މި ސަރުކާރުން އުޅެނީ މަކަރުވެރި ރޭވުމެއްގެ ތެރެއިން ބައެއް ދުވަސް ދުއްވާލަން ކަމަށް ވިދާޅުވެ، މަކަރުވެރިން ބަލި ކުރެއްވުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ދުއާ ކުރައްވައިފި އެވެ.
އެމަނިކުފާނުގެ އަމިއްލަފުޅު ޓީވީ، ވީޓީވީ އިން ގެނެސްދިން ހާއްސަ އިންޓަވިއުއެއްގައި ވާހަކަފުޅު ދައްކަވަމުން ގާސިމް ވަނީ މި ސަރުކާރުން އޭނާގެ ވިޔަފާރި އާއި މުދާ ހަލާކުކޮށްލަން މަކަރުވެރި ރޭވުންތަކެއް ރާވާފައިވާ ކަމަށް ވިދާޅުވެފަ އެވެ. އަދި އެއަށް ފަހު ގާސިމް ވަނީ ދެއަތްޕުޅު މައްޗަށް ނަންގަވައިގެން ﷲ ގެ ހަޒުރަތުގައި ދުއާ ދަންނަވައިފަ އެވެ.
ކީރިތި ގުރުއާނުގައި މަކަރުވެރިންނާ ގުޅޭ ގޮތުން އޮންނަ އާޔަތެއް ވިދާޅުވުމަށް ފަހު ގާސިމް ވަނީ ދެއަތްޕުޅު މައްޗަށް އުފުއްލަވައި "ﷲ ވޮޑިގެންވާ ކަމަށާއި މަކަރުވެރިންގެ މަކަރުތައް ހާމަ ކުރައްވައި ބާތިލް ކުރައްވުމަށް ﷲގެ ހަޒުރަތުން އެދި ވަޑައިގަންނަވާ" ކަމަށް ވިދާޅުވެފައެވެ.
"ހަގީގަތް ހާމަވާނެ ދުވަހެއް އަންނާނެ. ކޮންމެ ފަރާތަކީ ވެސް ﷲ ގަންދީ ހުވާކޮށްގެން ތިބި ފަރާތެއް. އަޅުގަނޑު ދަންނަވާނީ ތިހެން ނަހައްދަވާށޭ. ތިބޭފުޅުން ތިކޮށްގެން ތިއްބެވި ހުވަޔާ އެއްގޮތަށް އަމަލު ކުރައްވާށޭ،" ގާސިމް ވިދާޅުވި އެވެ.
އޭނާ ވިދާޅުވީ، ސިޔާސީ މަސައްކަތްތަކުގައި އޭނާ އުޅުއްވަނީ ވަކި މީހަކާ ޖައްސާލައިގެން ނޫން ކަމަށާއި ދިވެހި ރައްޔިތުންނާއި ޑިމޮކްރަސީގެ ހައްގުގައި ކަމަށެވެ. ގާސިމް ވިދާޅުވީ ރިސޯޓް ހަދަން ދޫކުރި ރަށްތަކުގެ ތެރެއިން ނުހެދި އެތައް ފަޅުރަށެއް ހުރި ކަމަށާއި އެކަމަކު ނަގަނީ ވިލާއަށް ދޫކޮށްފައި ހުރި ރަށްތަކެއް ކަމަށެވެ. އަދި މިއީ އިންސާފެއް ނޫން ކަމަށް ވެސް ގާސިމް ވިދާޅުވި އެވެ. އޭނާ މިރޭ ވެސް ވިދާޅުވީ ވިލާ އިން އެއްވެސް ފައިސާއެއް ސަރކާރަށް ދައްކަން ނޯންނާނެ ކަމަށެވެ.
"ޓުއަރިޒަމް މިނިސްޓަރު އަދީބު އެ ހައްދަވަނީ ކަޑައެޅިގެން އިތުރުފުޅު. އެތައް މިލިއަން ޑޮލަރެއް އެޑްވާންސަށް ދައްކާފައި އަޅުގަނޑުމެން ނަގާފައި ހުރި ރަށްތައް އެއީ. އަޅުގަނޑު ދަންނަވާނީ ކުޅޭ ކުޅޭ ވާހަކަ ނުދައްކަވާށޭ. އިހުލާސްތެރި ކަމާ އެކު މަސައްކަތް ކުރައްވާށޭ،" ގާސިމް ވިދާޅުވި އެވެ.
އަންނަ ހުކުރު ދުވަހު އޮންނަ ބޮޑު އެއްވުމާ ގުޅޭ ގޮތުން ވާހަކަ ދައްކަވަމުން ގާސިމް ވިދާޅުވީ އެދުވަހު ރާއްޖޭގެ ރައީސް ކަމުގެ ހުވާ ކުރައްވަން އޭނާ މަސައްކަތް ނުކުރައްވާ ކަމަށެވެ. އަދި ރާއްޖޭގެ ވެރިކަން ބަދަލު ވާނެ ގޮތް ގާނޫނު އަސާސީގައި ސާފުކޮށް އޮންނަ ކަމަށް ގާސިމް ވިދާޅުވި އެވެ. އަދި އޭނާ ވެރިކަމާ ހަވާލުވާން އުޅޭ ކަމަށް ބުނެ ދައްކާ ވާހަކައިގައި އެއްވެސް އަސާސެއް ނެތް ކަމަށް ވެސް ގާސިމް ވިދާޅުވި އެވެ.