އެއްވެސް ސިޔާސީ ފަރާތަކާ ގުޅުމަށް ފައިސާގެ އަދަދަކަށް ނޭދޭ ކަމަށާއި އަދި އެއްވެސް ފަރާތެއްގެ އަތުން އެފަދަ ކަމަކަށް ފައިސާ ވެސް ލިބިފައި ނުވާނެ ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެ އެވެ.
ރާއްޖެއާ ގުޅޭ ގޮތުން އަލްޖަޒީރާގެ ތަހުގީގު ޔުނިޓުން ތައްޔާރު ކުރި، "ސްޓީލިން ޕެރަޑައިޒް" އަށް ފަހު ރާއްޖޭއާ ބެހޭ ގޮތުން އާންމު ކޮށްފައިވާ ލިޔުމެއްގައި އިތުބާރު ހުރި މަސްދަރަކާ ހަވާލާދީ އަލްޖަޒީރާ އިން ބުނެފައި ވަނީ އިދިކޮޅު ފަރާތްތަކާ ގުޅުމަށް، 100،000 ޑޮލަރު ދިނުމަށް މައުމޫން ނަޝީދުގެ ކިބައިން އެދިވަޑައިގަތް ކަމަށެވެ. އަދި އެންމެ މަދުވެގެން ވެސް 50،000 ޑޮލަރު ނަޝީދު މައުމޫންއަށް ދެއްވި ކަމަށް އަލްޖަޒީރާ އިން ވަނީ އެ ލިޔުމުގައި ތުހުމަތުކޮށްފަ އެވެ.
އެކަމާ ގުޅިގެން މައުމޫން މިރޭ ކުރެއްވި، ޓްވީޓެއްގައި ވިދާޅުވީ އެއީ އެއްވެސް އަސްލެއް ނެތް ދޮގު ވާހަކަތަކެއް ކަމަށެވެ. މައުމޫން ވިދާޅުވީ އެއްވެސް ސިޔާސީ ޕާޓީއަކާ ގުޅުމަށް ވެސް އަދި އެއްވެސް ސިޔާސ ފިކުރަކާ ގުޅުމަށް ވެސް ފައިސާގެ އަދަދެއް ހުށަނާޅުއްވާ ކަމަށާއި އެފަދަ ފައިސާގެ އަދަދެއް ލިބިފައި ވެސް ނެތް ކަމަށެވެ. އަދި އިތުބާރު ހުރި އެހެން ފަރާތަކުން މައުމޫނާ ހަވާލާދީ ވިދާޅުވީ ކުރީގެ ރައީސަށް މައުމޫން ގުޅުއްވި ކަމަށް ބުނާ ބުނުން ވެސް މައުމޫނު ދޮގު ކުރައްވާފައިވާ ކަމަށެވެ.
މައުމޫން އެހެން ވިދާޅުވި އިރު، އަލްޖަޒީރާގެ ތުހުމަތުތައް ނަޝީދު ވެސް ވަނީ އެ ރިޕޯޓްގައި ދޮގު ކުރައްވައިފަ އެވެ. އެހެން ނަމަވެސް ނަޝީދު ދާދިފަހުން އިންޑިއަން އެކްސްޕްރެސް ނޫހުގައި ވިދާޅުވެފައި ވަނީ މައުމޫން ހުރީ އިއްތިހާދާ އެކުގައި ކަމަށާއި ގިނަ ކަންތައްތަކެއް ވާތަން ކުރިއަށް އޮތްތަނުގައި ފެންނާނެ ކަމަށެވެ.
ނަޝީދު މިރޭ ކުރެއްވި ޓްވީޓްގައި ވިދާޅުވެފައިވަނީ، އެމަނިކުފާނާއި މައުމޫންއާ ދެމެދު ފައިސާގެ މުއާމަލާތެއް އެއްވެސް އިރަކު ނުހިނގާ ކަމަށެވެ. އަދި އެ ދެ ބޭފުޅުންގެ ދެމެދުގައި ދެކެވިފައިވަނީ ޑިމޮކްރަސީގެ ވާހަކަ އެކަނި ކަމަށް ވިދާޅުވި އެވެ.
އަލްޖަޒީރާގެ ލިޔުމުގައި، ދެން މައުމޫންގެ މައްޗަށް ކޮށްފައި އޮތް ތުހުމަތަކީ، އެމަނިކުފާނުގެ ދެ ދަރިކަލުން ވެސް ހިމެނޭ ގޮތަށް މައުމޫން އަދީބުގެ އަތުން ގިނަ އަދަދެއްގެ ފައިސާ ނެންގެވި ކަމަށެވެ. އަދި އެމްއެމްޕީއާރުސީ އިން ވަގަށް ނެގި ފައިސާ، ސީދާ މައުމޫން އަންގަވައިގެން ޕީޕީއެމްގެ މުވައްޒަފުންނަށް މުސާރަ ދިނުމަށާއި ޕާޓީގެ އެހެން ވެސް ހަރަދުތައް ކުރުމަށް ބޭނުން ކޮށްފައިވާ ކަމަށް، އެ ލިޔުމުގައި ވަނީ ތުހުމަތުކޮށްފަ އެވެ. މައުމޫން އެ ތުހުމަތުތަކަށް އަދި އެއްޗެއް ވިދާޅެއް ނުވެ އެވެ.