ކޮރަޕްޝަންގެ މައްސަލަތައް ތަހުގީގު ކުރުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްލަވަނީ އެކަން ކުރި މީހާއަށް ނޫން ކަމަށާއި އެ މީހަކު ކުރި އަމަލަށް ކަމުގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ދައުލަތުގެ މީޑިއާގެ ޕްރޮގްރާމެއްގައި އަބްދުއްރަހީމް ރޭ ވިދާޅުވީ ވޭތުވެދިޔަ ސަރުކާރުތަކުގައި ހިންގާފައިވާ ކޮރަޕްޝަންގެ ސަބަބުން ވަރަށް ގިނަ ފައިސާ ދައުލަތުން ގެއްލިފައިވާ ކަމަށާއި އެ ފައިސާ ހޯދަން ކުރީގެ ސަރުކާރުތަކުން އެކަށީގެންވާ ވަރަށް މަސައްކަތްކޮށްފައި ނުވާ ކަމަށެވެ.
ގައުމާއި ދައުލަތަށް ހިޔާނާތްތެރިވުމުން އެ މައްސަލަ ބަލަން ޖެހޭ ކަމަށާއި އެއީ ކުރީގެ ވެރިއެއްތޯ ބަލަން ނުޖެހޭ ކަމަށް އަބްދުއްރަހީމް ވިދާޅުވި އެވެ.
"އެއީ ކުރީ ސަރުކާރުގެ ވަޒީރެއްތޯ؟ އެއީ ކުރީ ސަރުކާރުގެ ވެރިއެއްތޯ؟ އެއީ ކުރީގެ ރައީސެއްތޯ؟ ނައިބުރައީސެއްތޯވެސް ބަލާކަށް ނުޖެހޭ،" އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވި ގޮތުގައި ކަން ކުރި މީހާއަށް ބެލުމުގެ ބަދަލުގައި ބަލަންވީ ކުރި ކަމަކަށެވެ.
"ރައީސް ޑރ. މުހައްމަދު މުއިއްޒުގެ އަމާޒަކީ އެކަން ކުރީ ކާކުތޯ ބެލުމެއް ނޫން. އެ ކުރީ ކޮން ކަމެއްތޯ އެކަން ކުރީ ހަމައިންތޯ ނަހަމައިންތޯ ގާނޫނާ އެއްގޮތަށްތޯ ގާނޫނާ ހިލާފަށްތޯ މާލިއްޔަތު ގާނޫނުން އެކަން ކުރަން ތަންދޭތޯ ނުދޭތޯ އޭގައި ދައުލަތަށް ވަނީ ކިހާވަރެއްގެ ގެއްލުމެއްތޯ އެ ގެއްލުންވީ ކާކުގެ ސަބަބުންތޯ؟ އެ ހިސާބުން ކާކު މި ތަނަށް އަންނަނީ،" އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވީ ކޮރަޕްޝަން ހުއްޓުވުމަށް އެއްވެސް ސަރުކާރަކުން މަސައްކަތް ނުކުރާ ވަރަށް މި ސަރުކާރުން މަސައްކަތް ކުރާނެ ކަމަށް ރައީސް މުއިއްޒު ވިދާޅުވެފައިވާ ކަމަށާއި ދައުލަތުން ގެއްލިފައިވާ ފައިސާ ހޯދުމަކީ ރައީސްގެ ވައުދެއް ކަމަށެވެ.