އައިއެސްޑީބީޓީ ޕްރޮޖެކްޓާބެހޭ ގޮތުން ޖައިކާއާއެކު ހޯމް މިނިސްޓަރު މަޝްވަރާ ކުރައްވައިފި

ރާއްޖޭގައި ގާއިމުކުރަން މަސައްކަތް ކުރާ އިންޓަގްރޭޓެޑް ސާވިސަސް ޑިޖިޓަލް ބްރޯޑްކާސްޓިން ޓެރެސްޓްރިއަލް (އައިއެސްޑީބީޓީ) ޕްރޮޖެކްޓްގެ މަސައްކަތް ހިނގަމުންދާ ގޮތުގެ މައުލޫމާތު ހޯމް މިނިސްޓަރު އަޒްލީން އަހުމަދު ސާފު ކުރައްވާ ޖަޕާން އިންޓަނޭޝަނަލް ކޯޕަރޭޝަން އޭޖެންސީ (ޖައިކާ) އާއެކު މިއަދު މަޝްވަރާ ކުރައްވައިފި އެވެ.

ހިލޭ އެހީގެ ދަށުން ރާއްޖޭގައި ގާއިމުކުރުމަށް ހަމަޖެހިފައިވާ އައިއެސްޑީބީޓީ ޕްރޮޖެކްޓްގެ މަސައްކަތް ހިނގަމުންދާގޮތާއި ބެހޭގޮތުން މަޝްވަރާކޮށް މިނިސްޓަރު އަޒްލީ މައުލޫމާތު އޮޅުން ފިލުއްވެވި އިރު މިޕްރޮޖެކްޓަކީ ރާއްޖޭގައި ޑިޖިޓަލް ޓެރެސްޓްރިއަލް ބްރޯޑްކާސްޓިން މިހާރަށްވުރެ ފުޅާކޮށް، ޒަމާނީ ގޮތްތަކަށް އެންމެހާ ރައްޔިތުންނަށް ޚިދުމަތްދިނުމަށްޓަކައި، ޑިޖިޓަލް ބްރޯޑްކާސްޓިން ޓެކުނޮލޮޖީއެއްގެ އެހީގައި ޤާއިމް ކުރެވޭ ނެޓްވޯކެކެވެ.

މިނެޓްވާކް މެދުވެރިކޮށް ބްރޯޑްކާސްޓްކުރުމުގެ ފުރުސަތު ރާއްޖޭގެ ބްރޯޑްކާސްޓަރުންނަށް ލިބިގެންދާނެ އެވެ. މިއީ 2014 ވަނަ އަހަރު ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ޖަޕާނަށް ކުރެއްވި ދަތުރުފުޅުގައި ޖަޕާނުގެ ބޮޑުވަޒީރާއެކު ސޮއިކުރެއްވި ޖޮއިންޓް ސްޓޭޓްމަންޓް އެއްބަސްވުމުގެ ދަށުން އައި ޕްރޮޖެކްޓެކެވެ.