މާވެލް ސުޕަހީރޯއިންގެ އާދަޔާހިލާފު ލަޝްކަރު، އެވެންޖާސްގެ ތިން ވަނަ ފިލްމުން "ގާޑިއަންސް އޮފް ދަ ގެލެކްސީ" ގެ ސުޕަހީރޯއިން ފެނިގެންދާނެ ކަމަށް އެކްޓަރު ވިން ޑީޒެލް ބުނެފި އެވެ.
އޭނާ އަކީ މާވެލް ސްޓޫޑިއޯގެ "ގާޑިއަންސް އޮފް ދަ ގެލެކްސީ" ގައި ފެނިގެން ދިޔަ ބެލުންތެރިންގެ ފެވަރިޓް ގްރޫޓް ނުވަތަ ވާހަކަ ދައްކާ ގަހަށް އަޑުއަޅާއިދީފައިވާ އެކްޓަރެވެ.
އެ ފިލްމުގެ އެހެން ތަރިންނަކީ ސްޓާ ލޯޑް ނުވަތަ ޕީޓާ ކްއިލްގެ ރޯލު ކުޅުނު ކްރިސް ޕްރެޓާއި ގެމޯރާގެ ރޯލު ކުޅުނު ޒޯއީ ސެލްޑާނާ އަދި ޑްރެކްސްގެ ރޯލު ކުޅުނު ޑޭވް ބަޓިސްޓޫޓާ އާއި ރޮކެޓް ކެރެކްޓާ އަށް އަޑުއަޅައިދީފައިވާ ބްރެޑްލީ ކޫޕާ އެވެ.
ކުރިއަށް އޮތް އެވެންޖާސްގެ ފިލްމަކީ "އެވެންޖާސް އިންފިނިޓީ ވޯ" އެވެ. މި ފިލްމު ވެގެންދާނީ މާވެލްގެ ސިނެމެޓިކް ޔުނިވާސް އަށް ނިސްބަތްވާ 19 ވަނަ ފީޗާ ފިލްމަށެވެ. ފިލްމުގައި "ގާޑިއަންސް އޮފް ދަ ގެލެކްސީ" އަށް ނިސްބަތްވާ ސުޕަހީރޯ އިންގެ އިތުރުން މާވެލްގެ އެހެން ފިލްމުތަކުން ފެނިގެން ގޮސްފައިވާ ސުޕަހީރޯ އިން ވެސް ފެނިގެންދާނެ އެވެ.
މި ފިލްމު ނެރެން ހަމަޖެހިފައި ވަނީ 2018 ވަނަ އަހަރުގެ މެއި މަހު އެވެ. އެކަމަކު އޭގެ އެއް އަހަރު ކުރިން، އަންނަ އަހަރުގެ މެއި މަހު "ގާޑިއަންސް އޮފް ދަ ގެލެކްސީ" ސީކުއެލް ނުވަތަ "ވޮލިއުމް ދޭއް" ސިނަމާތަކަށް ނުކުންނާނެ އެވެ.
