ތްރީޑީ ފިލްމަކީ ފިލްމުބަލާ މީހުންގެ މެދުގައި "ހުރިހާ އިރަކަށް" ރަނގަޅު ފޯމެޓެއް ނޫނެވެ. އެހެން ނަމަވެސް ޗައިނާގެ ފިލްމު އޯޑިއެންސް މުޅި ދުނިޔެއާ ވެސް ތަފާތެވެ. ޗައިނާގައި އެންމެ މަޝްހޫރު ފިލްމު ފޯމެޓަކީ ތްރީޑީ އެވެ. ވަކިން ހާއްސަކޮށް، އެކްޝަން ފިލްމެއް ނަމަ ތްރީޑީކޮށް ނޫން އެހެން ގޮތަކަށް އެމީހުން ބަލާހިތެއް ވެސް ނުވެ އެވެ.
އެކަމަކު މިފަހުން ނެރުނު މަޝްހޫރު އެކްޝަން ފިލްމު "ޖޭސަން ބޯން" ގެ ތްރީޑީ ވާޝަނާ އެކު ޗައިނާގެ ވަރަށް ގިނަ ބަޔަކު ވަނީ "ފިލްމު ވިހަވެފަ" އެވެ. ފިލްމު ބަލަން ދިޔަ މީހުންގެ ބޯއަނބުރައި، ހޮޑުލެވި ހޮސްޕިޓަލުގައި ފަރުވާ ދޭ ވަރު ވެސް ބައެއް މީހުންނަށް ވެފައިވާ ކަމުގެ ރިޕޯޓް ލިބެ އެވެ.
ބެލެވޭ ގޮތުގައި މިއީ "ޖޭސަން ބޯން" ޝޫޓްކޮށްފައިވާ ގޮތުން ދިމާވި މައްސަލަ އެކެވެ. އާންމުކޮށް ލޮލަށް އެންމެ ފަސޭހަ ތްރީޑީ އަކީ "ރިއަލް ތްރީޑީ" ނުވަތަ އެއްވަރަކަށް ރިކޯޑްކުރާ ދެ ކެމެރާއިން ނަގާފައިވާ ފިލްމުތަކެވެ. "ޖޭސަން ބޯން" ގެ ގިނަ މަންޒަރުތަކަކީ ސީދާ ޑައިރެކްޓަރު ޕޯލް ގްރީންގްރާސް އަތުން ހިފަހައްޓައިގެން ނަގާފައިވާ "ހޭންޑްހެލްޑް" މަންޒަރުތަކާއި އޭގެ ފާސްޓް-ޕޭސްޑް އެޑިޓެވެ.
ޔަގީނަށް ވެސް އެފަދަ މަންޒަރުތަކެއް ތްރީޑީ އަށް ބަދަލުކޮށްލުމުން އެ މަންޒަރު ތްރީޑީކޮށް ބަލާ މީހަކު ބޯއަނބުރައި ހޮޑުލެވޭނެ އެވެ. "ޖޭސަން ބޯން" ތްރީޑީކުރީ ސީދާ ޗައިނާގެ އޯޑިއެންސަށް އެކަންޏެވެ.
ބަޔަކަށް ހޮޑުލެވުނަސް "ޖޭސަން ބޯން" ގެ ތްރީޑީ ވާޝަން ޗައިނާގައި ވަރަށް މަޝްހޫރެވެ. ވެރިރަށް ބެއިޖިންގެ 149 ސިނަމާއެއްގައި މި ފިލްމުގެ ޝޯތައް ކުރިއަށްދާއިރު ޓޫޑީ ފޯމެޓްގައި ދައްކަނީ އެންމެ އަށް ސިނަމާގަ އެވެ. ޝަންހައިގެ 174 ސިނަމާއެއްގައި ފިލްމު ދައްކާއިރު ޓޫޑީކޮށް ދައްކަނީ އެންމެ ނުވަ ސިނަމާގަ އެވެ.
ޖޭސަން ބޯންގެ ގޮތުގައި މެޓް ޑޭމަން: އޭނާގެ މި ފިލްމު ތްރީޑީކޮށް ބެލި ޗައިނާގެ ގިނަ ބަޔަކު ވަނީ ބަލިވެފައި.