އެކްޓަރު އަދި ޑައިރެކްޓަރު މެލް ގިބްސަން އަކީ އޭނާގެ އޮން ސްކްރީން ރޯލުތަކާ އެއްވަރުގެ މަޝްހޫރުކަމެއް އޮފް-ސްކްރީންގައި ވެސް އާންމުކޮށް ލިބޭ ފަރާތެކެވެ. ނަމަވެސް މިފަހަރު އޭނާ އަށް ސަމާލުކަންލިބިގެން އުޅެނީ އޮން ސްކްރީނަކު އަދި ސިނަމާގެ ބޭރުގައި ކޮށްފައިވާ ކަމަކާ ގުޅިގެނެއް ވެސް ނޫނެވެ.
އޭނާގެ އާ ޑައިރެކްޝަން، "ހެކްސޯ ރިޖް" އާދަޔާހިލާފަށް މޮޅީ އެވެ. މިދިޔަ ހަފުތާ ބަންދާ ދިމާކޮށް ވެނިސް ފިލްމު ފެސްޓިވަލްގައި ޕްރިމިއާކުރި މި ފިލްމަށް ދަނީ ހުއްޓުމެއްނެތް ތައުރީފު އޮހެމުންނެވެ. އެ ފެސްޓިވަލްގައި ފިލްމު ދައްކައި ނިމުމުން، އޯޑިއެންސްގައި ތިބި މީހުން ކޮޅަށް ތެދުވެ 10 މިނެޓު ވަންދެން އަތްޖަހައި މެލް ބިގްސަން އަށް ތައުރީފު އޮއްސާލާފައިވާިއރު އެންމެން ވެސް ބުނަނީ މިއީ ގިބްސަންގެ އެންމެ މޮޅު ޑައިރެކްޝަން ކަމަށެވެ.
އެހެން ކަމުގައި ވަނީ ނަމަ އަހަރުގެ އެންމެ މޮޅު ފިލްމަށް މި ފިލްމު ވެދާނެ އެވެ. ސަބަބަކީ މިގޮތަށް މީގެ ކުރިން ގިނަ ބަޔަކަށް ކަމުދިޔަ ގިބްސަންގެ ފިލްމު "ބްރޭވްހާޓް" އިން އޭނާ އެފަހަރު އޮސްކާ އާއި ގޯލްޑެން ގްލޯބްގައި އެންމެ މޮޅު ޑައިރެކްޓަރުގެ އެވޯޑްސް ވެސް ހާސިލުކޮށްފައިވާތީ އެވެ.
ޔަގީނަށް ވެސް "ހެކްސޯ ރިޖް" މިއީ އޮސްކާ އާއި އެހެން އެވޯޑްތަކާ ރައްޓެހިވާނެ ފިލްމެކެވެ.
މެލް ގިބްސަން އަކީ ޑައިރެކްޝަނަށް އާ ފަންނާނެއް ނޫނެވެ. އޭނާ ކުރިން ޑައިރެކްޓްކުރި "ބްރޭވްހާޓް" ގެ އިތުރުން "ދަ ޕޭޝަން އޮފް ދަ ކްރިސްޓް" އަދި "އެޕޮކެލިޕްޓޯ" އަކީ ވެސް ތައުރީފު އޮހުނު ފިލްމުތަކެވެ.
އޭނާގެ އާ ފިލްމު "ހެކްސޯ ރިޖް" އަކީ ދެ ވަނަ ބޮޑު ހަނގުރާމައިގެ ތެރެއިން މަޝްހޫރުވެ އެމެރިކާގެ ރައީސްގެ ޝަރަފްވެރިކަމުގެ މެޑަލް ހާސިލުކޮށްފައިވާ ޑެސްމޮންޑް ޓީ ޑޮސްގެ ހަޔާތުގެ ވާހަކަ އެވެ. އޭނާ އަކީ ހަނގުރާމައިގެ މައިދާނަށް ނެރުމުން ބަޑިޖަހައި އިދިކޮޅު މީހުން މެރުމަށް ދެކޮޅު ހެދި ސިފައިންގެ މީހެކެވެ. ނަމަވެސް ބޮމާއި ބަޑީގެ ކުރިމަތިލުންތަކުގެ ތެރެއިން އެމެރިކާ ސިފައިންގެ 75 މީހެއްގެ ފުރާނަ ސަލާމަތްކުރި އެވެ.
ފިލްމުގައި މިއާދަޔާހިލާފު ރޯލު ކުޅެފައި ވަނީ އެންޑްރޫ ގާފީލްޑެވެ. މި ފިލްމުން އެކްޓަރު ސޭމް ވާދިންޓޮން ވެސް ފެނިގެންދާނެ އެވެ.
ފިލްމުގެ ޝޯތައް ރަސްމީކޮށް އުތުރު އެމެރިކާގައި ފަށާނީ ނޮވެމްބަރު މަހު އެވެ.