ފޯބްސް މަޖައްލާ އިން ކޮންމެ އަހަރަކު އެކުލަވައިލާ ލިސްޓް، ހައެސްޓް ޕެއިޑް އެކްޓްރެސްގެ އެއް ވަނައިގައި ހޮލީވުޑްގެ ބަތަލާ ޖެނިފާ ލޯރެންސް އަނެއްކާވެސް ހިމެނިއްޖެ އެވެ.
ނިމިގެން ދިޔަ 12 މަހަށް ބަލައި އެކުލަވާލާފައިވާ ލިސްޓުގެ އެއް ވަނާގައި 26 އަހަރުގެ ބަތަލާ މިފަހަރު އޮތީ 46 މިލިއަން ޑޮލަރުގެ އާމްދަނީއަކާ އެކުގަ އެވެ. މިދިޔަ އަހަރު ވެސް މި ލިސްޓްގެ އެއް ވަނަ ލިބުނު ބަތަލާއަކީ ލޯރެންސް އެވެ. ނަމަވެސް މިދިޔަ އަހަރާ އަޅާބަލާއިރު މި 12 މަހުގެ އާމްދަނީ ދަށެވެ.
އޮސްކާ އެވޯޑް ވެސް ހާސިލުކޮށްފައިވާ ޖެނިފާ ލޯރެންސަށް މިދިޔަ އަހަރު އާމްދަނީއެއްގެ ގޮތުގައި 52 މިލިއަން ޑޮލަރު ލިބިފައިވެ އެވެ. ހުރިހާ ވެސް ޝުކުރެއް އޭނާގެ ކާމިޔާބު ފިލްމު ސިލްސިލާ "ދަ ހަންގާ ގޭމްސް" އަށެވެ. އެއަށް ފަހު މި އަހަރު ނެރުމަށް ހަމަޖެހިފައިވާ ފިލްމު "ޕެސެންޖާސް" އަކީ ވެސް ލޯރެންސްގެ އާމްދަނީ މައްޗަށް ޖައްސާލި ބޮޑު އަގެއް ލިބުނު ފިލްމެކެވެ.
އެންމެ ބޮޑު އާމްދަނީއެއް ލިބުނު ބަތަލާއިންގެ ލިސްޓްގެ ދެ ވަނާގައި ވަނީ ކޮމޭޑިއަން މެލީސާ މެކްކާތުނީ އެވެ. "ގޯސްޓްބަސްޓާސް" ގެ ރީމޭކާ އެކު އާމްދަނީ އަށް 10 މިލިއަން މިއަހަރު އިތުރުކުރި މެލީސާ އަށް ލިސްޓްގެ ދެ ވަނަ ލިބެނީ 13 މިލިއަން ޑޮލަރާ އެކުގަ އެވެ.
މި ލިސްޓެއްގެ އެއް ވަނަ، ބޮޑު ތަފާތަކުން ލޯރެންސް ގެންގޮސްފައިވާއިރު އޭނާ އަކީ ހޮލީވުޑްގައި މުސާރަ ދޭ މިންގަނޑުގައި އަންހެނުންނާއި ފިރިހެނުން ތަފާތުކުރާ މައްސަލައާ ދެކޮޅަށް ވަރަށް ބޮޑަށް އަޑުއުފުލާ ބަތަލާއެކެވެ.
ބަތަލާ ޖެނިފާ ލޯރެންސް