައްޓާފައި ނެތްކަމުގެ ގިނަ މައްސަލަތަކެއް އޮޑިޓް ރިޕޯޓުގައި ފާހަގަކޮށްފައިވާއިރު، މާލިއްޔަތު ބަޔާނުގައި ބުނެފައިވަނީ، ސަރުކާރު ތަންތަނުން ތައްޔާރުކުރާ މާލީ ބަޔާންތައް އަހަރު ނިމުމުން ފިނޭންސް މިނިސްޓްރީއަށް ހުށަހަޅަންވާނެ ކަމަށެވެ. އަދި އެ ރިޕޯޓްތަކުގައި އެ ފައިސާއެއް ނަގަންޖެހުނު ސަބަބާއި، ލިބުނު ފައިދާއެއްނަމަ ލިބުނު ސަބަބު ތަފްސީލާއި ރިފަރެންސް ނަންބަރާ އެކު ތާރީހު ވެސް ޖަހާފައި ލިޔުމަށެވެ.