ބްރެޑް ޕިޓް ކައިރިން ވަރިވުމަށް އެންޖެލީނާ ޖޯލީ ކޯޓަށް ފޯމު ހުށަހަޅާފައިވާ ކަމަށް ޖޯލީގެ ވަކީލް މިއަދު ބުނެފި އެވެ. މި ދެ ތަރިންގެ ކައިވެންޏަށް ދެ އަހަރު ވަނީވެފަ އެވެ.
ޖޯލީގެ ވަކީލް ބުނެފައިވަނީ ވަރިވުމަށް ޖޯލީ ނިންމީ އެ އާއިލާއަށް އެންމެ ރަނގަޅު ގޮތަކީ އެއީ ކަމަށް އޭނާއަށް ފެންނާތީ ކަމަށެވެ. ޖޯލީ ކޯޓަށް ފޯމް ހުށަހަޅާފައިވަނީ މިއަދެވެ.
"މިކަމާ ގުޅޭ ގޮތުން ޖޯލީ އިތުރަށް އެއްވެސް އެއްޗެއް ބުނަން ބޭނުމެއް ނުވޭ، އަދި އެދެނީ މިކަމުގައި އެ އާއިލާއަށް ޕްރައިވެސީ ދިނުމަށް،" ވަކީލް ބުންޏެވެ.
ޖޯލީ އަދި ޕިޓް ލޯބީގެ ގޮތުން ގުޅިފައިވަނީ 2004 ވަނަ އަހަރު އެވެ. ކައިވެނިކޮށްފައިވަނީ 2014 ވަނަ އަހަރު އެވެ. މި ދެ ތަރިންގެ ހަ ކުދިން ތިބެ އެވެ. އޭގެ ތެރެއިން ތިން ކުދިންނަކީ އެޑޮޕްޓް ކޮށްފައިވާ ތިން ކުދިންނެވެ.
ރިޕޯޓްތައް ބުނާ ގޮތުން ބްރެޑް ޕިޓް ކައިރިން ވަރިވުމަށް ޖޯލީ ނިންމީ، ދަރިން ބޮޑުކުރުމުގައި އެ ދެ ތަރިންގެ ދެމެދު ހިޔާލު ތަފާތުވުމުގެ ސަބަބުންނެވެ. ޖޯލީ ވަނީ ވަރިވުމަށްފަހު ހަ ކުދިންގެ ޒިންމާ ވެސް އޭނާ ނަގާނެ ކަމަށް ބުނެފަ އެވެ.
މި ދެ ތަރިންގެ ޖޯޑަކީ ހޮލީވުޑްގެ އެންމެ މަޝްހޫރު އަދި އެންމެ ގިނަ ބައެއްގެ ލޯބި ލިބިފައިވާ ޖޯޑެވެ.