ނެޓްފްލިކްސްގެ "ސްޓްރޭންޖާ ތިންގްސް" އިން އެ ވަނީ މި އަހަރުގެ ޓީވީ ސިލްސިލާތަކުގެ ރޭސް ގާތްގަނޑަކަށް ނިންމާލައިފަ އެވެ. އެހެން ނަމަވެސް ޔޫއެސްއޭ ނެޓްވޯކްގެ "މިސްޓަ ރޮބަޓް" އަކީ މި އަހަރު ވެސް ބެލުންތެރިންނާއި އެވޯޑް ސީޒަންގެ މެހްމާނުން ސިއްސުވާލަފާނެ ފެންވަރުގެ ޝޯއެކެވެ.
އެކްޓަރު ރޭމީ މާލިކް ލީޑް ރޯލު ކުޅެމުން އަންނަ މި ސިލްސިލާ އަކީ ޔަގީނަށް ވެސް މި ވަގުތަށް ބަލާ ނަމަ އެ ޑްރާމާ ސީރީޒްއަކަށް އެންމެ ގަދަ އަށް ތައުރީފު އޮހެމުން އަންނަ ޑްރާމާއެވެ. މިދިޔަ އަހަރުގެ އަލަތު ސީޒަންއާ އެކު ގޯލްޑެން ގްލޯބް އެވޯޑްސްގައި އެންމެ މޮޅު ޓީވީ ޑްރާމާގެ ޝަރަފް އެއަށް ލިބިގެން ދިޔައީ ވެސް ސަބަބުތަކެއް ނެތިއެއް ނޫނެވެ.
އެ އާދަޔާހިލާފު ސީޒަނަށް ފަހު 12 އެޕިސޯޑާ އެކު "މިސްޓަ ރޮބަޓް" އެނބުރި އައިސްފައި ވަނީ އެއަށް ވުރެން ވެސް ވަރުގަދަކޮށެވެ. މި ސީޒަނުގައި ބާކީ ދެން އޮތީ ހަތަރު އެޕިސޯޑެވެ.
މިހައި ހިސާބުން "މިސްޓަ ރޮބަޓް" ގެ ކުރު ތައާރަފަކަށް ޖެހިލަމާ ހިނގާށެވެ. މިއީ ޓެކްނޯ ތްރިލާ އެކެވެ. އޭގެ ލީޑް ކެރެކްޓާގެ ބޮލު ތެރޭގައި އެނބުރޭ ހިޔާލުތަކަށް ބިނާކޮށް މިއީ ސައިކޮލޮޖިކަލް ތްރިލާއެކޭ ވެސް ބުނެވިދާނެ އެވެ.
މި ޑްރާމާގައި ރޭމީ މާލިކް ކުޅެނީ ސައިބާސެކިއުރިޓ އިންޖިނިއަރެއް އަދި ކުޅަދާނަ ކެހަރެއްގެ ރޯލެވެ. ހަމައެއާ އެކު އޭނާ އަކީ ސޯޝަލް އެންޒައިޓީ ޑިސްއޯޑާ އާއި ކްލިނިކަލް ޑިޕްރެޝަންގެ ނުރައްކަލަށް ވެސް ހުށަހެޅިފައިވާ ކެރެކްޓާއެކެވެ. -- މި ކެރެކްޓާގެ ނަމަކީ އެލިއޮޓް އެލްޑަސަން އެވެ.
މި ކެރެކްޓާ އަކީ ނިއު ޔޯކްގެ ސައިބާ ސެކިއުރިޓީ ކޮމްޕެނީއެއް ކަމުގައިވާ އޯލްސޭފްގައި މަސައްކަތްކުރާ ސެކިއުރިޓީ އިންޖިނިއަރެކެވެ. އޭނާއާ ދެން ބައްދަލުވަނީ މިސްޓަ ރޮބަޓް ނަމަކަށް ކިޔާ ގޮތްނޭނގޭ ކެރެކްޓާއަކާ އެވެ. އެކަމަކު މި ސީރީޒް ކުރިއަށްދާ ވަރަކަށް އެ ކެރެކްޓާގެ އަސްލަކީ ކޮބައިކަން އެނގޭނެ އެވެ.
އެ ކެރެކްޓާ މެދުވެރިކޮށް އެލިއޮޓްއާ ބައްދަލުވަނީ ހެކްޓިވިސްޓުންގެ އަންޑާގްރައުންޑް ގްރޫޕަކާ އެވެ. ނަމަކީ އެފްސޮސައިޓީ އެވެ. އެމީހުންގެ އަމާޒަކީ ދުނިޔޭގެ އެންމެ ބޮޑު ވިޔަފާރި ކުންފުނި ހެކްކޮށް އެމީހުންގެ ޑާޓާ އެއްކޮށް ހަލާކުކޮށްލުމެވެ. އެކަމުގައި ލީޑަރަކަށް ވެގެންދަނީ އެލިއޮޓް އެވެ.
ސީޒަން އެކެއް ނިމިގެން ދަނީ މި ވަރުގަދަ ހެކާ އެކު ދުނިޔެ ހުއްޓުމަކަށް އައިސްގެންނެވެ. އެއަށް ފަހު ދެ ވަނަ ސީޒަނުގައި މިހާތަނަށް އައިސްފައިވާ އެންމެ ބޮޑު ޓްވިސްޓަކީ ކޮބައިކަން ނުބުނެ ޓްވިސްޓެއްގެ ގޮތުގައި ބާއްވަމާ ހިނގާށެވެ.
މި ޑްރާމާއަކަށް ތައުރީފު އޮއްސަމުން ދަނީ ހަމައެކަނި ބެލުންތެރިންނާއި ފާޑުކިޔުންތެރިންނެއް ވެސް ނޫނެވެ. މި ސިލްސިލާގައި ހެކިން އަދި އައިޓީ ސެކިއުރިޓީގެ ހާލަތާއި މަންޒަރުތައް ގެނެސްދީފައިވާ އަސްލުކަމަށް، އައިޓީ ދާއިރާގެ ތަޖުރިބާކާރުންގެ ތައުރީފު ވެސް ދަނީ އޮހެމުންނެވެ.
މި ޑްރާމާގެ ފަހަތުގައި ހުރި މައި ސިކުނޑި އަކީ ސޭމް އިސްމާއިލް އެވެ. އޭނާގެ މި ޑްރާމާ އަކީ އެންމެ ފުރަތަމަ ފީޗާ ފިލްމެއްގެ ގޮތުގައި ބޮލުގައި ކުރަހަމުން ގެންދިޔަ ހިޔާލެކެވެ. ޓީވީ އަށް އޭނާގެ ހިޔާލު ބަންޑުންކޮށްލެވުނީ 15 އަހަރުގެ މަސައްކަތުންނެވެ.
ކުރިއަށް އޮތް ޝަރަފްވެރި އެމީ އެވޯޑްސްގައި "މިސްޓަ ރޮބަޓް" އަކީ އެންމެ މޮޅު ޑްރާމާ އަށް ވާދަކުރާ ސިލްސިލާއެކެވެ. ރޭމީ މާލިކް އެންމެ މޮޅު އެކްޓަރުގެ އެވޯޑަށް ވެސް ވާދަކުރެ އެވެ. މީގެ އިތުރުން ލިޔުމާއި މިއުޒިކް ކޮމްޕޯޒިން އާއި ކާސްޓިންގެ އިތުރުން ސައުންޑް މިކްސިން ކެޓަގަރީގައި ވެސް އެވޯޑަށް ވާދަކުރެ އެވެ.