އަބުރު ރައްކާތެރި ކުރުމުގެ ގާނޫނަށްވުރެ ބޮޑު ހަދިޔާއެއް ކުރިޔަށް އޮތް ޖީލުތަކަށް ފޯރުކޮށް ނުދެވޭނެ ކަމަށް ހޯމް މިނިސްޓަރު އަޒްލީން އަހުމަދު ވިދާޅުވެއްޖެ އެވެ. ޓީވީއެމްގެ "ރާއްޖެ މިއަދު" ޕްރޮގްރާމްގައި މިރޭ ވާހަކަފުޅު ދައްކަވަމުން އަޒްލީން ވިދާޅުވީ އަބުރު ރައްކާތެރި ކުރުމާބެހޭ ގާނޫނަކީ ހިޔާލު ފާޅު ކުރުމުގެ މިނިވަން ކަމަށް އެޅޭނެ ހުރަހެއް ނޫން ކަމަށެވެ.
އަދި ވިދާޅުވީ އެ ގާނޫނުގައި ތެދެއް ފާޅުކޮށްގެން އެއްވެސް ޖޫރިމަނާއެއް ވެސް ނޫނީ ބަންދަކާ ހަމައަށް ދާން އެއްވެސް ރައްޔިތަކަށް ނުޖެހޭނެ ކަމަށެވެ. މިނިސްޓަރު އަޒްލީން ވިދާޅުވީ އަބުރުގެ ގާނޫނަކީ ތަހުޒީބު މުޖުތަމައުއަކަށް ދާން ލިބުނު ރަނގަޅު ގާނޫނެއް ކަމަށާއި އެ ގާނޫނަށް ވުރެ ބޮޑު ހަދިޔާއެއް ކުރިޔަށް އޮތް ޖީލުތަކަށް ނުދެވޭނެ ކަމަށެވެ.
"މި ގާނޫނަކީ ދިވެހި ރައްޔިތުންނަށް ލިބުނު ވަރަށް ބޮޑު ނަސީބެއް، އަޅުގަނޑުމެންގެ އަންނަން އޮތް ޖީލުތަކަށް ސަރުކާރަށާއި އިދިކޮޅު ފަރާތްތައް އަދި އާންމު ރައްޔިތުންނަށް ލިބޭ ހިތްހަމަޖެހުމަކަށް ވާނެ. މުސްތަގުބަލު އަންނަން ތިބި އަޅުގަނޑުމެންގެ ތުއްތު ކުދިންނަށް މިއަދު މި ކޮށައި ދެވުނީ ވަރަށް ރީތި މަގެއް. އެ މަގުން އަޅުގަނޑުމެން ދަތުރުކޮށްފިއްޔާ މި ގައުމަކީ ތަހުޒީބު ރިވެތި އަހުލާގީ މިންގަނޑުތައް ހުންނަ ގައުމަކަށް ވާނެ،" އަޒްލީން ވިދާޅުވި އެވެ.
މިނިސްޓަރު ވިދާޅުވީ ގާނޫނު ތަންފީޒު ކުރުމުގައި ސަރުކާރު އޮތީ ސާބިތުވެ ކަމަށާއި އަބުރުގެ ގާނޫނުގެ ތެރެއިން އަންނަ ކަންކަން ވެސް ތަންފީޒު ކުރާނެ ކަމަށެވެ.