އެއްގަމު އުޅަނދުގެ އިންޝުއަރެންސް ޕްރިމިއަމް ކުޑަ ކުރަނީ

އެއްގަމު ދަތުރުފަތުގެ ގާނޫނުން ލާޒިމް ކުރާ "ތާޑް ޕާޓީ އިންޝުއަރެންސް" ގެ ޕްރިމިއަމް ކުޑަ ކުރަން ވިސްނަމުންދާ ކަމަށް ޓްރާންސްޕޯޓް އޮތޯރިޓީގެ ޗެއާމަން އަބްދު ރަޝީދު ނާފިޒު ވިދާޅުވެއްޖެ އެވެ.

ކަނޑު އުޅަނދު ފަހަރު އިންޝުއަރެންސް ކުރަން އެލައިޑާ ހަވާލު ކުރުމަށް ބޭއްވި ރަސްމިއްޔާތުގެ ތެރެއިން އޮތް، ނިއުސް ކޮންފަރެންސުގައި ޓްރާންސްޕޯޓް އޮތޯރިޓީގެ ޗެއާމަން އަބްދު ރަޝީދު ނާފިޒު ވިދާޅުވީ ތާޑް ޕާޓީ އިންޝުއަރެންސް ޕޮސިލީގެ ޕްރިމިއަމް މަތިވުމުގެ ޝަކުވާ ލިބެމުންދާ ކަމަށެވެ. އަދި އެ އިންޝްއަރެންސް އެންމެ އެދެވޭ ފައިދާ ނުލިބޭ މައްސަލަ ވެސް ފާހަގަކޮށްފައިވާ ކަމަށް ނާފިޒު ވިދާޅުވި އެވެ.

"އަޅުގަނޑުމެންނަށް ލިބެމުންދާ ޝަކުވާއެއް ތާޑް ޕާޓް އިންޝުއަރެންސް ޕޮލިސީގެ ޕްރިމިއަލް މަތިވުމާއެކުމި ޕޮލިސީގެ ސީދާ ފައިދާ ދުއްވާ ފަރާތްތަކަށް ނުލިބޭކަން. އަޅުގަނޑަކަށްވެސް ފާހަގަވެފައިވާ ކަމެއް 2،000ރ. ނޫނީ އެއްވަރުގެ މަތިން ހަރަދު ކުރަން ނުޖެހޭނަމަ ކަވަރެއް ނުކުރޭ. ނަމަވެސް އާއްމު ގޮތެއްގައި އެކްސިޑެންޓެއް ވީމަ، ސައިކަލްގެ އެހެން ތަނެއް ތަޅައިގެން ދިއުން ނޫނީ ކޫރު އެޅުނީމަ އެވަރު ހަރަދެއް ނުވޭ،" ނާފިޒު ވިދާޅުވި އެވެ.

އޭނާ ވިދާޅުވީ މި އިންޝުއަރެންސަކީ ގާނޫނުން ލާޒިމްކުރާ އެއްޗެއް ކަމަށާއި، އެކަމާ ބެހޭ ގޮތުން ވިސްނަމުންދާ ކަމަށެވެ. އަދި އާންމުންނަށް ވީހާ ވެސް ލުއިފަސޭހަ ގޮތަކަށް މި އިންޝްއަރެންސް ލިބޭނެ އިންތިޒާމް ހަމަޖެއްސުމަށް ވިސްނާ ކަމަށް ވެސް ނާފިޒު ވިދާޅުވި އެވެ.

"ވިސްނަމުން މިދަނީ އިންޝުއަރެންސް ކުންފުނިތަކާއެކު ވާހަކަ ދައްކައިގެން ޕްރިމިއަމް ކުޑަ ކުރަން ވިސްނަން. މިހެންމި ދެންނެވީ ރާއްޖޭގައި މިވަގުތު 70،000 އުޅަނދު ރަޖިސްޓްރީ ކޮށްފައި އެބަހުރި. އެހެންވެ މި އުޅަނދު ފަހަރު ދުއްވާ ފަރާތްތަކަށް އިންޝުއަރެންސުގެ ސީދާ މަންފާ ލިބޭނެ ގޮތް ހެދުމަކީ ކުރަން ޖެހޭ ކަމެއް. އެކަމަށް ވިސްނަން އަގު ހެޔޮ ޕްރިމިއަމްއެއް ދޭނެ ފަރާތެއް ހޯދަން،" ނާފިޒު ވިދާޅުވި އެވެ.

ތާޑް ޕާޓީ އިންޝުއަރެންސުގެ ދަށުން ޕްރިމިއަން ދެއްކުމަށް ހަތަރު ކެޓަގަރީއެއް ކަނޑައަޅާފައިވެ އެވެ. އެގޮތުން، 50 ސީސީއާ ހަމަޔަށް ސައިކަލްތަކުން ދައްކަން ޖެހެނީ 150ރ. އެވެ. އަދި 50-250 ސީސީގެ ސައިކަލްތަކަށް 175ރ. ދައްކަން ޖެހެ އެވެ. މީގެ އިތުރުން 250 ސީސީން މަތީގެ ސައިކަލްތަކަށް 400ރ. ދައްކަން ޖެހޭއިރު، އަމިއްލަ ޕްރައިވެޓް ކާރެއްނަމަ ދައްކަން ޖެހެނީ 750ރ. އެވެ. އަދި ޓެކްސީތަކުން ދައްކަން ޖެހެނީ 1،000ރ. އެވެ. މީގެ އިތުރުން އަމިއްލަ ބޭނުމާއި ވިޔަފާރީގެ ބޭނުންތަކަށް ދުއްވާ އުޅަނދުތަކުން 1،000ރ. ދައްކަން ޖެހެ އެވެ. އަދި ޓެކްސީ ކުރުމަށް ކުއްޔަށް ދޫކޮށްފައިވާ އުޅަނދުތަކުން 1،500ރ. ދައްކަން ޖެހޭއިރު، އެހެނިގެން ބޭނުންތަކަށް ހާއްސަ އުޅަނދު ފަހަރުން ދައްކަން ޖެހެނީ 2،000ރ. އެވެ.